38. इशू बझ़ैल़अ ढाकणैं

यहूदी मनाऊंआं तै हर साल ओवार्णैओ थैर। अह थैर त ऐहा गल्ला सदा आद करना लै कि खास्सी साला पैहलै किऐ तै परमेशरै तिन्नें बाब दादै मिसर देशे गुलामीं का आज़ाद। कोई चिई साला बाद लागअ ईशू तेखअ सोभी आम लोगा जैंदरी परमेशरे राज़े गल्ला खोज़दअ और शिक्षा दैंदअ। ईशू बोलअ आपणैं च़ेल्लै लै इहअ कि तिन्नां संघै मनाऊंणअ तेऊ बी ओवार्णैंओ थैर और यहूदी पाणअ सह येरूशलेम नगरी मारी।

ईशूए च़ेल्लै मांझ़ै त एक च़ेल्लअ; तेऊ नांअ त यहूदा। सह त च़ेल्लै मांझ़ै ढब्बै-धेल्लै डाहणैं सभाल़णैं आल़अ शैहण। पर ढब्बे थैल्लू का करा त सह आप्पू लै धख-धख ढब्बै काढी। ज़ांऊं ईशू और सोभै च़ेल्लै येरूशलेम नगरी पुजै, यहूदा डेऊआ यहूदी मुखिऐ सेटा लै। संघा किई तेऊ धख ढब्बै पिछ़ू तिन्नां संघै ईशू ढाकणें सांठ-गांठ। तेऊ का थिअ थोघ कि यहूदी मुखिऐ निं ईशू मंदै तै कि अह ई आसा मसीहा और इहअ बी आसा त तेऊ का थोघ कि तिंयां च़ाहा किहअ करै तेऊ मारनअ।

माहा परोहिते बोल़णैं करै दैनै यहूदी मुखिऐ यहूदा लै तिह च़ंदीए सिक्कै कि ईशू दैऐ तिन्नें हाथै। इहअ हुअ तिहअ ई ज़िहअ खास्सी साला आजी त एकी गूरै हेरअ द बोली कि इहअ हणअ। यहूदा हुअ राज़ी और तिन्नां ढब्बै लई लागअ सह हांढदअ। सह रहअ तेऊ मोक्कै लै ताखुई कि केभै बझ़ैल़णअ तेऊ ईशू यहूदी मुखिए हाथै ढाकणैं।

ईशू मनाऊंअ येरूशलेम नगरी आपणैं च़ेल्लै संघै ओवारणैंओ थैर, ईशू चोल़ी रोटी संघा बोलअ सोभी च़ेल्लै लै, “एता खाआ अह आसा मेरी देही और अह दैनीं मंऐं तम्हां लै, मेरी आदी लै करै तम्हैं बी इहअ ई।” ऐहा गल्ला करै किअ ईशू प्रगट कि तेऊ दैणैं तिन्नां लै आपणैं प्राण मतलब तेऊ करनअ आपणअ बल़ीदान।

तेखअ ढाकअ ईशू दाखे रसो बतिल्लू हाथै संघा बोलअ आपणैं च़ेल्लै लै, “एता झुटा, अह आसा नऊंईं करारो मेरअ लोहू ज़ुंण मुंह तरैल़णअ ताकि परमेशर थारै पाप माफ करे। ज़िहअ मंऐं एभै किअ; तम्हैं करै मेरी आदी लै सदा इहअ ई।

तेखअ बोलअ ईशू आपणैं च़ेल्लै लै इहअ, “तम्हां मांझ़ै बझ़ैल़णअ हुंह एकी ज़ण्हैं ढाकणैं।” च़ेल्लै हुऐ रहैन कि अह कै गल्ल बोली! तिंयां लागै ईशू का पुछ़दै कि ईहअ काम कुंण सका करी? ईशू बोलअ इहअ, “ज़हा लै मुंह अह रोटीओ म्हार दैणअ, तेऊ बझ़ैल़णअ हुंह ढाकणैं।” तेखअ दैनअ तेऊ रोटीओ म्हार यहूदा लै।

तेऊ रोटीए म्हारा बाद बस्सअ राख्स यहूदे दिल्लै। सह डेऊअ यहूदी मुखिऐ सेटा लै तिन्नें मज़त करदअ कि ईशू आसा इधी तेऊ ढाका। ईंयां गल्ला हुई राची।

बैल़ी खाई डेऊऐ ईशू और तेऊए च़ेल्लै जैतून धारा बाखा लै। ईशू बोलअ तिन्नां लै इहअ, “आझ़ राची छ़ाडणअ हुंह तम्हां सोभी ज़िहअ पबित्र शास्त्रा दी आसा लिखअ द, ‘मुंह पाणअ फुआल मारी और भेडा छिंघणीं ओर्ही-पोर्ही।’”

एता लै बोलअ पतरसै इहअ, “होर लागे ताह छ़ाडदै पर हुंह निं ताह छ़ाडदअ आथी!” ईशू बोलअ इहअ, “राख्स च़ाहा तम्हां सोभी निंणअ, पर हे पतरस, मंऐं आसा ताल्है प्राथणां किई दी कि तूह निं लोल़ी विश्वासा का कबाता पेठअ। तज़ी बी बोल़णअ ताह आझ़ राची दोती मुर्गै बाशणैं का आजी हुधणअ तूह चिई बारी कि तूह निं मुंह बछ़ैणदअ बी आथी।”

पतरसै बोलअ ईशू लै, “हुंह च़ाऐ मरी बी जाए, तज़ी बी निं हुंह तेरै बारै हुधदअ आथी!” होर च़ेल्लै बी लागै इहअ ई बोलदै।

ईशू डेऊअ आपणैं च़ेल्लै संघै गतसमनीं नांओंए ज़ैगा, तिधी बोलअ तेऊ आपणैं च़ेल्लै लै इहअ कि प्राथणां करा ताकि राख्स तम्हां नांईं पटंके, संघा डेऊअ ईशू दूर ज़िहअ कल्ही प्राथणां करदअ।

ईशू किई चिई बारी प्राथणा, “हे मेरै बाबा, ज़ै हई सका; तै निं तूह एऊ दुखे बतिल्लू का मुल्है झुटणां लै दैई। ज़ै मणछे पाप माफी लै होर बात आथी ई निं, तै लोल़ी ज़िहअ तूह च़ाहा तिहअ पूरअ हुअ।” ईशू निं हैल़ी हांस ई रहअ, प्रसिन्नअ लागअ तेऊका लोहूए टिप्पू ज़िहअ धरनीं छ़ुटदअ। परमेशरै छ़ाडअ एक स्वर्ग दूत कि ईशू लै बल दैए।

हर प्राथणां बाद करा त ईशू आपणैं च़ेल्लै सेटा लै डेऊई, पर तिंयां हआ तै सुत्तै दै। ज़ांऊं सह चिऊथी बारी प्राथणां करी आअ; तेखअ बोलअ ईशू तिन्नां लै, “निंजा का उझ़िआ ऐबै खल़ै! मुंह ढाकणैं आल़ै गऐ एछी।”

यहूदी मुखिऐ आऐ खास्सै लोग और सपाही संघा लई और यहूदा बी त तिन्नां संघै। तिन्नें हाथै डांग-मुसल़ी और तलबारा। यहूदा बोलअ ईशू नेल़ एछी, “हे गूरू, नमस्ते,” संघा दैनअ तेऊ ईशू लै माख्खू। तेऊ किअ यहूदी मुखिऐ और सपाही लै इहअ करी शारअ कि अह ई आसा ईशू। ईशू बोलअ तेऊ लै इहअ, “यहूदा, माख्खू दैई बझ़ैल़अ हुंह तंऐं ढाकणैं भाल़ी?”

ज़ाऊं तिंयां सपाही ईशू ढाकदै लागै, पतरसै काढी आपणीं तलबार और तेऊ बाही माहा परोहिते एकी नोकरे कानै और कान शोटअ धरनीं। ईशू बोलअ पतरसा लै इहअ, “तलबार कर दूर! हुंह सका आपणैं बाब परमेशरा का अरज़ करी कि स्वर्दूते एक सैना छ़ाड, पर मुंह आसा मेरै बाबो हुकम पूरअ करना लै।” ईशू च़कअ सह काटअ द कान धरना का उझै संघा लाअ तेऊ नोकरे तैहा ई ज़ैगा और सह हुअ ज़ात राम्बल़अ। ईशूए च़ेल्लै ठुहरै तिधा का सोभ।