7. बिधाता दैनी याकूबा लै बर्गत

एसाब और याकूब हुऐ ज़ुआन। एसाब रहा त बणैं-बूटै खुश और सह बणअ मशूर शकारी। याकूब त सिधअ-सादअ मणछ, सह रहा त ताम्बूए डेरै दी और सह बणअ फुआल। एसाब करा त आपणैं बाबा लै बणां-बूटा का शकार आणी, तैही झ़ूरा त इसहाक आपणैं ज़ेठै शोहरू एसाबा लै खास्सअ। याकूब आसा त आपणीं ईजा रिबिको बी पैरअ।

एकी धैल़ै हुअ इहअ कि याकूबै ती मसरे दाल़ लाई दी सिटदी, एसाब आअ बणां का और तेऊ ती खास्सी भुखै आई दी। तेऊ बोलअ याकूबा लै, “मेरै च़ाल्लअ भुखै मर्हुई! मुल्है दै ऐहा मसरे दाल़ी का धख ज़ेही खाणां लै!” याकूबै बोलअ एसाबा लै, “पैहलै काढ सोह कि तंऐं दैनअ एते बदल़ै आपणअ ज़ेठै हणैंओ हक ऐबै मुल्है।” एसाबै किअ तिहअ ई। याकूबै दैनी तेखअ एसाबा लै रोटी और सह मसरे दाल़ खाणां लै।

इसहाक च़ाहा त ज़ेठै शोहरू एसाबा लै बर्गत दैणीं। ज़ांऊं इसहाक खास्सअ प्रोढअ हुअ और तेऊए आछी का बी निस्सअ शुझुई, तेऊ शादअ आपणअ ज़ेठअ शोहरू एसाब संघा बोलअ इहअ, “मुंह दैणीं ताल्है मरनै का आजी दिल खोल्ही बर्गत।” रिबिका हेरी इसहाके ईंयां सारी गल्ला शूणीं। संघा बन्हैऊंऐं रिबिका आपणैं ज़ेठै शोहरू एसाबे सोभी का बधिया झिकल़ै आपणैं कान्हैं शोहरू याकूबा लै, संघा बन्हैऊंईं तेऊए हाथै और गल़ा दी तैहा छ़ेल्हूए खाल ताकि सह झुशलअ ज़ाण्हिंए।

याकूब डेऊअ आपणैं बाब इसहाका सेटा संघा बोलअ, “बाबा।” इसहाकै पुछ़अ, “तूह मेरअ कुंण ज़ण्हअ शोहरू आसा?” याकूबै बोलअ आपणैं बाबा लै, “हुंह आसा तेरअ ज़ेठअ शोहरू एसाब, ज़िहअ तंऐं मुल्है बोलअ त, मंऐं किअ तिहअ ई, ऐबै दै मुल्है बर्गत।” तेखअ बोलअ इसहाकै याकूबा लै, “मुंह सेटा ज़िहअ एछ मुंह दै तोपणैं हैनूं, हुंह भाल़ूं कि तूह मेरअ शोहरू एसाब सच्च़ी आसा कि नांईं।” इसहाकै दैनी याकूबा लै इहअ सोठी करै बर्गत कि अह आसा एसाब।

एसाबै डाही आपणैं भाऊ याकूबा लै ज़ीद किल्हैकि ज़हा बर्गतो हकदार सह आसा त सह बर्गत पाई ती ठगी करी करै तेऊ। ता एसाब लागअ आप्पू लै इहअ बोलदअ, “ज़ेही ई मेरै बाबे मौत होए, तेभै पाणअ मुंह याकूब मारी।”

ज़ांऊं रिबिका का थोघ लागअ कि एसाब च़ाहा ऐबै याकूबा ज़ानीं का मारी पाणअ, ता तैहा शादअ आपणअ कान्हअ शोहरू याकूब संघा बोलअ, “ऐबै ज़िहअ हुंह बोला मेरी तिन्नां गल्ला शुण ऐबै धैन दैई करै। तूह डेऊ हारान देशा लै आपणैं मामा लाबाना सेटा।

याकूब रहअ खास्सी साला आपणैं मामा लाबाना सेटा। तिधी रहंदी हुऐ याकूबे बारा शोहरू और एक शोहरी। बिधाता दैनी याकूबा लै बर्गत संघा हुअ सह सेठ।

तेखअ बशैल़ै याकूबै आपणीं लाल़ी और शोहरू ऊँटा दी, संघा लागअ इसहाक कनान देशा बाखा आपणैं बाबे घरा लै हांढदअ। डागै-चैणैं और ज़ैदात तेऊ पद्दनराम आपणैं मांऊल़े देशै खटी ती, तिंयां बी निंयैं तेऊ आप्पू संघा।

ज़ांऊं तेऊओ ज़ेठअ भाई एसाब आधी बाता तैणीं तेऊ सेटा मिलदअ आअ, याकूब डरअ, तेऊ बांडै आपणैं सोभै लोग, सोभै भेडा-बाकरी, गाऊई-बल्द, गाधै-गाधी, ऊँट दूई हेल़्ही दी। तेऊ सोठअ इहअ कि ज़ै एसाब तेऊए एकी छ़ुंढा बाखा च़िकदअ-मारदअ एछे, दुजअ छ़ुंड ता सका तेऊ का दूर ठुर्ही करै बच़ी। तेखअ बोलअ याकूबै तेऊ लै ज़ुंण सोभी का आजूए हेल़्ही छ़ेल़्हअ त लागअ द, “ज़ेभै ताह मेरअ भाई एसाब भेटे, और ज़ै सह तम्हां का पुछ़े, ‘तम्हैं कसरै दास आसा? तम्हैं किधा लै च़ाल्लै? ईंयां कसरै डागै-चैणैं आसा?’ “तेभै बोलै तम्हैं इहअ, ‘ईंयां आसा तेरै च़ाकर याकूबे, मालक, ईंयां छ़ाडै तेऊ आप्पू का आजू ताल्है भेंट। आप्पू बी आसा सह पिछ़ू एछदअ लागअ द।’”

एसाब हुअ याकूबा भाल़ी करै खुश, याकूब आअ ठुर्ही करै एसाबा सेटा लै संघा दैनी तेऊ मल़्हैची, च़ुंज़ी माख्खी। पद्दनराम ज़ैगा आपणैं माऊल़े घरा का पुजअ याकूब राज़ी-राम्बल़अ कनान देशे शकेम नगरी। संघा पाअ नगरी का दूर ज़िहअ आपणअ डेरअ। तेखअ गअ इसहाक ज़ांऐं। तेखअ किअ एसाब और याकूबै तेऊओ क्रिया-कर्म। ज़ुणं करार बिधाता आबरामा और इसहाका संघै किई ती सह बर्गत दैनी बिधाता ऐबै इसहाका का याकूबा लै।