41. परमेशरै किअ ईशू भिई ज़िऊंदअ!

ज़ांऊं रोमीं सपाही ईशू क्रूसा दी छ़ड़ाऊई हेरअ, यहूदी मुखिऐ डेऊऐ राजपाल पिलातुसा सेटा लै संघा लागै इहअ बोलदै, “तेऊ झ़ुठै ईशू बोलअ त इहअ कि सह हणअ चिऐ धैल़ै मुंऐं दै मांझ़ा का भिई ज़िऊंदअ। एता लै लागणअ घोरी बागै सपाही डाही पहरअ पाणअ, इहअ निं हआ कि तेऊए च़ेल्लै तेऊए देही च़ोरी पाए। इहअ करै सका तिंयां इहअ बोली कि सह हुअ मरी करै भिई ज़िऊंदअ।”

राजपाल पिलातुसै किअ हुकम, “तम्हैं निंयां धख सपाही, तेखअ ज़िहअ तम्हैं च़ाहा, तम्हैं डाहा तिहअ पहरअ पाई।” तेता लै डाही तिन्नैं घोरीए मोहरै दी डाही दी टोल्हा दी रोमीं सरकारे मोहर लाई। ल्हास च़ोरी निं होए तेता लै डाहै तिन्नैं सरकारी सपाही पहरी लाई।

ईशूए मरने धैल़ी बाद आसा त शणिहचर बार ज़ेता लै बशैघे धैल़ी बोला। बशैघे धैल़ी मना तै सोभै पबित्र और तैहा धैल़ी निं कोहै किछ़ै काम करदै तै। तैही निं तैहा धैल़ी कोहै घोरी सेटा डेऊअ ई आथी। पर बशैघे धैल़ी बाद डेऊई दोत्ती-दोथ्ही कई ज़नाना घोरी सेटा, ताकि तिंयं यहूदी रबाज़े साबै ईशूए ल्हासा दी खुशबूदार मसालै मल़ी सके।

तिन्नां जनाने तिधी पुजणैं का आजी हुई तैहा घोरी दी बड़ी ज़ाज़री, स्वर्गा का आअ एक स्वर्ग दूत और तेऊ बदल़ी सह टोल्ह पोर्ही संघा बेठअ तेथ प्रैंदै। अह स्वर्ग दूत त धुप्पे झ़ामणां ज़िहअ च़मच़मांदअ। तिधी ज़ुंण रोमीं सपाही तै; तिन्नैं बी भाल़अ सह और तिंयां हुऐ धरनीं पल़ी मूंऐं नां ज़िऊंदै मणछा ज़िहै।

ज़ांऊं तिंयां जनाना घोरी सेटा पुजी; स्वर्ग दूतै बोलअ तिन्नां लै इहअ, “डरा निं आथी, ईशू निं इधी आथी, सह हुअ मरी करै भिई ज़िऊंदअ, ज़िहअ तेऊ बोलअ द थिअ कि सह हणअ भिई ज़िऊंदअ! तम्हैं भाल़ा घोरी भितरी आप्पै।” तिंयां डेऊई घोरी भितरा लै संघा लागी तेसी सारै दी भाल़ी ज़िधी ईशूए ल्हास ती डाही दी और तिन्नां निं सह तिधी भेटी!

तेखअ बोलअ तेऊ स्वर्ग दूतै तिन्नां लै, “एऊ समादा खोज़ा तेऊए च़ेल्लै का, ‘ईशू हुअ मरी करै भिई ज़िऊंदअ और सह डेऊंणअ तम्हां का आजू-आजू गलील लाक्कै लै।’”

तिंयां जनाना हुई रहैन और तिंयां ठुर्ही खुशी-खुशी एऊ खुशीए समादा खोज़दी ईशूए च़ेल्लै सेटा लै।

तिंयां पुजी ती बाता तैणीं कि ईशू हुअ तिन्नां सेटा प्रगट, तिन्नैं टेक्कअ तेऊ सेटा माथअ और ईशू बोलअ तिन्नां लै, “डरा निं आथी, मेरै च़ेल्लै लै बोला इहअ कि गलील लाक्कै लै लोल़ी आऐ हुंह भेटणअ तम्हां तिधी।”