46. स्तिफनुसा मारनै आल़ैओ साथी शाऊल बणअ विश्वासी।

एक त शाऊल नाओं मणछ सह बी निं ईशू दी विश्वास करदअ त। सह बी त तिन्नों साथी ज़ुंणी स्तिफनुस मारअ त, तेऊ सेटा तै तिन्नैं स्तिफनुसे झिकल़ै सभाल़ै दै, बादा का होरी विश्वासी लै उफद्रभ करनै आल़अ बी आसा त सह सोभी का आजू। तेऊ ढाकै तै येरूशलेम नगरी घरै-घरै डेऊई विश्वासी कै मर्ध कै बेटल़ी; संघा डाहै तै कैद खानै दी पाई। तेखअ छ़ाडअ माहा परोहितै शाऊल दमिश्क नगरी लै कि तिधे विश्वासी आणैं कैद करी करै बापस येरुशलेम नगरी लै।

शाऊल डेऊअ आपणैं आदमीं संघै दमिश्क नगरी लै। दमिश्क नगरी पजणैं का आजी हुअ तेऊ लै इहअ कि तेऊ का शुझुअ सरगै धैल़ी दपहरै एक इहअ च़मच़मांदअ प्रैशअ कि सह बधल़ुअ धरनीं। तेऊ का शुंण्हुंअ कुंण इहअ बोलदअ, “शाऊलआ, शाऊलआ! तूह किल्है आसा मुंह हंतदअ लागअ द?” शाऊल बोलअ, “प्रभू, तूह कुंण आसा?” तेऊ दैनअ ज़बाब, “हुंह आसा ईशू ज़हा हंतदअ तूह आसा लागअ द!”

शाऊल उझ़ुअ खल़अ और सह सह हुअ आछीओ काणअ और तेऊ का निस्सअ किछ़ै शुझुई। तेऊए साथी नियं सह दमिश्क नगरी लै। शाऊलै निं चिई धैल़ै तैणीं किछ़ै खाअ खाअ-पिअ आथी।

दमिश्क हनन्याह नाओं एक ईशूओ च़ेल्लअ, तेऊ लै बोलअ परमेशरै इहअ, “तूह डेऊ तेऊ घरा लै ज़िधी शाऊल आसा, तेऊए मुंडा प्रैंदै डाहै आपणअ हाथ ताकि तेऊए आछी का भिई शुझदअ लागे।” पर हनन्याह बोलअ इहअ, “हे प्रभू, पर मंऐं शूंणअ दा तेऊए बारै कि तेऊ आणै विश्वासी हंती-हंती मारी!” परमेशरै दैनअ तेऊ लै ज़बाब, “तूह डेऊ, मंऐं छ़ांटअ सह ई कि सह यहूदी और होरी ज़ाती सेटा डेऊई मेरै नांओंआ खोज़े। तेऊ भुगतणअ आजू मेरै नांओंआ पिछ़ू खास्सअ दुख।”

खिरी डेऊअ हनन्याह शाऊला सेटा, तेऊए मुंडै हाथ लाई करै बोलअ इहअ, “ईशू छ़ाडअ हुंह ताह सेटा लै ज़ुंण इधी पुजणैं का आजी बाता ताल्है प्रगट हुअ त, सह च़ाहा इहअ कि तेरी आछी का लोल़ी भिई शुझदअ लागअ और ताह दी लोल़ी पबित्र आत्मां बस्सी।” शाऊला का लागअ तेभी शुझदअ, तेखअ दैनी हनन्याह तेऊ लै पापे प्राश्त करना लै पाणीं दी डुबकी। तेखअ खाई शाऊलै रोटी और तैबै जाई फिरै तेऊ तराण।

तधा पोर्ही लागअ शाऊल दमिश्क नगरी रहणै आल़ै यहूदी का परमेशरे बारै खोज़दअ। तेऊ खोज़अ इहअ, “ईशू आसा परमेशरो शोहरू!” यहूदी लोग हुऐ रहैन किल्हैकि शाऊल ता विश्वासी मणछा मारदअ फिरा त, पर ऐबै किअ त तेऊ बी ईशू दी विश्वास। शाऊल रहअ यहूदी संघै हठल़दअ लागी और तेऊ खोज़अ तिन्नां का इहअ कि ईशू ई आसा त मसीहा।

खास्सै धैल़ै बाद किअ यहूदी इहअ एक्कअ कि शाऊल पाणअ किहअ करै मारी। तिन्नैं छ़ाडै तेऊ मारदै नगरीए प्रऊल़ी सेटा आपणैं आदमीं कि तेऊ रहै भाल़ै लागी कि सह नगरी बागै नां डेओए। पर शाऊला का गअ तिन्नें ऐहा गल्लो थोघ लागी और तेऊए साथी किई तिधा का बच़ी निखल़णे तेऊए मज़त। एकी राची पाअ तिन्नैं सह किरलै भितरी संघा छ़ड़ाऊअ नगरीए उछ़टी दुआली बाती उंधै। दमिश्क नगरी का बच़ी करै रहअ शाऊल ईशूए बारै गल्ला खोज़दअ लागी।

शाऊल डेऊअ होरी शधाणूं सेटा मिलदअ येरूशलेम नगरी लै, पर तिंयां डरा तै तेऊ का। तेखअ डेऊअ बरनबास नांओं विश्वसी शाऊला संघा लई शधाणूं सेटा लै। तेऊ खोज़ी तिन्नां का सारी गल्ला कि शाऊलै दमिश्क नगरी मसीहो किहअ प्रच़ार किअ। तेखअ मनअ शधाणूं शाऊल कि सह बी आसा तिन्नां संघै।

येरूशलेम नगरी विश्वासी लै उपद्रभ हणैं का बाद ज़ांऊं विश्वसी ओर्ही पोर्ही होर्ती नगरी लै छिंघुऐ, तिन्नां मांझ़ै डेऊए कोऐ विश्वासी उत्तर दिशा बाखा अन्ताकिआ नगरी लै संघा रहै तिधी ईशूए बारै लोगा का खोज़दै लागी। अंतआकिआ रहणै आल़ै लोग तै खासकर यहूदी ई, पर पैहली बारी हुअ इहअ कि खास्सै यहूदी किअ विश्वा। तेखअ डेऊऐ बरनबास और शाऊल इना यहूदी विश्वासी लै होर शिक्षा दैंदै तिधा लै और इहअ करै किई तिन्नैं तिधे विश्वसी टोली मज़बूत। अन्ताकिआ नगरी ई पल़अ ईशू दी विश्वास करनै आल़ैओ नांअं “मसीही”।

एकी धैल़ै तै अंताकिआ रहणैं आल़ै मसीही प्राथणां करदै लागै दै। पबित्र आत्मां बोलअ तिन्नां लै इहअ, “मुल्है करा बरनबास और शाऊला तेऊ कामा लै ज़ुदै ज़ेता लै मंऐं ईंयां शादै दै आसा।” तेखअ किई अंताकिआ विश्वासी टोली तिन्नां दुही लै प्राथणा और तिन्नें मुंडा प्रैंदै लाऐ हाथ और तेखअ छ़ाडै तिंयां होरी कई ज़ैगा लै ईशूए समादा खोज़दै। तिंयां दुहै रहै सोभी ज़ातीए लोगा लै शिक्षा दैंदै लागी और खास्सै लोगै किअ विश्वास।