11. ओवार्णो थैर

तेखअ बोलअ बिधाता मुसा लै इहअ, “ऐबै लाई मंऐं मिसर देशे लोगा लै एक होर सज़ा दैई। एता बाद दैणअ तेऊ तम्हां डेऊणैं, इधी तैणीं कि तेऊ काढणैं तम्हैं ज़ोरा-ज़ोरी मिसर देशा का बागै। तेखअ डेऊअ मुसा राज़ै सेटा लै संघा बोलअ इहअ, “हुंह आअ ताह सेटा इहअ कि ताखा लोल़ी थोघ लागअ बिधाता ऐबै किज़ै लाअ करी। बिधाता बोलअ इहअ, ‘मुंह दैणीं आझ़ राची मिसर देशै हांढ, राज़गादी दी बेशणैं आल़ै राज़ै ओर्ही एकी गुलामा तैणीं सारै मिसर देशै ज़ेतरै बी ज़ेठै शोहरू आसा तिंयां मरनै सोभ। इधी तैणीं कि डागै-चैणैं मांझ़ै बी ज़ुंण पैहलै सोए नर पशू बी निं बच़णैं। बिधाता किअ तेऊओ मन होर बी काठअ और सह निस्सअ इस्राएली लोगा मिसर देशा का छ़ाडी।

तेखअ बोलअ बिधाता मुसा और हारूणा लै, सोभी इस्राएली का खोज़ इहअ कि एऊ भिन्नें दसुई धैल़ी छ़ांटै आपणैं पित्तरे खांनदानीए दी सोभी टोले मुखियै गाभू कि छ़ेल्हू। तेखअ च़ौदुई धैल़ी ज़ांऊं धैल़अ उडे, तेभै करै सोभै इस्राएलीए सोभै टोल आपणैं-आपणैं तेऊ छ़ांटी करै ज़ुदै धाचै दै चैणैं बल़ी।

“तेऊ चैणें लोहू का लाऐ धख लोहू दुआरे दोहरै खल़ै दरिंडा दी और मुंडै। ज़हा-ज़हा घरै तिंयां चैणैं काटै और खाणैं, तेऊ चैणैंओ मास्स खाऐ आगी जैंदरी भुज़ी करै भोज़न और कल़ुऐ शागे भाज़ी संघै, झ़टपटै छ़ेक्कै-छ़ेक्कै। नढैऊऐ रहै मिसर देशा का निखल़णां लै तैर्हुई।

ज़िहअ-ज़िहअ बिधाता मुसा और हारूणा लै हुकम किअ त, सोभी इस्राएली किअ तिहअ ई। तेखअ हुअ बी तिहअ ई, आधा राची पाऐ बिधाता सारै मिसर देशे लोगे हर घरे ज़ेठै शोहरू मारी।

बिधाता त तिन्नां लै इहअ बी बोलअ द, “ज़ुंण दुआरे दरिंडा दी तम्हैं मिम्मूं काटी करै लोहू लाअ, सह हणअ एसा गल्लो नछ़ैण कि तिधी रहा तम्हैं। ज़िधी मुखा सह लोहू शुझिए तिधा का डेऊणअ मूंह प्रैंदी पोर्ही और थारी निं किछ़ हान्नी हणीं।

मिसर देशे लोगे निं थारी गल्लो भरोस्सअ किअ, और नां बिधातो हुकम मनअ। मिसर देशे सोभै लोग लागै हिक्का पटाकी ज़ोरै-ज़ोरै लेरा लांदै, किल्हैकि मिसर देशै निं एक बी घर इहअ आथी त ज़िधी कुंण मूंअ निं आथी त।

राज़गादी दी बेशणैं आल़ै राज़ै ओर्ही एकी गुलामा तैणीं सारै मिसर देशै ज़ेतरै बी ज़ेठै शोहरू आसा तै तिंयां मूंऐं सोभ। इधी तैणीं कि डागै-चैणैं मांझ़ै बी ज़ुंण पैहलै सोए नर पशू आसा तै, तिंयां बी निं बच़ै और सारै मिसर देशै लागी लैल़ा-पकारा।

तेखअ शादै राज़ै तैहा ई राची भितरी मुसा और हारूण, संघा बोलअ तिन्नां लै, “तम्हैं सोभ इस्राएली निखल़ा हाम्हां जैंदरा का म्हारै एऊ देशा का दूर! ज़िहअ तम्हैं बोला तिहै लागा आपणैं बिधाते भगती करदै डेऊंदै।