50. ईशू एछाणअ भिई फिरी

कोई दूई हज़ार साला ओर्ही आसा संसारै हर ज़ैगा खास्सै लोग मसीहा ईशूए बारै खुशीओ समाद खोज़दै लागै दै। मसीही टोली आसा लागी दी बढदी ई। ईशू आसा ज़बान दैनीं दी कि ज़ेभै अह संसार खतम हणअ; तेभै एछणअ सह भिई फिरी। एही ता निं सह आज़ी बापस आअ आथी, पर तेऊ करनीं आपणीं ज़बान पूरी।

हाम्हैं सोभै आसा मसीहा ईशू बापस एछदै न्हैल़ै लागै दै, परमेशर च़ाहा ईहअ कि हाम्हैं पबित्र ज़िन्दगी ज़िऊए ज़ेता करै तेऊओ अदर हआ। ज़धू ईशू एऊ संसारै आसा त; तेऊ आसा इहअ बोलअ द, “ज़ांऊं मेरै च़ेल्लै संसारै सोभी ज़ैगा परमेशरे राज़े बारै खुशीओ समाद खोज़ी मुक्कणैं; तेखअ एछणअ एऊ संसारा खतम हणैंओ बगत।”

संसारै आसा एही कई ज़ाती ज़ुंणीं ईशूए बारै अज़ी शूंणअ बी निं आथी। ज़धू ईशू स्वर्गअ लै डेऊअ, तधू डाहअ तेऊ मसीही मणछा लै इहअ बोली कि तिन्नां का लऐ खुशीओ समाद खोज़ी ज़ुंणीं नांईं शूंणअ आथी। इशू बोलअ इहअ, “डेओआ, सोभी ज़ाती बणांआं मेरै च़ेल्लै! फसल ग्ई लऊंणां लै हई।”

ईशू आसा इहअ बी बोलअ द, “कोहै दास निं आपणैं मालका का बडअ हंदअ। एऊ संसारे खास मणछै किई मुल्है नफरत। मुंह पिछ़ू हंतणैं तिन्नां तम्हैं बी और कई पाणैं तम्हां मांझ़ै मारी बी! एऊ संसारै लागणअ तम्हां दुख ज़िरनअ, पर तम्हैं बणां पाक्कै किल्हैकि मंऐं हेरअ सह राख्स हारी ज़ुंणीं अह संसार काबू त डाहअ द करी। ज़ै तम्हैं खिरी तैणीं भरोस्सैमंद रहे; तै हेरनै परमेशरा तम्हैं बच़ाऊई।”

एहा गल्ला समझ़ाऊंणा लै खोज़ी ईशू एक कथाहणीं कि ज़ेभै संसार खतम हणअ तेभै लोगा संघै किहअ-किहअ हणअ। ईशू खोज़अ एऊ साबै, “एकी मणछै बऊअ आपणैं खेचै बधिआ कणको बेज़अ। सह त सुत्तअ द और तेऊए बैरी डाहअ तेऊ कणके बेज़ै जैंदरी लबहरेओ बेज़अ छिंगी संघा लागअ सह हांढदअ।”

ज़ांऊं गिंहूं बाडै हुऐ; तेऊए दासै बोलअ तेता भाल़ी इहअ, ‘मालक, तंऐं ता बधिआ बेज़अ बऊअ त, एथ ईंयां लबहरै किधै का आऐ?’ मालकै बोलअ इहअ, ‘अह इहअ काम सका मेरै दुशमण ई करी, अह आसा कुंण दुशमण ज़ुंणी इहअ काम किअ।’

तिन्नैं दासै दैनअ आपणै मालका लै इहअ ज़बाब, ‘तै हाम्हैं कै करमैं, इना लबहरै पोर्ही पाऊं पेच़ी?’ मालकै बोलअ इहअ, ‘नांईं पेच़ी, ज़ै तम्हैं इहअ करे; तेता संघै सका गिंहूंए झोट बी पेछ़ुई। लऊंणीं तैणीं लआ इना न्हैल़ी, तेभै लाणअ लबहरे डाल़ीओ एकी ज़ैगा रूल़ संघा चैल़णीं तेथ आग और गिंहूं करनै खहल़ै कठा।’”

च़ेल्लै निं ऐहा कथाहणींओ मतलब समझ़ै, तैही बोलअ तिन्नैं इशू लै कि एता समझ़ाऊ। ईशू बोलअ इहअ, “राम्बल़ै बेज़ै बऊणैं आल़अ मणछ आसा मसीहा, अह संसार आसा खेचा ज़िहअ। बधिआ बेज़अ आसा परमेशरे राज़े लोग।”

लबहरै आसा तेऊ कदुष्ट राख्से साबै ज़िऊंणै आल़ै मणछ। दुशमण आसा सह राख्स ज़ुंणीं ईंयां लबहरै बऊऐ। लऊंणीं आसा सह बगत ज़ेभै संसार खतम हणअ और लऊंणै आल़ै आसा परमेशरे स्वर्ग दूत।”

“ज़ेभै संसार खतम हणअ; तेभै करनै स्वर्गतूता तिंयां मणछ एकी ज़ैगा कठा ज़ुंण तेऊ राख्से आसा। तिन्नां शोटणैं तिंयां बडै आगीए कूंडा दी। तिधी लागणअ तिन्नां घोर कष्‌ट ज़िरनअ और किर्ही-किर्ही मरनअ। पर ज़ुंण तम्हैं धर्मीं मणछ ज़ुंणी ईशूए साबै ज़िन्दगी ज़िऊई, तिंयां च़मकणै परमेशरे राज़ा दी सुरज़ा ज़िहै।”

ईशू बोलअ इहअ बी कि संसार संसारा खतम हणैं का आजी एछणअ सह पृथूई लै फिरी। ज़िहअ सह डेऊ सह एछणअ तिहअ ई फिरी। मतलब तेऊ का हणीं एही ई मणछा ज़ेही देही और सह एछणअ सरगै बादल़ा दी शुंआर हई। ज़ेभै ईशू फिरी एछै तेभी हणैं तिंयां मसीही मणछ बी ज़िऊंदै ज़ुंण मरी आसा गऐ दै और तिंयां पुजणैं प्रभू मिलदै सरगै।

ज़ुंण मसीही तेभै ज़िऊंदै होए तिंयां च़कणैं तिहै ई हेरा-हेरी उझै सरगा लै तिन्नां ई सेटा ज़ुंणी मरी करै ज़िऊंदै हुऐ। तिंयां सोभै रहणैं ईशू संघै और तधा पोर्ही रहणअ ईशू आपणीं परज़ा संघै और तेखअ हणीं सदा लै पठी शांती।

ज़ुंण ईशू दी विश्वास करे, तिन्नां लै आसा ईशू बोलअ द कि तिन्नां लै दैणअ तेऊ एक-एक अदरो मुगट। तिन्नां करनअ परमेशरा संघै रही सदा राज़ और तिन्नां का हणीं अटल़ शांती।

पर परमेशरा करनअ तिन्नां सोभीओ नसाफ ज़ुंण ईशू दी विश्वास निं करदै, तिंयां पाणैं तेऊ नरकै। तिधी हणैं तिंयां लेरदै और दांदा कटिल्लदै और सदा लै दाह ज़िरदै। तिंयां रहणैं एही आगी दी दझ़दै लागी ज़ुंण कधि निं हिशदी और तिन्नां पल़णैं इहै कील़ै ज़ुंण कधि निं खाई रज़दै।

ज़ेभै ईशू फिरी एछणअ, तेऊ करनअ सह राख्स और तेऊओ राज़ पठी खतम। सह राख्स बी पाणअ नरके आगी जैंदरी। तिधी रहणअ सह तिन्नां संघै सदा दझ़दअ लागी ज़ुंण परमेशरे गल्ला छ़ाडी तेऊ राख्से जाणैं लागै तै।

किल्हैकि पैहलै आदमीं और तेऊए बेटल़ी चोल़अ परमेशरो हुकम और इहअ करै आणअ तिन्नैं एऊ संसारा दी पाप। तिन्नां लै लागअ परमेशरो फिटक और परमेशरै किअ त तिन्नां खतम करनैओ बच़ार। पर बादा का बणाणअ परमेशरा नऊंअ स्वर्ग और पृथूई ज़ेथ सत्त ई सत्त हणअ।

तैहा नऊंईं पृथूई दी बस्सणैं ईशू और तेऊए परज़ा संघा हणअ तिन्नों राज़ सोभी गल्ला दी सदा लै। ईशू टुशणैं लोगे आछी का आशू। तेखअ निं कोही दाह-दुख हणअ, नां लेर-पकार हणीं, ना मौत। तिधी निं बूराई नाओंए कोई च़ीज़ हणीं। ईशूए राज़ा दी हणअ नसाफ, शान्ती और तेऊ रहणअ आपणीं परज़ा संघै सदा।