48. ज़हा मसीहा छ़ाडणें बिधाता करार आसा ती किई दी, सह आसा ईशू।

ज़धू परमेशरै संसार बसाऊअ, तधू ती सोभै गल्ला भल्ली और पाप नांईं त किधी आथी ई। आदमीं और पैहली बेटल़ी झ़ुरा तै एकी दुजै लै खास्सै और तिंयां दुहै डाहा तै परमेशरा संघै संगत। तधू निं कोई रोग और मौत आथी ती। परमेशर बी च़ाहा त इहअ ई संसार।

राख्सै बस्सअ दानुंईं दी संघा किई तैहा बाती गल्ला, किल्हैकि सह च़ाहा त धोखअ दैणअ। तैहा बेटल़ी किअ आपणैं मर्धा तेऊ आदमींए खलाफ डेऊई पाप। तिन्नें पाप करनै पिछ़ू आई तधा ई ओर्ही मणछा लै मौत, तैही मरा धरती रहणैं आल़ै मणछ।

तेऊ पैहलै आदमीं और तेऊए बेटल़ी किअ पाप और तेता करै हुई होर बी कई बूरी गल्ला, तिंयां हुऐ तै ऐबै परमेशरा का दुशमणा ज़िहै दूऊ। तधा ओर्ही हआ हर मणछो ज़ल्म पापा ई संघै और हर मणछ हआ जल्मा का ई परमेशरे बैरी ज़िहअ। इहअ करै निं परमेशरा और मणछा मांझ़ै मेल़ ज़ोल़ आथी ई। पर परमेशर च़ाहा त मणछा संघै भिई तिहअ ई मेल़-ज़ोल़ डाहणअ ज़िहअ सोभी का पैहलै मणछा संघै थिअ।

परमेशरै डाही त इहअ सकल़्प करी कि तैहा पैहली बेटल़ीए ई आद-लुआदा का हणअ आजू एकी जुगै इहअ ज़हा तैहा दानुंईंए मतलब राख्से मुंडकी झेचणीं। परमेशरै इहअ बी बोलअ त कि दानुंईंए लुआदा दैणअ तेऊए घुंढी ढाम्ह। दुजै साबै बोले ता तेऊ पाणअ मसीहा मारी पर परमेशरा करनअ सह भिई ज़िऊंदअ। तेखअ करनी मसीहा तेऊ राख्सो बल सदा लै खतम। खास्सी साला बाद किअ ईशू इहअ प्रगट कि मसीहा आसा ईशू ई।

परमेशरै बच़ाऊऐ पाणींए प्रल़या का आपणैं तिंयां मणछ ज़हा सह संसारै आपणीं तैणीं डाहणैं आल़अ त। नूहा का बझ़ैल़अ तेऊ बडअ पाणींओं ज़हाज़ बणांणै ताकि सह तिन्नां मणछा बच़ाऊई सके ज़ुंण तेऊ दी विश्वास करा तै। सारै संसारे लोग तै मारनै ई जोगी हुऐ दै किल्है कि तिन्नैं किअ त पाप। पर परमेशरै छ़ाडअ तिन्नां सोभी बच़ाऊंणा लै ईशू एऊ संसारै ताकि ज़ुंण तेऊ दी विश्वास करे तिंयां बच़े।

खास्सी साला तैणीं रहअ इहअ रबाज़ कि परोहित करा तै बिधाता लै पशूओ बल़ीदान। सह हआ त एता लै कि लोगै किअ पाप और तेते बदल़ै किअ सह पशू बल़ीदान ताकि तिन्नां तेते सज़ा नां भेटे। पर तेऊ बल़ीदाना करै बी निं तिन्नें पाप माफ हंदै तै। ईशू आसा माहा परोहित, तेऊ किअ सह काम ज़ुंण कोहै निं करी सकदअ त। तेऊ किअ इहअ बल़ीदान ज़ेथ तेऊ आपणीं ई बल़ी दैनीं और ज़ेता करै संसारे सोभिए पाप सका माफ हई। तेऊ मनी अह गल्ल कि सारै संसारे बदल़ै भुगतणीं तेऊ एक्की सज़ा। इहअ करै हुअ ईशू महान माहा परोहित।

परमेशरै बोलअ त आबरामा लै, “मुंह दैणीं ताह करै संसारे सोभी खानदानीं लै बर्गत।” ईशू त एऊ ई आबरामें खांनदानी का। परमेशर दैआ आबरामे खानदानीं का संसारे सोभी खानदानीं लै बर्गत। किल्हैकि ज़ुंण ईशू दी विश्वास करा, परमेशर बच़ाऊआ तिन्नां सोभी पापा का। ज़ांऊं लोग ईशू दी विश्वास करा, तिंयां गण्हिंआं तेखअ आबरामे खानदानीं दी।

परमेशरै बोलअ त आबरामा लै कि आपणैं कल्ही शोहरू इसहाका कर तू तेऊ लै बल़ीदान। पर ज़ांऊं सह इहअ करनै आल़अ त, तेखअ दैनअ तिधी परमेशरै तेते बदल़ै गाभू कि सह इसहाके ज़ैगा तेऊ बल़ीदान करे। हाम्हैं सोभै तै म्हारै पापा पिछ़ू मारनै ई जोगी! परमेशरै दैनअ म्हारी ज़ैगा मरना लै ईशू बल़ीदाने रूपै। तैही बोला हाम्हैं ईशू लै परमेशरो मिम्मूं।

ज़ांऊं परमेशरै मिसर देशे लोगा लै छ़ैंहकी दस्सुई आफ़त छ़ाडी, तधू बोलअ परमेशरै इस्राएलीए सोभी टोला लै इहअ कि एक एक मिम्मू करै बल़ीदान ज़ेथ किछ़ै खोट निं होए। संघा डाहै आपणैं दुआरे मडोथरै और दुही दरिंडै तेतो लोधल़अ लाई। ज़ांऊं परमेशरे दूतै सह लोधल़अ भाल़अ, सह निखल़अ तिन्नें घरा का आजू और तिन्नें ज़ेठै शोहरू निं तेऊ मारै। ज़धू इहअ हुअ, तेता लै बोलअ परमेशरै ओवार्णैओ थैर।

ईशू आसा ओवार्णे थैरे मिम्मू ज़िहअ, तेऊ निं कधि किछ़ै पाप किअ और तेऊ दी निं एक बी गलती आथी ती। ज़धू सह बल़ीदान हुअ, तधू बी त ओवार्णैओ थैर। ज़ेभै कुंण ईशू दी विश्वास करा, तेभै दैआ ईशूओ लोहू तिन्ने पापे सांठ। सह आसा इहअ ई परमेशर निखल़ा तेऊ मणछा का आजू और तेऊ लै निं सज़ा दैंदअ।

परमेशरै ती इस्राएली लोगा संघै एक करार किई दी, किल्हैकि तिंयां लोग तै परमेशरै आपणीं खास परज़ा हणां लै छ़ांटै दै। पर ऐबै किई ती परमेशरै एही करार ज़ुंण सारै संसारे लोगा लै आसा ती। ज़ै संसारे कोही बी ज़ातीओ मणछ ऐहा नंऊंईं करारा मना, सह गण्हिंआं तेखअ परमेशरे पबित्र परज़ा संघै किल्हैकि तेऊ किअ ईशू दी विश्वास।

मूसा आसा त बिधातो गूर, ज़ुंणीं परमेशरे बारै लोगा का पूरअ ज़ोर लाई खोज़अ। पर ईशू आसा सोभी गूरा का महान गूर। सह आसा परमेशर और तैही ज़ुंण बी तेऊ बोलअ तिंयां तै परमेशरे काम और बैण। तैही आसा पबित्र शास्त्रा दी लिखअ द कि ईशू आसा परमेशरो बैण।

परमेशरै किई ती राज़ै दाबेदा संघै एही करार कि तेऊए ई खानदानीं दी हणअ आजू एक इहअ ज़हा सदा राज़ करनअ। ईशू आसा परमेशरो शोहरू मसीहा, और तेऊओ ज़ल्म हुअ राज़ै दाबेदे खानदानी का ज़ुंण ऐबै सदा लै माहाराज़अ आसा।

राज़अ दाबेद आसा त इस्राएल देशो राज़अ, पर ईशू आसा सारै संसारो राज़अ! सह एछअ स्वर्गा का भिई फिरी संघा करनअ तेऊ सदा लै नसाफ और मेल़-ज़ोल़ करी राज़।