49. परमेशरे नऊंईं करार

एकी स्वर्ग दूतै बोलअ एकी कुंआरी शोहरी मरिअमा लै कि ताह दैणअ परमेशरे शोहरू लै ज़ल्म। सह ती अज़ी कुंआरी, पर सह हुई पबित्र आत्मां करै पैरभारी। तैहा दैनअ एकी शोहरू लै ज़ल्म और तेऊ नांअ डाहअ ईशू। ईशू आसा मणछ और परमेशर दुहै।

ईशू ज़ुंण महान च़मत्कार किऐ तेता का लागा थोघ कि सह आसा परमेशर। सह हांढअ डुघै पाणींए समुंदरा प्रैंदै, बडै-ढिश बागर हआ तै तेऊए एकी बैणा बोल़णैं करै शांत। मणछा ज़िहै बी नबिज़रै रोग तै तिंयां किऐ तेऊ नरोगै। बडै का बडै भूत निखल़ा तै तेऊए डरै दूर। तेऊ किऐ मूंऐं दै मणछ बी भिई ज़िऊंदै। होछ़ी-होछ़ी दूई म्हाछ़ली और पांज़ रोटी ज़ुंण ज़ेता करै एक मणछ बी राम्बल़ै करै निं रज़दअ, तिंयां खैऊई तेऊ पांज़ हज़ारा लोगा का रज्ज़ी!

ईशू त एक महान गूरू, ज़ुंण बी तेऊ सखाऊअ, सह सखाऊअ तेऊ सिद्ध गूरू ज़िहअ। ज़िहअ सह करना लै बोला तिहअ लागा लोगा करनअ किल्हैकि सह आसा परमेशरो शोहरू। ज़िहअ कि सह बोलअ इहअ, “तम्हैं डाहा सोभी संघै एही झ़ूरी ज़िहै तम्हैं आप्पू लै झ़ूरा।”

तेऊ दैनी एही शिक्षा कि धन-माया का खास्सअ लागा मणछा परमेशरा लै झ़ुरनअ।

तेऊ खोज़अ इहअ कि संसारे बडै-बडै खज़ानै भेटणै का भलअ आसा परमेशरे राज़ा दी हणअ। परमेशरे राज़ा दी पुजणां लै आसा ज़रूरी कि परमेशर तम्हां पापा का बच़ाऊए।

ईशू आसा आप्पै खोज़अ त कि कई लोगा मनणआ सह और परमेशरा हेरनै तिंयां मणछ बच़ाऊई। पर कई निं सह मनणअ। एता लै खोज़ी तेऊ एक कथाहणी कि कोऐ मणछ आसा रज़दी-पज़दी ज़िम्मी ज़िहै ज़ुंण ईशूए बारै खुशीओ समाद मना और परमेशर बच़ाऊआ तिन्ना। पर कोऐ मणछ आसा बाते बाढै काठी ज़िम्मी ज़िहै, परमेशरो बैण पल़ा तेथ बेज़ै ज़िहअ पर तिधी निं किछ़ै पज़दअ और ईंयां निं ईशूए बारै खुशीओ समाद मंदै और तेऊए राज़ा दी डेऊंणैं का बी हटा तिंयां पिछ़ू।

ईशू दैनी एही शिक्षा कि परमेशर करा पापी मणछा लै बी झींण, सह च़ाहा तिन्नां माफ करी आपणीं लुआद बणांणअ।

ईशू आसा इहअ बी खोज़अ द कि परमेशर का पापा का नफरत। पैहलै मणछ आदमीं और तेऊए बेटल़ी किअ पाप और तिन्नें सारी आद-लुआद हुई तिन्नां पिछ़ू पापी। इहअ करै आसा संसारै रहणैं आल़अ हरेक मणछ परमेशरा का दूर और पाप हणैं पिछ़ू आसा सोभै परमेशरा लै दुशमणा ज़िहै।

पर परमेशरै किई संसारे सोभी मणछा लै एही झ़ूरी कि तेऊ दैनअ आपणअ कल्ही शोहरू संसारे पापे बदल़ै बल़ीदान हणैं ताकि ज़ुंण तेऊ दी विश्वास करे सह लोल़ी पापे सज़ा का बच़अ और तिंयां लोल़ी तेऊ संघै सदा रहै।

मणछ आसा तै मरनै ई जोगी किल्हैकि तिन्नैं किअ पाप और परमेशरे घोर सज़ा भेटणीं आसा तिन्नां लै ज़ाईज़। पर तिन्नें बदल़ै पल़अ सारअ कोप ईशू लै और तेऊ भेटी तिन्ने बदल़ै क्रूसा दी मौते सज़ा।

ईशू निं कधि किछ़ै पाप किअ, पर परेशरै दैनी तेऊ लै संसारे बदल़ै सज़ा। तेऊ निं मरना लै बी नांह किअ और संसारे सोभी मणछे पाप आपणीं कान्हां च़की किअ तेऊ आपणअ सिध्द बल़ीदान। सह हुअ परमेशरा लै आप्पू ई परमेशरा लै बल़ी दान। तैही करा परमेशर ईशू दी विश्वास करनै आल़ै मणछो घोर का घोर पाप बी माफ।

च़ाऐ मणछ ज़ेतरै बी भलै का किल्है निं करे, तेता करै निं मणछ बच़ी सकदअ, संसारे कामा करै निं मणछ परमेशरा राज़ी करी सकदै। मणछा लागणअ विश्वास करनअ कि ईशू आसा परमेशरो शोहरू और तिन्नें बदल़ै हुअ सह क्रूसा दी बल़ीदान, और परमेशरै किअ सह भिई ज़िऊंदअ। ज़ै कुंण मणछ इहअ विश्वास करे, परमेशरा करनै तिन्नें पाप माफ।

परमेशरा बच़ाउंणअ सह हरेक मणछ ज़ुंण ईशू दी विश्वास करा और आपणअ प्रभू मना। पर ज़ुंण तेऊ दी विश्वास निं करे; तिंयां निं बच़दै। एतो निं किछ़ै फरक पल़अ कि तम्हैं सेठ आसा कि गरीब, मर्ध आसा कि बेटल़ी, प्रोढै आसा कि खारकै, कि तम्हैं किधी रहा। परमेशर करा सोभी लै झ़ूरी और झींण, सह च़ाहा इहअ कि मणछ ईशू दी विश्वास करे और तेऊ संघै तिन्नों मेल़-ज़ोल़ होए।

ईशू आसा तम्हां शाददअ लागअ द, तेऊ दी करा विश्वास संघा दैआ आपणैं पापे प्राश्त करना लै पाणीं दी डुबकी। तम्हां विश्वास आसा कि ईशू आसा कल्ही परमेशरो शोहरू, और सह ई आसा मसीहा? तम्हैं ऐहा गल्ला मना कि तम्हैं आसा पापी और तेता लै आसा तम्हैं परमेशरे सज़ा जोगी? तम्हैं विश्वास करा कि ईशू हुअ थारै पापा धोणा लै क्रूसा दी बल़ीदान?

ज़ै तम्हैं ईशू दी और ज़ुंण तेऊ तम्हां लै किअ; तिन्नां गल्ला दी विश्वास करा, तै आसा तम्हैं बी मसीही! तै हुऐ तम्हैं राख्से न्हैरै राज़ा का आज़ाद। ऐबै आसा तम्हैं परमेशरे प्रैशे राज़ा दी। तेऊ हेरै तम्हैं ऐबै पाप करनै का रोक्की ज़ुंण तम्हैं आझ़ तैणीं करदी आऐ। तेऊ दैनीं तम्हां लै नऊंईं, असली ज़िन्दगी।

ज़ै तम्हैं मसीही आसा, तै हुऐ तेता करै थारै पाप माफ ज़ुंण ईशू किअ। ऐबै निं तम्हैं परमेशरा लै दुशमणा ज़िहै रहै पर ऐबै हुऐ तम्हैं तेऊए आपणैं खास साथी ज़िहै।

ज़ै तम्हैं परमेशरे साथी और प्रभू ईशूए सेऊआ करनै आल़ै आसा, तै झ़ूरनअ तम्हां तिन्ना गल्ला मनणा लै ज़ुंण ईशू तम्हां का सखाऊआ। च़ाऐ तम्हैं ऐबै मसीही बी आसा, तज़ी बी रहा राख्स तम्हां पाप करना लै पटंकदअ लागी। परमेशर करा सदा तिहअ ई ज़िहअ सह बोली हेरा और तेऊ करनअ बी। सह बोला इहअ कि ज़ै तम्हैं आपणैं पाप मने, तै हेरनै तेऊ थारै पाप माफ करी। तेऊ दैणअ तम्हां लै बल कि तम्हैं पापे खलाफ जुध ज़िती सके।

परमेशर च़ाहा इहअ कि तम्हैं तेऊ सेटा अरज़ करे और पबित्र शास्त्र पहल़े कि सह किज़ै बोला। होरी विश्वास करनै आल़ै संघै तम्हैं संगत डाहे। होरी लोगा का बी लागा तम्हां खोज़णअ कि परमेशरै तम्हां लै किज़ै किअ। ज़ै तम्हैं इना कामा करे; तै हणै तम्हैं तेऊए खास साथी।