42. ईशू डेऊअ च़ेल्लै सम्हनै स्वर्गा लै फिरी

ज़हा धैल़ी परमेशरै ईशू मूंऐं दै मांझ़ा का ज़िऊंदअ किअ त, तेऊए दूई च़ेल्लै तै किधी नेल़ गराऊंआं लै लागै दै डेऊंदै। हांढदी-हांढदी तै तिंयां तिन्नां गल्ला लागै दै कि ईशू संघै किहअ किहअ हुअ। तिंयां तै तेऊए बारै गल्ला लागै दै, तिन्नां ती आशा कि सह आसा त मसीहा, पर सह पाअ मारी! ऐबै बोला कोऐ जनाना इहअ कि सह हुअ भिई ज़िऊंदअ। तिन्नां निस्सी ती समझ़ पल़ी कि कसरी गल्ला दी करमै विश्वास।

ईशू रहअ तिन्नां संघा-संघा हांढदअ लागी, पर तिन्नैं निं सह बछ़ैणअ आथी। सह लागअ तिन्नां का पुछ़दअ कि तम्हैं किज़ू गल्ला आसा लागै दै, तिन्नैं खोज़ी तेऊ का ईशू संघै हुई बिती दी सारी गल्ला। तिन्नें सोठअ इहअ कि अह आसा तिन्नां संघै कुंण परदेसी मणछ लागअ द हांढदअ ज़हा का इहअ थोघ निं आथी कि येरूशलेम किज़ै हुअ।

तेखअ समझ़ाऊऐ ईशू तिंयां कि पबित्र शात्रा दी परमेशर ईशूए बारै किज़ै बोला। खास्सी साला आजी हेरअ त बिधाते गूरै इहअ खोज़ी कि मसीहा लै दैणअ तिन्नां दुख संघा पाणअ मारी। पर तिन्नैं गूरै त इहअ बी बोलअ द कि सह हणअ चिऐ धैल़ै भिई ज़िऊंदअ।

ज़िधा लै तिंयां च़ेल्लै च़ाल्लै दै थिऐ; ज़ांऊं तिंयां तेऊ गराऊंआं पुजै, तेखअ ग्ई ती सान्ह च़ाल्ली पल़ी। तिन्नैं बोलअ परदेसी समझ़ी करै ईशू लै इहअ कि तूह दै हाम्हां संघै ई रहणैं, ईशू डेऊअ तिन्नां संघै एकी घरै और तेखअ बेठै तिंयां बैल़ी खांदै। ईशू च़की एक रोटी संघा कि परमेशरो शूकर संघा दैनी चोल़ी करै तिन्नां लै। तेखअ आई हेरा-हेरी तिन्नां समझ़ कि अह ता ईशू आसा त। पर सह हुअ तेभी तिन्नें आछी हेरदी-हेरदी लोप।

तिंयां दुहै लागै आप्पू मांझ़ै इहअ बोलदै, “अह त ईशू! ज़ांऊं सह परमेशरे बैणा खोज़दअ त लागअ द, तैही तै हाम्हैं भितरा का खुश लागै दै हंदै!” तिंयां लागै तेभी बापस येरूशलेम नगरी लै हांढदै। तिधी पुजी खोज़ी तिन्नैं होरी च़ेल्लै का पठी गल्ला, “ईशू आसा ज़िऊंदअ, हाम्हैं भाल़अ सह आपणीं आछी!”

च़ेल्लै तै इना गल्ला करदै लागै दै, ईशू हुअ नच़ानक तैहा पांडा प्रगट ज़िधी तिंयां थिऐ। तेऊ बोलअ तिन्नां लै, “तम्हां लै लोल़ी शांती हुई।” च़ेल्लै सोठअ इहअ कि अह आसा हणअ भूत, पर ईशू बोलअ तिन्नां लै इहअ, “तम्हैं किज़ू डरै? तम्हैं इहअ किल्है निं सोठदै कि हुंह आसा असली दी ईशू? मेरै हाथा खूरा दैआ भाल़णीं। भूते निं एही देही हंदी ज़ेही मुखा आसा।” ऐहा गल्ला रहैऊणां लै कि सह निं भूत आथी, तेऊ मांगअ तिन्नां का किज़ै खाणां लै, तिन्नैं दैनी तेऊ लै रोटी खाणां लै और ईशू खाई सह।

ईशू बोलअ इहअ, “मेरै बारै पबित्र शास्त्रा दी ज़िहअ लिखअ द आसा कि इहअ हणअ, सह हेरअ त मंऐं तम्हां का खोज़ी डाही कि इहअ हणअ ज़रूर।” तेखअ समझ़ाऊई ईशू तिन्नां का पबित्र शास्त्रे सारी गल्ला राम्बल़ै करै। तेऊ बोलअ इहअ, “खास्सी साला आजी लिखअ त परमेशरे गूरै कि मुंह मसीहा लागणअ दुख ज़िरनअ, मरनअ और तेखअ चिऐ धैल़ै मुंऐं दै मांझ़ा का ज़िऊंदै हणअ।”

“तिन्नैं गूरै त इहअ बी लिखअ द कि मेरै च़ेल्लै खोज़णै परमेशरे बैण सोभी का। तिन्नां बोल़णअ सोभी लै कि पापो प्राश्त करा। ज़ै लोग तिहअ करे तै करनै परमेशरा तिन्नें पाप माफ। मेरै च़ेल्लै करनअ अह समाद खोज़णअ येरूशलेम नगरी का शुरू और तिन्नां डेऊंणअ हर ज़ैगा सोभी ज़ाती सेटा। तम्हैं आसा मेरी हर गल्ले, हर कामे शाजत ज़ुंण मंऐं बोलअ और किअ। ज़ुंण मुंह संघै हुअ; तेते बी आसा तम्हैं आपणीं आछी भाल़णैं आल़ै शाजत।

च़ाल़्ही धैल़ै तैणीं रहअ ईशू आपणैं च़ेल्लै का कई ज़ैगा प्रगट हंदा लागी। एकी ज़ैगा तै तिंयां पांज़ शौ ज़ण्हैं कठा हुऐ दै और तिधी बी आअ ईशू तिन्नां जैंदरी! ईशू रहैऊअ आपणैं च़ेल्लै का इहअ कि सह आसा ज़िऊंदअ संघा रहअ तिन्नां लै परमेशरे राज़े बारै गल्ला खोज़दअ लागी।

ईशू बोलअ तिन्नां लै इहअ, “परमेशरै दैनअ मुल्है स्वर्ग और पृथूई दी सारै दी राज़। ऐबै बोला हुंह तम्हां लै इहअ, तम्हैं बणांआं सोभी ज़ातीए लोगा मेरै च़ेल्लै, एता लै दैऐ तिन्नां लै बाब, शोहरू और पबित्र आत्में नाओंऐं डुबकी। ज़ुंण बी मंऐं तम्हां लै हुकम किऐ; तेते शिक्षा बी दैऐ तिन्नां लै कि तिंयां बी मनै एता इहअ ई। ऐहा गल्ला डाहै आद कि हुंह रहणअ सदा तम्हां संघै।

मूंऐं दै मांझ़ा का ज़िऊंदै हणें च़ाल़्ही धैल़ै बाद बोलअ ईशू आपणैं च़ेल्लै का, “ज़ेभै तैणीं मेरअ बाब तम्हां लै बल निं दैए, तेभै तैणीं रहै येरूशलेम नगरी न्हैल़ै लागी। ज़ेभै इहअ हणअ; तेभै एछणीं तम्हां लै पबित्र आत्मां।” तेखअ डेऊअ ईशू स्वर्गा लै और एक बादल़ आअ इहअ कि तेऊ च़ोरअ ईशू तिन्नें आछी समन्हैं का। सोभी गल्ला प्रैंदै राज़ करना लै बेठअ ईशू स्वर्गै परमेशरे दैहणीं बाखा।