9. बिधाता शादअ मुसा

मिसर ज़िऊअ मिसर देशै खास्सी अमरा, तेखअ गअ युसुफ एकी शैआ दस साले अमरा ज़ांऐ। तेऊ ज़ांऐ होणैं बाद बी रहै तेऊए रिश्तैदार मिसर देशै बस्सी। तिन्नें लुआदा रही आजू फुलदी-फल़दी लागी। तिंयां हुऐ एतरै खास्सै कि तिन्नां करै भर्हुअ सारअ मिसर देश। तिन्नों नांअ पल़अ इस्राएली।

मिसर देशै बेठअ खास्सी साला बाद राज़गादी दी राज़ करदअ आजू नऊंईं पोस्तीओ राज़अ और तेऊ का निं युसुफे बारै थोघ आथी त। तेऊ बोलअ आपणीं मिसर देशे परज़ा लै, “भाल़णीं दैआ! ईंयां इस्राएली लोग हुऐ म्हारै देशै खास्सै, और ईंयां च़ाल्लै हाम्हां का खास्सै बलबान हई। एता भाल़ी डरै तिंयां इस्राएली का। एता लै किअ तिन्नैं इहअ कि राज़ै फिरोनै बणांऐ तिंयां मिसर देशै लोगे गुलाम।।

तेखअ बणांईं तिन्नैं राज़ै लै पितोम और रामसेस नांओंए भढारा आल़ी नगरी। ज़िहै-ज़िहै तिंयां इस्राएली लोगा लै दुख दैंदै रहै लागी, तिहै-तिहै रहै इस्राएली होर बी खास्सै हंदै और सारै दी बस्सदै लागी।

तेखअ दैनअ मिसर देशे मिसर देशे राज़ै आपणैं लोगा लै इहअ हुकम कि ज़ेतरै बी इस्राएलीए शोहरू आसा हुऐ दै तिन्नां पाआ नील नदी दी डबेऊई करै मारी और शोहरी छ़ाडै सोभी ज़िऊंदी।

लेबी खांनदानीए एकी मणछै किअ एकी लेबी खांनदानीए ई शोहरी संघै बैह। सह शोहरी हुई पैरभारी और तेसो हुअ आजू भाऊ, ज़ांऊं तैहा भाल़अ कि सह भाऊ त हेरनअ बधिया, तैहा डाहअ सह चिई भिन्नैं तैणीं च़ोरी।

ज़ांऊं तैहा लै सह च़ोरी डाहणअ कठण हुअ; ता तैहा बणांअ तेऊ लै नगाल़ैओ एक बडअ छ़ाबू, संघा लेस्सअ सह च़कणाट माटीए गारा करै, तेसा पाअ सह शोहरू तेऊ छ़ाबू भितरी संघा बहाऊअ सह नील नदीए बाढै लागै दै लाम्मै-लाम्मै घाहा जैंदरी पाणीं दी। तेऊ शोहरूए दाई ती दूरा का ज़ेही भाल़ी लागी दी कि एऊ भाऊ लै किज़ै हणअ।

मिसर देशे राज़े शोहरी ती आपणीं दासी और साथणीं संघै आजू बाढै नहैऊंदी लागी दी, ज़ांऊं तैहा देई का लाम्मै घाहा जैंदरी सह छ़ाबू शुझुअ ता तैहा बोलअ आपणीं दासी लै तेऊ छ़ाबू पाणीं जैंदरा का बागै काढणा लै। देई खोल्हअ छ़ाबू और तेथ भितरी भाल़अ तैहा होछ़अ ज़िहअ शोहरू और तैहा फिरी तेऊ लै बडी भारी झींण। तेखअ शादी तैहा एक इस्राएली बेटल़ी, देई बोलअ तैहा लै इहअ, “एऊ शोहरू लै पणैंऊं तूह दुध और हुंह दैंऊं ताल्है तेते मज़दूरी।” देई का निं थोघ थिअ कि सह आसा तेऊ शोहरूए ईज। शोहरूए ईजै निंयं सह घरा लै, संघा लागी तेऊ का दुधा पणैंऊंदी। ज़ांऊं सह शोहरू धख बडअ हुअ ता तेसा निंयं सह राज़े देई सेटा लै और तेसा बणांअ सह आपणअ गोदी पुतर और तेसा डाहअ तेऊओ नांअ इहअ बोली करै मुसा, “मंऐं आसा काढअ द अह पाणीं जैंदरा का।

ज़ांऊं मुसा ज़ुआन हुअ, तेखअ गअ तेऊ का थोघ लागी कि सह बी आसा एक इस्राइएली ई। सह नाठअ तिधा लै ज़िधी तेऊए आपणैं भाई-बंध नज़िरन काम करा तै। तिधी भाल़अ तेऊ इहअ कि एक मिसर देशो मणछ आसा एकी इस्राएली मणछा च़िकदअ लागअ द। मुसा सोठअ दिलै इहअ कि आपणै इस्राएली मणछे मज़त हुई तेऊ करनी।

मुसा भाल़अ फेर कि कोहै निं आथी भाल़अ लागअ द, तेखअ पाअ तेऊ सह मिसर देशो मणछ मारी संघा डाहअ रेता जैंदरी दाबी। पर एसा गल्लो थोघ गअ सोभी का लागी कि मुसा किज़ै किअ।

ज़ांऊं ईंयां गल्ला मिसर देशे राज़ै शूणीं, तेऊ च़ाहअ मुसा मारी पाणअ। पर मुसा ठुर्हअ राज़ै सेटा का संघा पुजअ मिद्यान देशै।

मिद्यान बोल़णअ त च़ितरू नांओं मणछ, सह त परोहित, मुसा रहअ तिधी तेऊए भेडा-बाकरी फुआल लागी। बादा का किअ च़ितरू परोहितै आपणीं शोहरी सपोरो मुसा संघै बैह। तेसा का हुऐ मुसे दूई शोहरू।

मुसा रहअ आपणैं शौहरै च़ितरुए भेडा-बाकरी फुआल लागी। एकी धैल़ै हुअ इहअ कि मुसा भाल़अ दूरा का ज़िहअ उझै धारठी कि झ़ाकल़ै आसा आग लागी दी पर दझ़दअ निं सह आथी। तेखअ किअ मुसा इहअ बच़ार, “एता नेल़ डेऊई करै भाल़ूं एऊ च़मत्कारा कि अह झ़ाकल़ दझ़दअ किल्है निं आथी।” मुसा फिरअ तेता भाल़अ पिछ़ू, तेखअ बोलअ परमेशरै झ़ाकल़े आगी मांझ़ा का, “ए मुसा, मुसा, ए मुसा,” मुसा बोलअ, “हुकम प्रभू”। परमेशरै बोलअ मुसा लै, “इधी निं नेल़ एछै, आपणैं खूरे पोलल़ै खोल्ह पोर्ही, ज़िधी तूह खल़्हुअ द आसा सह ज़ैगा आसा पबित्र।

तेखअ बोलअ बिधाता मुसा लै, “मुखा शुझिआ मेरै आपणैं लोग मिसर देशै गुलामीं दी किहै दाह-दुख ज़िरदै आसा लागै दै। ऐबै लाअ मंऐं तूह मिसर देशे राज़ै सेटा लै छ़ाडी कि तूह मेरी इस्राएली परज़ा मिसर देशा का छ़ड़ैऊई आणे।” “मुंह काढणैं आपणैं लोग मिसर देशा का तेऊ देशा लै ज़िधी रज़दी-पज़दी ज़िम्मीं ज़ैगा आसा। मुंह दैणअ तिन्ना लै सह देश ज़ेते करार मंऐ थारै बाब-दादै आबराम, इसहाक और याकूबा संघै आसा किई दी।

मुसा पुछ़अ परमेशरा का, “हुंह बोलूं इस्राएली सेटा डेऊई करै इहअ कि थारै पित्तरे परमेशरै छ़ाडअ हुंह तम्हां सेटा लै, पर ज़ै तिंयां इहअ पुछ़े कि तेऊ परमेशरो नांअ किज़ै आसा? तेभै हुंह तिन्नां लै किज़ै ज़बाब दैऊं?” परमेशरै बोलअ मुसा लै, “हुंह आसा सदा रहणैं आल़अ, तूह बोलै इस्राएली लै, हुंह छ़ाडअ तेऊ बिधाता तम्हां सेटा लै ज़सरअ नांअ ‘हुंह आप्पै’ आसा। संघा बोलै तिन्नां लै इहअ कि थारै बाब-दादै आबराम, इसहाक और याकूबे बिधाता, छ़ाडअ हुंह ज़सरअ नांअ सदा लै आसा।”

मुसा डरअ मिसर देशे राज़ै सेटा डेऊंणै का, तेऊ काढअ बिधाता सेटा इहअ भान्नअ, “प्रभू, हुंह निं राम्बल़ै करै गल्ला बी ज़ाणदअ करी! हे, बिधाता, प्रभू, हुंह करा ताल्है ज़ीबाण, तूह छ़ाड एऊ कामां लै कहा होरी मणछा।” बिधाता बोलअ मुसा लै इहअ, “हारूणा करनी ताह बाखा लोगा संघै गल्ला और ज़ेही मंऐं ताखा गल्ला खोज़ी; तेही खोज़ै तूह तेऊ का कि किज़ै बोल़णअ। ज़ेभै तम्हैं गल्ला करे हुंह हणअ तम्हां दुही संघै और हुंह खोज़ूं तम्हां दुही का कि किज़ै करनअ।