44. पतरस और यहून्ना करा एकी भिख मांगणैं आल़ै नरोगै

एकी धैल़ै डेऊऐ पतरस और यहून्ना येरूशलेम मांदरा लै। दुही ज़ांघो लैंगल़अ मणछ सुंदर नांओंए प्रऊल़ी आजू भिख मांगदअ लागअ द।

पतरसै भाल़अ तेऊ लैंगल़ै बाखअ संघा बोलअ इहअ, “ताल्है दैणा लै मुखा ढब्बै ता निं आथी, पर ज़ुंण मंऐं ताल्है दैई लाअ; ईशूए नाओंऐं लाग हांदअ-फिरदअ!”

तेभी किअ परमेशरै सह लैंगल़अ मणछ नरोगअ और सह लागअ ओर्ही-पोर्ही हांढदअ, छ़ाहल़ा दैंदअ और परमेशरे ज़ै-ज़ैकार करदअ। मांदरे खोल़ै ज़ेतरै बी लोग आसा तै; तिंयां हुऐ तेऊ भाल़ी रहैन कि अह कै च़मत्कार हुअ।

तिधी हुऐ तेऊ मणछा भाल़ै खास्सै लोग कठा कि अह किहअ करै हुअ राम्बल़अ। पतरसै बोलअ तिन्नां लोगा लै, “एऊ मणछा नरोगै भाल़ी निं तम्हैं रहैन हआ। एऊ नरोगै करनै आल़ै निं हाम्हैं आथी, नां इहअ करै हुअ कि हाम्हैं करा परमेशरो अदर। एऊ मणछा नरोगै करनै आल़अ आसा ईशू किल्हैकि हाम्हैं करा ईशू दी विश्वास।

“तिंयां तै तम्हैं ई ज़ुंणीं रोमीं राजपाला का ईशू मारना लै बोलअ। तम्हैं पाअ सह मारी ज़ुंण सोभी लै ज़िन्दगी दैआ। पर परमेशरै किअ सह मुंऐं दै मांझ़ा का ज़िऊंदअ। तम्हैं निं इहअ इहअ बी सोठअ कि तम्हैं किज़ू करदै तै लागै दै, पर ज़ेभै तम्मैं तिन्नां कामा करदै तै लागै दै; तिंयां हुई खास्सी साला आजी बिधाते गूरै खोज़ी दी गल्ला पूरी कि मसीहा लागणअ दुख भुगतणअ और मरनअ। परमेशरै दैनअ इना गल्ला हणैं। तैही बोला हुंह ऐबै करा प्राशत संघा फिरा परमेशरा बाखा लै ताकि परमेशर थारै पाप धोई तम्हां निम्बल़ै करे।

पतरस और यहून्नें गल्ला शूंणी डरै मांदरे कार-करिंदै खास्सै। तिन्नैं ढाकै तिंयां संघा डाहै कैद खानै दी बंद करी। पर ज़ुंण गल्ला पतरसै बोली ती, तेता दी किअ कई लोगै विश्वास। ईशू दी विश्वास करनै आल़ै मणछ हुऐ तै ऐबै कोई पांज़ हज़ार।

दुजै धैल़ै नियैं पतरस और यहून्नां यहुदी मुखियै माहा परोहिता और होरी धर्म गूरू सेटा लै। सह प्रऊल़ी आज़ू भिख मांगणैं आल़अ मणछ बी नियं तिन्नैं संघा ज़ुंण दुही ज़ांघो लैंगल़अ थिअ और पतरस और यहून्ना ईशूए नाओंऐं नरोगअ किअ त। तिन्नैं पुछ़अ पतरसा का, “तम्हैं केऊ हका करै किअ अह लैंगल़अ मणछ नरोगअ?”

पतरसै दैनअ तिन्नां लै ज़बाब, “अह मणछ ज़ुंण तम्हां आजू खल़अ आसा; अह हुअ ईशूए शगती करै नरोगअ। तम्हैं पाअ ईशू क्रूसा दी छ़ड़ाऊई करै मारी पर परमेशरै किअ सह भिई ज़िऊंदअ! तम्हैं निं सह मनअ आथी पर ईशू का लाऊआ निं मोक्ष पाणां लै होर दुजी कोई बात ई आथी!”

तिंयां यहूदी मुखिऐ हुऐ रहैन और यहून्ना किई बड़ी हिम्मती संघै गल्ला। तिंयां लागै भाल़ै कि ईंयां आसा आम और नपहल़ मणछ! तेखअ फिरी तिन्नां आद कि ईंयां मणछ रहा तै ईशू संघै। तैही बोलअ तिन्नैं तिन्नां लै, “ज़ै तम्हैं तेऊ ईशू नाओंए मणछे बारै लोगा का किज़ै होर गल्ला खोज़दै लागे, तम्हां लै दैणीं हाम्हां एही सज़ा कि तम्हैं बी आद करे।” एही खास्सी गल्ला बोल़णैं बाद दैनअ तिन्नें पतरस और यहून्नां डेऊंणैं।