40. ईशू छ़ड़ाऊअ क्रूसा प्रैंदै

ईशूओ सुहांग बणांणै बाद नियं ईशू तिन्नैं सपाही क्रूसा दी छ़ड़ाऊणां लै। सह क्रूस दैनअ तिन्नैं ईशूए ई कान्हां च़कणां लै ज़ेथ सह मारनअ त।

ईशू पजैल़अ तिन्नैं तैहा ज़ैगा ज़ेता नांअं “खोपल़ी” आसा त, तिधी टोक्कै तिन्नैं तेऊए हाथ खूर मोई ज़िहै काठा दी ज़ेता लै क्रूस बोला। पर ईशू बोलअ तज़ी बी इहअ, “हे बाबा, तूह कर इना माफ, किल्हैकि इना का निं थोघै कि ईंयां किज़ै करा।” तेऊए मुंडा प्रैंदै टोक्की तिन्नैं क्रूसे च़ुंडी एक फल़्हटी, तेथ त तेऊओ दोश लिखअ द, :यहूदीओ राज़अ!” पिलातुसै त तिन्नां लै इहअ ई लिखणेंओ हुकम किअ द।

तिन्नैं सपाही पाई ईशूए झिकल़ै लै च़िठी, इहअ करै हुई तिंयां गल्ला पूरी ज़ुंण खास्सी साला आजी गल्ला प्रगट ती हुई दी, “तिन्नैं बांडै मेरै झिकल़ै आप्पू मांझ़ै, और मेरै झिकल़ै लै पाई तिन्नैं परच़ी।”

तिधी तै दूई डाकू बी, और तिंयां बी छ़ड़ाऊऐ ईशू ई संघै दैहणीं बाऊंईं बाखा क्रूसा दी। तिन्नां मांझ़ै किअ एकी डाकू ईशूओ सुहांग, पर दुजै बोलअ तेऊ डाकू लै इहअ, “ता डअर बी निं आथी कि परमेशरा दैणीं ताल्है सज़अ? हाम्हैं किऐ बूरै काम तै भेटी हाम्हां सज़ा, पर एऊओ निं किछ़ै कशूर आथी!” तेखअ लागअ सह ईशू लै बोलदअ, “ज़ेभै तेरअ राज़ एछे, तेभै डाहै तूह मुंह बी आद।” ईशू बोलअ तेऊ लै इहअ, “तूह हणअ आझ़ ई मुंह संघै स्वर्ग लोकै।”

यहूदी मुखिऐ और तिन्नां खास्सै लोगा मांझ़ै बी लागै कई ईशूए सुहांगा करदै, “ज़ै तूह परमेशरो शोहरू आसा, तै होथ क्रूसा का धरनीं संघा बच़ हैनूं आप्पू! तै करमै हाम्हैं ताह दी विश्वास।”

हेरा हेरी हुअ सारी पृथूई दी न्हैरअ, तेभै त खरअ दपहर पर चिई घांटै रहअ तिहअ ई न्हैरा-घोर हई।

तेखअ बोलअ ईशू, “ऐबै हुअ पूरअ! हे बाबा, मंऐं दैनीं ऐबै आपणीं आत्मां तेरै हाथै।” तेखअ ढोल़ी ईशू आपणीं मुंडकी संघा शोटै प्राण। जांऊं ईशू मुअं, सारी धरती दी हुई ज़ाज़री। परमेशरे मांदरै ज़ुंण बडअ पल्द ज़ुंन पबित्र ज़ैगा और खास पबित्र ज़ैगा खल़बाल़ा ज़िहअ थिअ, सह धेल़्हुअ मांझ़ा-मांझ़ी का उपरा उंधै तोल़ तैणीं दूई बाखा लै।

आपणीं मौता करै खोल्ही ईशू आम लोगा लै परमेशरा सेटा डेऊंणे बात। तिधी ज़ुंण रोमीं सपाही पहरी थिऐ, तिन्नैं बोलअ इना सोभी गल्ला भाल़ी इहअ, “अह मणछ त सच्च़ी नर्दोश, अह आसा परमेशरो शोहरू।”

तेखअ आऐ युसुफ और निकुदेमस नांओंए दूई यहूदी मुखिऐ, तिंयां करा तै इहअ विश्वास कि ईशू आसा मसीहा। तिन्नैं किई पिलातुसा का ईशूए ल्हासे मांग। तिन्नैं पल़ेटी ईशूए ल्हास कापल़ै दी, संघा डाहअ सह शाफल़ा दी कोती दी नंऊंई घोरी भितरी दाबी और तेते मोहरै दी डाही एक बडी टोल्ह घरैऊई।