6. बिधाता हेरनअ इसहाका लै प्रबंध करी

आबराम गअ त ऐबै खास्सअ प्रोढअ हुई और तेऊए अमर ती खास्सी। बिधाता ती तेऊ लै सोभी गल्ला दी बर्गत दैनी दी। एकी धैल़ै शादअ आबरामै आपणअ सोभी का भरोस्सैमंद दास संघा बोलअ तेऊ लै इहअ, “तूह डेओऐ मेरै आपणैं तेऊ देशा लै ज़िधी हुंह हुअ ज़ल्मअ द आसा, संघा आणै तिधा का मेरै आपणैं रिश्तैदारा मांझ़ा का इसहाका लै लाल़ी लोल़ी।”

जिधी आबरामै रिश्तैदार रहा तै, तेऊ देशे डेऊंणां लै लागा तै खास्सै धैल़ै। बिधाता किई आबरामे तेऊ टैहलूए मज़त। सह त प्राथणां करद ई लागअ द कि तेऊ भेटी रिबिका नांओंए शोहरी, सह आसा ती आबरामे भाई नाहोर और तेऊए लाल़ी मिल्का का हुऐ दै शोहरू बतूएले ज़ाई।

सारी गल्ला थोघ लागणैं बाद शादी तिन्नैं रिबिका संघा पुछ़अ तैहा का, “तूह कै बोला, इना संघै आझ़ ई च़ाहा तूह डेऊणअ?” तैहा बोलअ, “हाँ।” ज़िहअ रिबिका बोलअ तिंयां हुऐ राज्ज़ी और तिन्नैं छ़ाडी आपणीं एक दासी बी आबरामे तेऊ दासा संघै रिबिका सभाहू। तेखअ ज़िहअ-ज़िहअ हुअ, तिंयां सारी गल्ला खोज़ी तेऊ टैहलू इसहाका का। इसहाकै निंईं सह डेरै लै, संघा किअ तेऊ रिबिका संघै बैह।

आबरामे अमर ती खास्सी लाम्मी सह गअ एकी शौआ पझतरा साले अमरा ज़ांऐं। बिधाता दैनी आबरामा मरने का बाद इसहाका लै खास्सी बर्गत। बिधाता ती आबरामा संघै एही करार किई दी कि आजू हणीं तेरी एतरी खास्सी आद-लुआद ज़हा कुंण गणी निं सकदअ। पर बैह करी गई ती बिह साला हई पर रिबिके निं आजू लुआद हुई आथी ती।

इसहाकै किई बिधाता सेटा अरज़ कि मेरी लोल़ी आजू लुआद हुई। बिधाता दैनअ तेऊ लै बअर संघा हुई रिबिका पैरभारी। सूंणैं का आजी गअ रिबिका का थोघ लागी कि तेसे पेटै आसा दोगल़ शोहरू, किल्हैकि तेसा का ज़ाण्हिंआं तै भितरी आसा दुहै झ़घल़दै लागै दै। तैहा सोठअ इहअ, “मुंह संघै इहअ किल्है आसा लागअ द हंदअ?” खिरी लागी सह बिधाता का पुछ़दी, “ईंयां दोगल़ शोहरू पेटै ई किल्है आसा लागै दै झ़घल़दै?”

बिधाता बोलअ तैहा लै इहअ, “तेरै दोगल़ शोहरूए हणीं आजू दूई ज़ुदी-ज़ुदी ज़ातीए देश। इना दूई मांझ़ै हणअ कान्हअ शोहरू बलबान, ज़ेठअ शोहरू हणअ तेऊओ गुलाम।”

तेखअ सिक्कै रिबिके सूंणें धैल़ै, ज़ुंण शोहरू आजी हुअ सह त झुशलअ तिन्नैं डाहअ तेऊअ नांअ एसाब। एसाबा पिछ़ू हुअ नढैऊऐ दुजअ शोहरू, तेऊ ती आजू हणैं आल़ै शोहरूए घुंढी डाही दी ढाकी, तिन्नैं डाहअ तेऊ नांअ याकूब।