43. मसीही टोलीए शुरूआत

ईशूए स्वर्गा लै फिरी डेऊंणैं का बाद रहै सोभै च़ेल्लै येरूशलेम न्हैल़ै लागी ज़िहअ ईशू तिन्नां लै हुकम किअ त। तिंयां सोभै ईशू दी विश्वास करनै आल़ै रहै कबल्लै प्राथणां करदै कठा हंदै लागी।

हर साल मनाऊंआं तै यहूदी ओवार्णें थैरा का का बाद पज़ाहुऐ धैल़ैओ एक खास थैर। अह हआ त तेभै; ज़ेभै यहूदी कणके लऊंणीं करी मुक्का दै। सारै संसारा का आसा तै यहूदी एऊ थैरा मनाऊंदै येरूशलेम नगरी आऐ दै। ईशूए स्वर्गा लै डेऊंणैं का बाद आठुऐ धैल़ै गअ त ऐहा साला अह थैर एछी।

ईशू दी विश्वास करनै आल़ै तै सोभै एकी ज़ैगा कठा हुऐ दै। ज़हा घरै तिंयां थिऐ, तेथ हुई नच़ानक ढिश बागरी ज़ेही छ़ेल़। कई विश्वासीए मुंडा प्रैंदै शुझुअ कि तेथ आऐ आगीए लुपल़ै ज़िहै। तिंयां सोभै भर्हुऐ पबित्र आत्मां करै। तिंयां लागै होरी-होरी बोली परमेशरे स्तोती और ज़ै-ज़ैकार करदै। तिंयां ती एही बोली ज़ेता बोल़णां लै तिंयां पबित्र आत्मां तिन्नां लै बल दैनअ।

ज़ांऊं तेऊ घरा ओर्ही-पोर्ही येरूशलेम नगरी रहणैं आल़ै होरी लोगै हाल्लअ शूंणअ, तिधी झाल़ुऐ खास्सै लोग कि एथ किज़ै हुअ। विश्वासी तै लागै दै परमेशरे महान कामें बारै खोज़दै। तिधी हुअ खास्सै लोगो झाल़अ और तिंयां हुऐ रहैन किल्हैकि तिंयां ज़ुदी-ज़ुदी बोली-भाषा का लोग और तिन्नां मांझ़ै हरेकी का ज़ाण्हिंआं त इहअ कि तिंयां च़ेल्लै आसा तिन्नें ई बोली दी गल्ला करदै लागै दै!

तिन्नां लोगा मांझ़ै लागै कई लोग इहअ बोलदै कि इनै आसा शराब झुटी दी, पर पतरस उझ़ुअ खल़अ संघा लागअ इहअ बोलदअ, “मेरी गल्ला शूंणा! ईंयां निं नशै दी आथी! ज़ुंण तम्हैं इधी भाल़ै आसा लागै दै एते बारै आसा योएल गूरै पैहलै ई बोलअ द कि इहअ हणअ, ‘खिरीए धैल़ै पाणीं मुंह आपणीं आत्मां मणछा दी।’”

“इस्राएलीओ, ईशू थिअ हाम्हां जैंदरी, एता लै किऐ तैऊ बडै-बडै नुआहरै काम कि तेऊओ थोघ लागे कि सह कुंण आसा। तेऊ किऐ तिंयां सारै महान काम परमेशरे बला करै। तम्हां का आसा इना गल्लो थोघ किल्हैकि तम्हैं आसा तिंयां काम आपणीं आछी भाल़ै दै, पर तम्हैं पाअ सह क्रूसा दी छ़ड़ाऊई मारी।

ईशू मूंअ ता ज़रूर पर सह किअ परमेशरै चिऐ धैल़ै भिई ज़िऊंदअ। इहअ करै हुई सह गल्ल पूरी ज़ुंण खास्सी साला आजी एकी गूरै बोली ती, ‘ताह निं आपणैं पबित्र मणछा घोरी चिज़णैं दैणअ।’ ऐहा गल्ले शाजत आसा हाम्हैं कि परमेशरै किअ ईशू ज़िऊंदअ।”

“आपणीं दैहणीं बाखा बशैल़ी किअ परमेशरै ईशूओ अदर। ईशू छ़ाडी हाम्हां लै पबित्र आत्मां ज़िहअ तेऊ वाहिदअ किअ त। ज़ुंण काम तम्हैं भाल़ै और शूंणैं तिंयां आसा लागै दै पबित्र आत्मां करै हंदै।

“तम्हैं छ़ड़ाऊअ सह मणछ, ईशू क्रूसा दी! पर ऐबै शूंणा तम्हैं कान खोल्ही कि परमेशरै दैनी ईशू लै दोहरी पदबी, सोभी गल्लो मालक बी आसा सह ई और मसीहा बी आसा सह ई।”

ज़ुंण तिधी पतरसे गल्ला शुंणैं तै लागै दै, तिन्नें लागी तिंयां गल्ला दिल्लै। तैही लागै तिंयां तेखअ पतरस और होरी च़ेल्लै का पुछ़दै, “भाईओ, तै ऐबै हाम्हां किज़ै लागा करनअ?”

पतरसै दैनअ तिन्नां लै ज़बाब, “तम्हैं सोभै करा आपणैं पापा लै प्राश्त ताकि परमेशर थारै पाप माफ करे और ईशूए नाओंऐं लआ पाणीं दी डुबकी। तेऊ दैणअ तम्मां लै पबित्र आत्मों बरदान।”

पतरसे गल्ला शूंणीं किअ तैहा ई धैल़ी कोई चअन हज़ार लोगै विश्वास संघा बणैं ईशू मसीहे च़ेल्लै। तिन्नैं बी लई डुबकी संघा ज़ुल़ै येरूशलेम विश्वासी टोली संघै।

ईशू मसीहे च़ेल्लै ज़हा लै शधाणूं बी बोला; तिंयां रहै तिन्नां लै कबल्लै शिक्षा दैंदै लागी, तिंयां करा तै धैल़ एकी-दुजे संगत और एकी दुज़ै लै करा तै प्राथणां करी। मिल़ी-ज़ुल़ी करा तै तिंयां परमेशरे ज़ै-ज़ैकार और ज़ुंण बी तिन्नां का थिअ, तिंयां करा तै एकी दुजै संघै बांडी। नगरीए सोभै लोग करा तै तिन्नें बड़ैई, हर धैल़ै रहा तै तिन्नां संघै लोग ज़ुल़दै लागी।