45. स्तिफनुस और फिलिपुस

शुरूआती मसीही मुखिऐ मांझ़ै त स्तिफनुस नांओं एक मणछ। सोभै लोग करा तै तेऊओ अदर। तेऊ ती पबित्र आत्मां करै खास्सी शगती भेटी दी। तेऊ किऐ तै खास्सै च़मत्कार ई। तेऊ दैनीं लोगा लै ईशू दी विश्वास करनें शिक्षा और खास्सै लोगै किअ तेऊए शिक्षा करै विश्वास।

एकी धैल़ै त स्तिफनुस ईशूए बारै लोगा का खोज़दअ लागअ द, ज़ुंण ईशू दी विश्वास निं करदै तै तिंयां आऐ तिधी संघा लागै तेऊ संघै हठल़दै। तिंयां हुऐ तेऊ लै रोश्शै लाल, तिंयां डेऊऐ आपणैं यहूदी धर्में मुखिऐ सेटा संघा डाहै तिंयां स्तिफनुसे बारै झ़ुठी खोज़ी शगरेऊई। तिन्नैं बोलअ इहअ, “हाम्हैं शूंणअ स्तिफनुस मूसा और परमेशरे बारै बृथा गल्ला करदअ!” तेता पिछ़ू किअ तिन्नें स्तिफनुस कैद, संघा नियं सह माहा परोहित और होरी यहूदी मुखिऐ सेटा लै। संघा निंऐं तिन्नैं इहअ मणछ बी ज़ुंणी स्तिफनुसे बारै झ़ुठी शाजत दैनी।

माहा परोहितै पुछ़अ स्तिफनुसा का, “ज़ुंण ईंयां लोग बोलदै आसा लागै दै, ईंयां गल्ला शुची आसा?” स्तिफनुसे दैनअ खास्सी गल्ला खोज़ी माहा परोहिता लै ज़बाब। तेऊ खोज़अ इहअ कि आबरामे ज़मानै ओर्ही ईशूए जमानै तैणीं किऐ परमेशरै इस्राएला लै खास्सै नुआहरै काम, पर लोगै दैनअ हर बगत परमेशरा लै धोखअ ई। होर बोलअ स्तिफनुसै इहअ, “तम्हैं आसा परमेशरा लै धोखै दैणैं आल़ै और हठू। तम्हैं निं किधी पबित्र आत्मां मनी, ज़िहअ पराणैं ज़मानै म्हारै बाब-दादै किअ त और हर बारी पाआ तै तिंयां बिधाते गूरा मारी, पर तम्हैं निखल़ै बूरै करना लै तिन्नां का च़ार गंईं आजू! तम्हैं पाअ मसीहा ई मारी!”

स्तिफनुसे गल्ला शूंणीं हुऐ यहूदी धर्म गूरू और मुखिऐ रोश्शै लाल पिंऊंल़ै। तिन्नैं पाई आपणैं कानै गुंठी संघा लागै ज़ोरै-ज़ोरै लैल़ा लांदै, तिन्नैं नियं स्तिफनुस घिशी करै नगरी बागै कि तेऊ तिंयां पात्थरो ढो दैई करै मारे।

तिन्नैं सोभी दैनअ स्तिफनुसा लै पात्थरो ढो, ज़ांऊं तेऊ प्राण निखल़ी च़ाल्लै तै तेऊ बोलअ सरगा बाखा भाल़ी करै, “हे ईशू, मेरी आत्मां ढाक!” सह बेठअ ज़ान्हूंए बलै धरनीं संघा बोलअ इहअ, “हे प्रभू, एऊ पापा निं इना प्रैंदै पाई।” संघा शोटै तेऊ प्राण।

तधू लागै येरूशलेम नगरी रहैणैं खास्सै लोग ईशू दी विश्वास करनै आल़ै हंतदै और उपद्रभ करदै और तैही ठुहरै कई विश्वासी येरूशलेम नगरी छ़ाडी होर्ता-होर्ता लै। पर ज़िधी बी तिंयां डेऊऐ; तिंयां रहै तिधी ईशूए बारै सोभी का खोज़दै लागी।

एक त फिलिपुस नांओं विश्वासी, ज़िहअ होरी विश्वासी किअ, सह बी ठुहरअ येरूशलेम नगरी छ़ाडी सामरी लाक्कै लै। तिधी रहअ सह लोगा का ईशूए बारै खोज़दअ लागी। खास्सै लोगै किअ तेऊए गल्ला दी विश्वास और तिन्नां भेटअ उद्धार। एकी धैल़ै हुअ इहअ कि फिलिपुसा सेटा आअ परमेशरो एक स्वर्ग दूत और तेऊ बोलअ फिलिपुसा लै कि तूह डेऊ फलाणीं बाता रेगीस्ताना बाखा लै। फिलिपुसै किअ तिहअ ई संघा डेऊअ तैहा बाता लै, सह त हांदअ लागअ द कि तेऊ का शुझुअ एक मणछ रथा दी डेऊंदअ। सह त कूश देशो बज़ीर। पबित्र आत्मां खोज़अ फिलिपुसा का इहअ कि एऊ मणछा संघा-संघा लाग हांढदअ।

फिलिपुस रहअ तेऊ रथा संघै ठुर्हदअ लागी, तेऊ शूंणअ कि सह रथा दी बेठअ द मणछ आसा पबित्र शास्त्रा पहल़दअ लागअ द। सह त याशायाह गूरै बोली दी गल्ले बारै पहल़दअ लागअ द, “तिन्नैं नियं सह डिलण करने भेडा ज़िहअ मिंम्मूं शांत रहा, तिहअ ई निं तेऊ बी किछ़ै बोलअ। तिन्नैं किअ तेऊ संघै बूरअ बभार, नां तेऊओ अदर किअ, तिन्नैं पाअ सह मारी ई।”

फिलिपुसै पुछ़अ तेऊ कूश देशे मणछा का, “तूह ज़ेता पहल़दअ आसा लागअ द, तेता तूह समझ़ा बी?” तेऊ दैनअ ज़बाब, “समझ़ निस्सी मुंह पल़ी, ज़ेभै तैणीं कुंण समझ़ाऊए निं तेभै तैणीं किधी च़ाल्ली मुंह समझ़ पल़ी, तूह बेश मूंह संघै रथा दी संघा समझ़ाऊ मुखा कि याशायाह अह गल्ल आपणैं बारै बोला कि कहा होरीए बारै?”

फिलिपुस उखल़अ रथा दी संघा बेठअ तेऊ संघै। तेखअ खोज़अ तेऊ कूश देशे बज़ीरा का इहअ कि अह आसा याशायाह गूरै ईशूए बारै लिखअ द। होर बी समझ़ाऊई फिलिपुसै तेऊ का पबित्र शास्त्रे खास्सी गल्ला। इहअ करै खोज़अ फिलिपुसै तेऊ कूश देशे बज़ीरा का खुशीओ समाद।

तेखअ पुजै तिंयां दुहै ज़ण्हैं किधी पाणीं नेल़, तिधी बोलअ तेऊ बज़ीरै, भाल़! इधी आसा पाणीं, ऐबै कुंण सका मुंह आपणैं पापे प्राश्त करना पाणीं दी डुबकी लणैं का रोक्की।” तेऊ बोलअ सारथी लै रथ खरैल़णा लै।

तिंयां डेऊऐ पाणींए आल़ी दी और फिलिपुसै दैनीं तेऊ कूश देशे बज़ीरा लै पाणीं दी डुबकी। ज़ांऊं तिंयां तिधा का बागै आऐ, पबित्र आत्मां च़कअ फिलिपुस तिधा का संघा पज़ैल़अ किधी होर्ती ज़ैगा। तिधी रहअ फिलिपुस लोगा का ईशूए बारै खोज़दअ लागी।

सह कूश देशो बज़ीर लागअ तिधा का खुशी-खुशी आजू हांढदअ कि तेऊ का आसा त ऐबै ईशूए बारै थोघ।