5. करारे साबै अब्रामो शोहरू

अब्रामा गई ती कनान देशै रहंदी दस साला बित्ती, तज़ी बी निं तेऊए लाल़ी साराईए लुआद हुई ती। एकी धैल़ै बोलअ साराई अब्रामा लै, “बिधाता निं मुल्है लुआद दैनी, हुंह हुई प्रोढी, मेरी अह दासी आसा खारकी, तूह कर ऐहा संघै बैह, ज़ै एसरअ शोहरू होए; ता सह मनणअ मुंह आपणअ शोहरू।”

अब्रामै शूणअ तिहअ ई, अब्रामै किअ दासी हागारा संघै बैह। ज़ेभै हागारा का शोहरू हुअ, तेऊ डाहअ शोहरू नांअ इशमाईल। तेखअ किअ साराई हागारा संघै इहअ बभार कि तेसो हुअ संघा रहणअ ई कठण, खिरी पल़अ तैहा तिधा का दूर ठुहर्नअ। तेसो शोहरू इशमाईल आसा त तधू तेर्हा सालो। बिधाते किई तेखअ अब्रामा संघै भिई का गल्ला;

संघा बोलअ तेऊ लै इहअ, “हुंह आसा सह बिधाता ज़हा का सारअ बल आसा। ज़िहअ हुंह बोला; ज़ै तूह हर बगत तिहअ ई करे, तै रहणीं मेरी ताल्है अह करार और ताल्है दैणीं मुंह खास्सी आद-लुआद ज़हा कुंण गणी निं सकदअ।” अब्रामे टेक्कअ धरनीं उटी बाखा पल़ी करै माथअ संघा किई आराधना और बिधाता बोलअ तेऊ लै इहअ, “भाल़ मेरी आसा ताल्है करार कि तूह हणअ खास्सै देशे लोगो मूल़ बाब, कनान देशे सारी ज़ैगा दैणीं मुंह सदा लै तेरी खांनदानी लै और हुंह हणअ तिन्नों बी बिधाता। मेरअ सह बधान ज़ुंण तम्हां पोस्ती दर पोस्ती करनअ; सह आसा इहअ कि तम्हैं करै लान्हैं का प्रोढै तैणीं सोभी मणछो खतैर। अह हणअ ऐहा गल्लो नछ़ैण कि तम्हैं आसा मेरी करार आद डाही दी।”

बिधाता बोलअ इहअ बी, “तेरी बेटल़ी सारा का हणअ ताल्है एक शोहरू। सह तेरअ शोहरू हणअ करारे साबै असली शोहरू। तूह डाहै तेऊ नांअ इसहाक। मुंह करनी आपणीं करार तेऊ और आजू तेऊ का हुई दी आद-लुआदा संघै पूरी। मंऐं हेरअ शूणीं कि तंऐं इशमाईले बारै किज़ै बोलअ। मुंह दैणीं तेऊ लै बी बर्गत, तेऊ लै बी दैणीं मुंह खास्सी आद-लुआद। तेऊ का बी हणैं आजू बारा मुखियै और तेऊओ बी बणांणअ मुंह बडअ देश। पर मेरी करार हणीं इसहाका संघै। भाल़ मेरी आसा ताल्है करार कि तूह हणअ खास्सै देशे लोगो मूल़ बाब, तैही लाअ मंऐं तेरअ नांअ अब्रामा का आबराम डाही। आबराम, ऐबै निं आपणीं लाल़ी लै साराई बोली, मुंह डाहणअ ऐबै तैहा नांअ सारा। मुंह दैणीं तैहा लै बर्गत और तैहा का हणअ ताल्है एक शोहरू। सह हणीं खास्सै देशे लोगे मूल़ माता।

तैहा ई धैल़ी ज़िहअ बिधाता आबरामा लै बोलअ त तेऊ किअ तिहअ ई। संघा किअ तेऊ इशमाईलो खतैर। आबरामै किअ आपणअ बी खतैर, संघा ज़ेतरै लान्हैं का प्रोढै तैणीं तेऊए टबरा जैंदरी दास और ढबै करै मोलै लऐ दै गुलाम आसा तै तिन्नां सोभिओ किअ तेऊ खतैर। ज़ेभै इसहाक हुअ तेभै ती आबरामे अमर शौआ साले और सारे अमर आसा ती नब्बै साले। ज़िहअ बिधाता आबरामा लै बोलअ; तेऊ किअ तिहअ ई, आबरामै डाहअ तेऊ शोहरू नांअ इसहाक।

थोल़ी साला बाद हुअ इहअ कि बिधाता सोठी आबरामा परखणें गल्ल। तेऊ बोलअ, “आबराम!” आबरामै बोलअ, “बोल प्रभू किज़ै हुकम आसा!” बिधाता बोलअ आबरामा लै, “आपणैं कल्है शोहरू इसहाका ज़हा लै तूह खास्सी झ़ूरी करा, एऊ निंऊं आप्पू संघा मोरिया देशा लै। तिधी खोज़ूं हुंह ताखा एक धार, संघा करै तूह एऊ शोहरू मुल्है हूम बल़ी।” आबरामै किअ तिहअ ई ज़िहअ बिधाता खोज़अ। सह हुअ आपणैं शोहरू हूम बल़ी करना लै बी तैर।

तेखअ लादी आबरामै हूम बल़ी करने झ़ुका इसहाके पिठी और आपणैं हाथै ढाकी आग और छ़ूरी। तेखअ लागै तिंयां दुहै संघा-संघा हांढदै। इसहाक लागअ इहअ बोलदअ, “बाबा, हाम्हां का आग बी आसा और झ़ुका बी आसा, हूम बल़ी करना लै मिम्मूं किधी आसा?” आबरामै दैनअ ज़बाब, “मेरै बेटैआ, मिम्मूंओ इंतज़ाम करनअ बिधाता आप्पै।” संघा रहै तिंयां दुहै हांढदै लागी।

तेखअ पुजै तिंयां ठीक तैहा ज़ैगा ज़ुंण बिधाता आबरामा का खोज़ी ती। तिधी पुजी बणांईं आबरामै एक बेदी, संघा डाही तेथ प्रैंदै झ़ुका। तेखअ बान्हअ आपणअ शोहरू इसहाक संघा पाअ सह बेदी दी तिन्नां झ़ुका प्रैंदै। खिरी च़की आबरामै इसहाका बल़ी करना लै छ़ूरी। पर बिधाते एकी स्वर्ग दूतै पाई उझै का हाक्का, “आबराम! आबराम!” आबरामै बोलअ, “किज़ै हुकम प्रभू।” तेऊ स्वर्ग दूतै बोलअ, “एऊ शोहरू निं मारी, ऐबै गअ मुखा थोघ लागी कि तूह झ़ूरा बिधाता लै खास्सअ, किल्हैकि तेऊए तैणीं निं तूह आपणैं शोहरू बल़ीदान करना लै बी पिछ़ू हटअ।”

आबरामै भाल़अ उझै बाखा और तेऊ का शुझुअ एक गाभू, तेऊ गाभूए शींग आसा तै झ़ाकल़ै शाचै दै। आबरामै आणअ सह गाभू ढाकी संघा किअ आपणैं शोहरूए ज़ैगा सह हूम बल़ी।

बिधाता बोलअ इहअ, “तूह निं मेरी तैणीं आपणैं कल्है शोहरू बल़ीदान करनै का बी पिछ़ू हटअ। तैही खाऐ मंऐं आपणैं सोह कि एता पिछ़ू दैणीं मुंह ताल्है बर्गत, तेरी आद-लुआद बढेरनीं मुंह सरगे तारै और समुंदरे रेता ज़िहै खास्सै ज़हा कुंण गणी निं सकदअ। “पृथूईए सोभी देशे लोगा भेटणीं तेरी खांनदानी करै मुखा बर्गत, किल्हैकि ज़िहअ मंऐं बोलअ, तंऐं किअ तिहअ ई।”