10. मिसर देशे लोगा लै पल़ी दस आफ़ता
हारूण और मुसा आसा तिंयां ई ज़हा लै बिधाता इहअ हुकम किअ कि इस्राएले सोभी गोत्र और टोलीए लोगा निंऊं मिसर देशा का बागै, मिसर देशे राज़ै फिरोना सेटा डेऊई करै बोलअ मुसा और हारूणैं इहअ कि इस्राएली लोगा कर आज़ाद। तेखअ बोलअ बिधाता मुसा लै, “पर मुंह करनअ एऊ राज़ैओ मन होर बी काठअ और तेऊ निं थारी गल्ला शुणनी। राज़ैओ मन हुअ काठअ, तेऊ निं इस्राएली लोगा डेऊणैं दैनअ। तेऊ किअ इस्राएली लोगा संघै होर बी खास्सअ काठअ बभार।
बिधाता बोलअ मुसा लै इहअ, “मिसर देशो राज़अ हुअ खास्सअ काठअ, सह निं मेरै लोगा छ़ाडणअ च़ाहंदअ। तेखअ दैणीं मुंह मिसर देशे लोगा लै एही घोर सज़ा कि तेता बाद दैणअ राज़ै मेरी इस्राएली लोगा डेऊणैं। ज़ांऊं मुंह आपणअ बल रहैऊई करै आपणैं इस्राएली लोग काढी निंणै, तेखअ लागणअ मिसर देशे लोगा का थोघ कि हुंह आसा बिधाता।”
मुसा और हारूणैं किअ तिहअ ई ज़िहअ बिधाता तिन्नां लै हुकम किअ त। हारूणैं किई आपणीं शोठी नील नदीए पाणीं प्रैंदै आजू, राज़ै फिरोन और तेऊए कार करिंदे सम्हनै बणअ नील नदीओ सारअ पाणीं लोहू अह पल़ी मिसर देशे लोगा लै पैहली आफ़त कि तिंयां च़ाल्लै पाणीं बाझ़ी नचिशै मरी। पर तेऊ निं इस्राएली लोगा डेऊणैं दैनअ।
तेखअ बोलअ बिधाता मुसा लै, “हारूणा लै बोल कि आपणीं शोठी कर पाणीं प्रैंदै आजू। तेखअ निखल़णैं मिसर देशे गाडा, कुल्हा, बाऐ-कोफरी का मिंडकै उझै और तिन्नां करै हणअ सारअ देश भरी।” तिन्नैं किअ तिहअ ई और सारै देशै भर्हुऐ मिंडकै और राज़े बेल़्है और कार-करिंदे घर बी हुऐ मिंडकै करै भरी। राज़ै फिरोनै शादै मुसा और हारूण संघा बोलअ इहअ, “आपणैं बिधाता का करा एही अरज़ कि इना मिंडकै कर मुंह और मेरै लोगा जैंदरा का दूर, हुंह दैंऊं तेखअ इस्राएली लोगा डेऊणैं ताकि तिंयां बिधाता लै बल़ीदान करी सके।” पर ज़ांऊं राज़ै फिरोनै भाल़अ कि मिंडकै गऐ ऐबै मरी, तेऊ किअ भिई तिहअ ई ज़िहअ बिधाता आजी हेरअ त बोली और सह हुअ होर बी काठअ और तेऊ निं मुसा और हारूणें गल्ला मनी।
तेखअ बोलअ बिधाता मुसा लै इहअ, “हारूणा लै बोल कि आपणीं शोठी करै बाह धरनीं माटै प्रैंदै, तिहअ करै निखल़णीं सारै मिसर देशै माटेए धूल़ै का कतूआ।” मुसा बी किअ तिहअ ई और सारै देशै पल़ी कतूआ। राज़ै फिरोनै मैहल और तेऊए कार-करिंदै घरै पेठै डगैछे छ़ुंढ और सारअ मिसर देश हुअ डगैछै करै बरैबाद। राज़ै फिरोनै शादै मुसा और हारूण संघा बोलअ इहअ, “हुंह दैंऊं तम्हां थारै बिधाता लै उज़ल़ ज़ैगा बल़ीदान करना लै डेऊणैं, हाम्हां लै करा बिधाता का अरज़।” बिधाता शूणीं मुसे अरज़, डगैछै किऐ राज़ै फिरोने मैहल, तेऊए कार-करिंदे घरै और मिसर देशे सोभी लोगा जैंदरा का दूर, सारै देशै निं एक डगैछअ बी रहअ। राज़ै फिरोनै भाल़अ कि डगैछे आफ़त हुई दूर, सह हुअ एसा बारी बी काठअ और तेऊ निं इस्राएली लोगा डेऊणैं दैनअ।
ज़िहअ बिधाता बोलअ त, दुजै धैल़ै हुअ तिहअ ई, मिसर देशे लोगे बडै भारी खास्सै डागै-धअण और चैणैं मूंऐं, पर इस्राएलीए डागै-चैणैं लै निं किछ़ै हान्नी हूई। राज़ै फिरोनै छ़ाडै भाल़ै और तेऊ का ज़ांऊं थोघ लागअ कि इस्राएलीए डागै-चैणैं मांझ़ै निं एक बी मूंअ, सह हुअ तेखअ होर बी काठअ और तेऊ निं इस्राएली लोगा मिसर देशा का डेऊणैं दैनअ।
तेखअ बोलअ बिधाता मुसा और हारूणा लै, “तम्हैं दुहै निंयां गेठै का एक-एक मुठ भरी छ़ार। मुसा शोटै तेऊ छ़ारा राज़े फिरोने आछी सम्हनै सरगा बाखा लै। मुसा शोटअ सह छ़ार सरगा बाखा लै, हेरा-हेरी निखल़ै मिसर देशे मणछा और डागै-चैणैं दुखणैं। पर इस्राएलीए निं किछ़ै हान्नी हूई। राज़अ हुअ होर बी काठअ और तेऊ निं मुसा और हारूणें गल्ल मनी।
मुसा किई आपणीं बाता हांढणें शोठी सरगा बाखा लै, हेरा हेरी लागअ गुल़ूबिज़ल़ू और सारै मिसर देशै लागै बडै-बडै शरू पल़दै। शरू जैंदरी ती आग बी लागी दी बरशदी। तिंयां शरू तै एतरै बडै-बडै कि ज़धा ओर्ही मिसर देश बस्सअ तधा ओर्ही निं इहै शरू कधि पल़ै तै। सारै मिसर देशै मणछ, डागै-चैणैं, खेचे पज़ैआ ज़ुंण बी बागै आसा तै तिंयां हुऐ खतम। शरू करै हुऐ डाल़-बूट बी खतम। राज़ै शादै मुसा और हारूण संघा बोलअ तिन्नां लै इहअ, “सच्च़ी हुअ मेरै भलै एसा बारी पाप, हुंह और मेरै लोग आसा पापी और बिधाता आसा धर्मीं। “ऐबै निस्सअ म्हारै गुल़ूबिज़ल़ू और शरू ज़िर्हुई। ज़ीबाण, बिधाता का करा अरज़ कि सरग लोल़ी ऐबै कुआशुअ। तम्हैं सोभै लागा ऐबै डेऊंदै, हुंह निं तम्हां ऐबै मिसर देशै रोक्की डाहंदअ।” मुसा किई बिधाता का अरज़, हेरा-हेरी मुक्कअ गुल़ूबिज़ल़ू, शरू और सरग कुअशुई ज़ाथी निम्बल़अ।
ज़ांऊं राज़ै भाल़अ कि सरग कुआशुअ और गुल़ूबिज़ल़ू मुक्कअ, सह हुधूअ तेखअ भिई। राज़अ और तेऊए कार-करिंदै पल़ी होर बी खास्सी हठ। तिन्नैं निं तेखअ इस्राएली लोगा डेऊणैं दैनअ।
सारै मिसर देशै भर्हुऐ रैट्टै ई रैट्टै। तिंयां तै एतरै कि तधा का पैहलै निं मिसर देशै तिहै रैट्टै आऐ तै और नां आजू कधू इहअ च़ाल्लअ हई। धरनीं हुअ रैट्टै करै काल़अ ई काल़अ, तिन्नैं रैट्टै खाई सारी पज़ैआ ज़ुंण शरू का बच़ी ती।
मुसा किअ आपणअ हाथ उझै सरगा बाखा लै, तेभा पोर्ही रहअ चिई धैल़ै तैणीं सारै मिसर देशै नटिप्प न्हैरअ हई। सह न्हैरअ त इहअ कि मिसर देशे लोगे निस्सै एकी दुजे मुंह बी शुझुई और नां कुंण आपणैं घरा का ओर्ही-पोर्ही डेऊऐ। पर ज़हा ज़ैगा इस्राएली रहा तै, तिधी आसा त राम्बल़अ प्रैशअ।
नहुई आफ़तै बाद बी निं इस्राएली लोगा डेऊणैं दैनअ। तेखअ बोलअ बिधाता मुसा लै इहअ, “ऐबै लाई मंऐं मिसर देशे लोगा लै एक होर सज़ा दैई। एता बाद दैणअ तेऊ तम्हां डेऊणैं।
लुआह धैअ 5-10 का पबित्र शास्त्रे एक काहणीं
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।