39. ईशूओ किअ मकदमअ

ऐबै गअ त आधा राचीओ बगत हई, तिन्नैं सपाही नियं ईशू माहा परोहिते घरा लै, किल्हैकि सह च़ाहा त ईशू का सुआल पुछ़णैं। पतरस रहअ दूर ज़िहअ तिन्नां पिछ़ू-पिछ़ू हांढदअ लागी। ज़ांऊं सपाही ईशू घरा भितरा लै नियं, पतरस रहअ बागै होरी संघै आगी सेटा नैथदअ लागी।

माहा परोहिते घरा भितरी तै यहूदी मुखिऐ ईशू लै मकदमै करदै लागै दै। तिन्नैं आणैं ईशूए खलाफ झ़ुठी गल्ला बोलदै खास्सै झुठै शाजत लोल़ी। पर तिन्नें गल्ला नांईं ती एकी दुजै का मेल खांदी। इहअ करै निं यहूदी मुखिऐ ऐहा गल्ला पाक्की करी सकै कि ईशूओ दोश किज़ै आसा। ईशू रहअ तिन्नां जैंदरी च़ुप्पी खल़्हुई।

खिरी भाल़अ माहा परोहितै ईशू बाखा, संघा पुछ़अ इहअ, “हाम्हां का खोज़ ओर्ही कि तूह ज़िऊंदै परमेशरो शोहरू मसीहा आसा?”

ईशू बोलअ इहअ, “हुंह आसा, तम्हां जाणअ हुंह परमेशरा संघै बेठअ द और स्वर्गा का एछदअ बी शुझुई।” माहा परोहितै धेल़ै रोश्शै आपणैं झिकल़ै और सह लागअ ज़ोरै-ज़ोरै तिन्नां होरी मुखिऐ लै बोलदअ, “ऐहा गल्ला खोज़णा लै निं हाम्हां ऐबै होरी कोही शाजते ज़रूरत आथी कि एऊ मणछै किज़ै किअ! तम्हैं सोभी शूंणअ आपणैं कानै कि अह बोला कि अह आसा परमेशरो शोहरू, एता लै तम्हैं होर कै बोला?”

सोभी यहूदी मुखिऐ दैनअ माहा परोहिता लै ज़बाब, “अह मणछ आसा मारनै ई जोगी!” तेखअ बान्हीं तिन्नैं ईशूए आछी दी शाट्टी, संघा लागै तेऊ लै थुकदै, च़ैंडै बाहंदै और सुहांगा करदै।

पतरस त घरा बागै न्हैल़अ लागअ द कि ऐबै झ़ाणीं किज़ै हणअ होए। तेखअ आई एक दासी शोहरी तैहा हेरअ सह तिधी भाल़ी और तैहा पुछ़अ तेऊ का, “तूह बी आसा त भाल़ी ईशू संघै?” पतरस हुधुअ कि हुंह किधी आसा! बादा का पुछ़अ भिई कुंणीं शोहरी इहअ ई और पतरस हुधुअ भिई कि हुंह निं आथी ताह गई बछ़ैणां। खिरी बोलअ चिउथी बारी तिधी होरी लोगै, “हाम्हैं हेरअ तूह बछ़ैणीं कि तूह थिअ ईशू संघै, किल्हैकि तम्हैं दुहै आसा गलील लाक्कै का।”

पतरस हुधुअ ज़ात पठी संघा लागअ इहअ बोलदअ, “मंऐं खाऐ सोह, ज़ै हुंह एऊ मणछा बछ़ैणां बी होए, मुल्है लोल़ी परमेशरो फिटक लागअ!” पतरसे इहै सोहा काढणैं बाद गअ तिधी नढैऊऐ मुर्गअ बाशी। ईशू भाल़अ पिछ़ू फिरी करै पतरसा बाखा।

पतरस लागअ तिधा का हांढदअ संघा लागअ हिक्की-सल़िक्की लेरा लांदअ। ज़ुंणीं यहूदा ईशू ढाकणैं बझ़ैल़अ त, तेऊ का बी गअ थोघ लागी कि यहूदी मुखिऐ दैनीं ईशू लै मौते सज़ा; तेऊ हुअ खास्सअ दुख और तेऊ दैनीं आप्पू लै फांसी संघा मूंअं।

तधू काला त सारै दी रोमीं राज़ और तेऊ देशै त पीलातूस रोम राज़ैओ राजपाल। यहूदी मुखिऐ नियं ईशू तेऊ सेटा लै। तिंयां च़ाहा तै इहअ कि पिलातुसै लोल़ी तेऊ लै मौते सज़ा दैनीं और तेऊ मारे। पिलातुसै पुछ़अ ईशू का, “तूह यहूदीओ राज़अ आसा?”

ईशू दैनअ इहअ ज़बाब, “तंऐं बोलअ ठीक, पर मेरअ राज़ निं पृथूईओ आथी, ज़ै इहअ हंदअ तै करनअ त मेरी सेऊआ-च़ाकरी करनै आल़ै मेरी तैणीं जुध। हुंह आसा धरती दी परमेशरे बारै शुची गल्ला खोज़दअ आअ द। ज़ुंण बी मणछ शुची झ़ुरी डाहा सह शुंणां मेरी।” पिलातुसै बोलअ, “शुचअ किज़ै आसा?”

पिलातुसे खोल़ै तै बागै यहूदी मुखिऐ आपणैं पक्षे खास्सै लोग झाल़ै दै, ईशू संघै गल्ला करनै का बाद बोलअ पिलातुसै उपर च़ाऊल़ी खल़्हुई तिन्नां लोगा लै, “मारनै जोगी सज़ा दैणां लै निस्सअ मुखा एऊ मणछा दी किछ़ै दोश शुझुई।” पर तिंयां यहूदी मुखिऐ और तिंयां होर लोग लागै ज़ोरै-ज़ोरै लैल़ा पाई इहअ बोलदै, “एऊ पाआ क्रुसा दी मारी!” पिलातुसै दैनअ तिन्नां लै इहअ ज़बाब, “एऊ लै निं किछ़ी गलतीओ दोश आथी।” पर तिंयां लागै होर बी ज़ोरै-ज़ोरै लैल़ा लांदै। पिलातुसै बोलअ चिऊथी बारी भिई, “एऊओ निं किछ़ै दोश आथी।”

पिलातुसा पल़अ फिकर कि किधी इहअ निं हआ कि ईंयां एतरै खास्सै लोग उपद्रभ शुरू करा, तेखअ पल़अ तेऊ तिन्नें गल्ल मनणीं। रोमीं सपाही च़िकअ सह रोमीं बधाने साबै कोल़ै करै, तेऊ का बन्हैऊंऐं राज़ै ज़िहै झिकल़ै और मुंडै लाअ झ़रीलै कांडैओ मुगट। तेखअ लागै तिंयां इहअ बोली करै तेऊए सुहांगा करदै, “भाल़ा, यहूदीओ राज़अ!”