8. बिधाता बच़ाऊऐ युसुफ और तेऊए टबर

खास्सी साला बाद हुअ इहअ कि याकूब गअ त खास्सी प्रोढी अमरो हई याकूबै बोलअ युसुफा लै, “तूह डेऊ आपणैं होरी भाई सेटा लै, तिंयां आसा शकेम नेल़ भेडा-बाकरी च़ारदै लागै दै।” युसुफै बोलअ, “हो, हुंह डेऊं तै।” याकूबै बोलअ तेऊ लै, “डेऊ, संघा दैऐ भाल़णीं कि तेरै होर भाई और भेडा-बाकरीए हेल़्ही राम्बल़ै बी आसा।

युसुफे होरी भाई ज़ाणअ इहअ कि म्हारअ बाब झ़ूरा युसुफा लै हाम्हां का खास्सअ, एता पिछ़ू डाहा तै तिंयां तेऊ संघै ज़ीद। युसुफै खोज़अ तिन्नां का सुपनअ, तिन्नैं बोलअ युसुफा लै, “तूह कै इहअ सोठा कि तूह च़ाल्लअ राज़अ बणीं और ताह करनअ हाम्हां प्रैंदै राज़?” युसुफे एऊ सुपनै खोज़णैं का बाद ज़िधूऐ तिंयां तेऊ संघै होर बी खास्सै। ज़ांऊं युसुफ तिन्नां नेल़ पुजअ, तिन्नैं खोल्हअ तेऊओ सह झिटबझिट्टअ च़ोल़अ पोर्ही संघा पाअ सह एकी डुघै कुहै दी ज़ुंण पाणीं बाझ़ी शुक्कअ आसा त। इशमाईली लोगे एक टोली आसा लागी गिलादा बाखा एछदी। तिन्नां भाल़ी बोलअ यहूदा, अह आसा म्हारअ ई भाऊ, म्हारअ खूंन, च़िकणैं मारनै का पाणअ हाम्हां अह इना इशमाईली का बेच़ी।”

तिन्नैं काटअ तेखअ एक छ़ेल्हू संघा छ़ल़िकअ तेतो लोहू युसुफे झिटबझिटै च़ोल़ै दी। संघा निंयं सह च़ोल़अ आप्पू संघै घरा लै, तेखअ बोलअ आपणैं बाबा का इहअ, “हाम्हां भेटअ अह च़ोल़अ, भाल़णीं दै हैनूं अह तेरै शोहरूओ किनी आसा?” याकूबै हेरअ बछ़ैणीं कि अह आसा युसुफो च़ोल़अ, तेऊ बोलअ, “अह आसा मेरै शोहरूओ च़ोल़अ! मेरअ शोहरू पाअ आझ़ बणें कुंणी ज़ीबै धेल़ी-च़िरी करै खाई।” याकूबै किअ आपणैं झिकल़ै धेल़ी शोग और कुछी डाही गाची पल़ेटी संघा किअ खास्सै धैल़ै शोग।

इशमाईली बपारी पजैल़अ युसुफ मिसर देशै, संघा पाअ सह पोतीपोर नांओंए मणछा का बेच़ी, सह त मिसर देशे राज़ैओ दरोगअ। युसुफ लागअ मिसर देशे रहणैं आल़ै पोतीपोरे घरै रहंदअ। ऐबै त सह तेऊओ मालक। पोतीपोरै बी हेरी अह गल्ल फैल़ी कि युसुफा संघै आसा बिधाता आप्पै, किल्हैकि ज़ुंण बी काम अह करा तेता दी हआ अह सफल।

युसुफ त हेरनअ शुंणनअ बेघै बित्तअ, और पोतीपोरे लाल़ी लोभणूंई तेऊ लै। सह लागी युसुफा लै बोलदी कि मुंह संघै कर रही-बस्सी। पर युसुफै किअ तैहा लै नांईं। आपणैं मालका लै धोखअ और इहअ घोर पाप निं हुंह करी सकदअ ज़ेता करै बिधाता मुखा दूर होए।” पोतीपोरे लाल़ी आई रोशै, संघा बोलअ ज़िदै आपणैं मर्धा युसफे बारै झ़ूठअ, “भाल़ा, एऊ इब्रानी मणछै किई आझ़ म्हारी बेइज़ती। इना गल्ला शूणीं हुअ पोतीपोर रोशै लाल पिऊंल़अ, तेऊ पाअ युसुफ कैदखाने दी ज़िधी राज़े होर कैदी बी हआ तै कैद किऐ दै। पर बिधातो जश हुअ युसुफा लै इहअ और कैदखाने दरोगै बी गम्मअ युसुफ।

दूई साला गई ती हई पर युसुफ आसा त अज़ी बी कैदखाने दी। तेऊअ निं किछै कशूर आथी त। मिसर देशे हुऐ दूई सुपनै, दुजै धैल़ै दोती त मिसर देशे फिरोने मनैं खास्सअ झाख पल़अ द। राज़ै शादै तेखअ डांऊं-च़ेल्लै और पंडत। संघा खोज़ी तिन्नां का सुपनै हुई दी सारी गल्ला। पर तिंयां निं कोहै राज़े सुपनैओ फल खोज़ी सकै।

बिधाता त यूसूफा लै सुपनै खोज़णैअ बअर दैनअ द। राज़ै छ़ाडै युसुफा आणदै सपाही, तिन्नैं किअ युसुफ तेभी कैदखाने का आज़ाद। युसुफ लागअ राज़ै लै बोलदअ, “माहाराज़, तेरै इना दुही सुपनैओ फल आसा एक्कै ई। युसफै शूंणीं राज़े गल्ला संघा लागअ इहअ बोली सुपनेओ फल खोज़दअ, “माहाराज़, ईंयां रहैऊई बिधाता ताखा तिंयां गल्ला ज़ुंण तेऊ आजू करनी। साता साला हणीं सारै मिसर देशै खास्सी फसल। “पर तेता बाद पल़णअ साता साला नकाल़।

फिरोना राज़ै गम्मअ युसूफ कि अह आसा अक्ली आल़अ। तेखअ बोलअ फिरोन राज़ै युसुफा का, “शुण, तूह बणांअ मंऐं ऐबै सारै मिसर देशो माहा मंत्री।”

आजू हुई सच्च़ी साता साला सारै देशै खास्सी पज़ैआ। युसुफै किअ नाज़-पाणीं कठा, संघा डाहै सारै मिसर देशै नगरी-नगरी दी नाज़े भढार भरी ज़िधी-ज़िधी तिंयां कठा किऐ तै। खिरी बिती मिसर देशे रज़दी-पज़दी सात साला। देशै गअ नकाल़ पल़दअ लागी, ज़िहअ युसुफै बोलअ त कि साता साला पल़णअ नकाल़। सारै मिसर देशै पल़अ खास्सअ नकाल़। युसुफै खोल्है नाज़े भढार संघा बेच़अ मिसर देशे सोभी लोगा लै राज़ भढारा का नाज़।

नकाल़े मार निं मिसर देशे ई पल़ी पर सह मार पल़ी कनान देशै बी खास्सी ज़िधी याकूब और तेऊए शोहरू रहा तै।

याकूबै बी शूणीं एही गल्ला कि मिसर देशै आसा नाज़, तेऊ बोलअ आपणैं शोहरू लै, “तम्हैं बी डेओआ संघा आणा तिधा का ज़िणस लई, ताकि हाम्हैं भुखै नां मरे।” तेखअ आऐ युसुफे तिंयां दस भाई मिसर देशा लै कि तिंयां तिधा का नाज़ मोलै निंए। तिन्नैं निं युसुफ बछ़ैणीं, पर युसुफै हेरै तिंयां तेभी बछ़ैणीं।

युसफ रहअ आपणैं तिन्नां भाई कई साबै पटंकदअ लागी, तेखअ शादै तिंयां आप्पू सेटा लै। ज़ांऊं तिंयां नेल़ आऐ, युसुफै बोलअ तिन्नां लै, “हाँ, हुंह आसा युसुफ ज़ुंण तम्हैं मिसर देशा लै एछणैं आल़ै इशमाईली का बेच़ी पाअ त। तम्हैं निं फिकर करा और नां एते कशूरबार आप्पू समझ़ी। बिधाता छ़ाडअ हुंह तम्हां बच़ाऊंणा लै तम्हां आजू कि थारी आद लुआद ज़िऊंदी रहे और इहअ करै तम्हैं बच़े।

युसुफै सोभ भाई लागै तेखअ मिसर देशा का हांढदै संघा पुजै कनान देशै आपणैं बाबा याकूबा सेटा। घरै पुजी खोज़ी तिन्नैं आपणैं बाबा का सारी गल्ला कि युसुफ आसा ज़िऊंदअ और सह करा सारै मिसर देशै राज़। याकूब हुअ तिन्नें गल्ला शूणीं करै बडअ भारी खुश।

तेखअ बोलअ याकूबै “ऐबै हुअ मुंह विश्वास! मेरअ शोहरू युसुफ आसा हणअ सच्च़ी ज़िऊंदअ, मरनै का आजी पैहलै लणअ त मुंह तेऊओ मुंह भाल़ी।” तेऊ दैनी आपणैं सभी शोहरू लै बर्गत।

ज़ुंण करार बिधाता आबराम, इसहाक और याकूबा का आसा ती किई दी, सह करार किई बिधाता याकूबै बारा शोहरू संघै। तिन्ना बारा शोहरू का हुऐ आजू इस्राएले बारा गोत्र।