12. लुआह

ज़ांऊं इस्राएली मिसर देशा का निखल़ै तिंयां हुऐ खास्सै खुशी। बिधाता आणै तिंयां मिसर देशे गुलामीं का छड़ैऊई। बिधाते दौलती हुऐ इस्राएली संघा रहणैं आल़ै मिसर देशे लोग इहै भलै कि इस्राएली लोगै ज़ुंण बी च़ीज़ तिन्नां का मांगी, तिन्नैं निं तेता लै नांह किअ। इहअ करै निंईं इस्राएली मिसर देशा का डेऊंदी बारी मिसर देशे लोगा का खास्सी धन-माया बी आप्पू संघा। मिसर देशे कई लोगै बी किअ बिधाता प्रैंदै विश्वास और तिन्नां मांझ़ै बी लागै कई इस्राएली संघै हांढदै।

धैल़ी हांढा त बिधाता खास्सै घणैं बडै थाम्हा ज़िहै बादल़ा दी तिन्नां आजू-आजू और राची हांढा त ज़ल़दी आगीए बडै थाम्हा दी तिन्नां आजू-आजू, ताकि तिंयां धैल़ी और राची हांढी सके।

थोल़ै धैल़ै बाद हुअ इहअ कि मिसर देशे राज़ै फिरी एही सोर कि इस्राएली निं गुलामीं का आज़ाद करनै और सह आअ आपणीं फाहण-फौज़ लई तिन्नां पिछ़ू ढाकदअ कि तिन्नां पिछ़ू फरेऊए। बिधाता किअ मिसर देशे राज़ैओ मन काठअ, तैही आअ सह तिन्नां पिछ़ू। किल्हैकि सह च़ाहा त इहअ कि सोभी का सोभी का थोघ लागे कि सह आसा बिधाता और ज़ुंण बिधाता करनअ च़ाहा, तेता निं कोहै रोक्की सकदअ।

ज़ांऊं इस्राएली मिसर देशो राज़अ आपणीं फौज़ा संघी पिछ़ू एछदअ भाल़अ, तिन्नां पल़अ बडअ भारी हैल़अ, तिंयां लागै ज़ोरै-ज़ोरै लैल़ा लाई बिधाता का मज़ती मांगदै। तेखअ लागै मुसा लै बोलदै, “मिसर देशै ज़ै हाम्हैं मरी बी डेऊंदै, तेथ ती हाम्हां दाबणा लै बतेर्ही घोरी आसा! तंऐं पजैल़ै मारना लै हाम्हैं इधी एऊ उज़ल़ रेगीस्तानै!

मुसा दैनअ इस्राएली लै इहअ ज़बाब, “तम्हैं निं डरदै लागा! ईंयां मिसरी ज़ुंण तम्हां हारदै-मारदै आऐ, ईंयां निं आझ़ा बाद तम्हां तंग करदै एछणैं। तम्हां निं किछ़ करने ज़रुरत आथी, बिधाता करनअ थारै बदल़ै आप्पै इना संघै जुध।” बिधाता बोलअ तेखअ मुसा का, “तूह किल्है आसा मुखा ज़ोरै-ज़ोरै हाक्का लाई मज़ती मांगदअ लागअ द? इस्राएली लोगा लै बोलअ इधा का लागा आजू हांढदै।

परमेशरो स्वर्ग दूत रहा त कबल्लअ इस्राएली लोगा आजू-आजू हांढदअ लागी, पर तेभा पोर्ही लागअ सह तिन्नां पिछ़ू-पिछ़ू हांढदअ। ज़ुंण बादल़ो थाम्ह बी इस्राएली आजू-आजू हआ त, सह बी हुअ इस्राएली लोगा पिछ़ू। इहअ करै आअ सह बादल़ इस्राएली और मिसर देशे फौज़े मांझ़ा-मांझ़ी।

ज़िहअ बिधाता मुसा लै बोलअ, तेऊ किअ समुंदरे पाणीं प्रैंदै आपणअ हाथ आजू और बिधाता छ़ाडी पुर्बा बाखा ढिश-बागर। ढिश-बागरी रही सारी राची लागी, समुंदरो पाणीं हुअ ओर्ही-पोर्ही दूई बाखा लै और धरनीं निखल़ी शुक्की ज़ैगा।

इस्राएली लोग लागै समुंदरै मांझ़ा-मांझ़ी शुक्की ज़ैगा बाती हांढदै और तिन्नें दैहणै-बाऊंऐं आसा ती पाणींए दुआली बणीं दी।

मिसर देशे राज़ै फिरोने रथ, और घोल़ै दी शुंआर सारी फौज़ डेऊई इस्राएली पिछ़ू समुंदरा मांझ़ै।

राचकै च़ौथै पहरै भाल़अ बिधाता आगीए थाम्हा बाती मिसर देशे फौज़ा बाखा और तिन्नें मनैं पल़ी डर और झाख। तिन्नें रथे थरेट लागै पोर्ही निखल़दै और तेता करै हुअ तिन्नां आजू हांढणअ कठण। तेखअ लागै मिसरी आप्पू मांझ़ै गल्ला करदै, “च़ाल्ला, इना इस्राएली दैआ रहणैं, हाम्हां हुअ पिछ़ू हटणअ! बिधाता आसा आप्पै इना बाखा हाम्हां मिसरी संघै जुधा करदअ लागअ द।”

इस्राएली टपै सोभ समुंदरा मांझ़ा-मांझ़ी शुक्की ज़ैगा बाती पार। तेखअ बोलअ बिधाता मुसा लै इहअ, “आपणअ हाथ कर समुंदरे पाणीं प्रैंदै आजू, समुंदरो पाणीं ढुल़णअ दुही बाखा का मिसरी रथा, घोल़ै और सारी फौज़ा प्रैंदै।” ज़िहअ बिधाता बोलअ मुसा किअ आपणअ हाथ समुंदरे पाणीं प्रैंदै आजू और राची भैणै का आजी हुअ समुंदरो पाणीं बलैल्लअ। मिसर देशे सारी फौज़ लागी पिठ फरेऊई ठुहर्दै पर बिधाता डबेऊऐ तिंयां सोभ समुंदरै पाणीं मांझ़ै।

तैहा धैल़ी भाल़ी इस्राएली लोगै समुंदरे बाढै मिसर देशे फौज़े ल्हासा, तेखअ ज़ाण्हूंअ तिन्नां का कि बिधाता बच़ाऊऐ तिंयां मिसरी का। ज़ेही महान शगती रहैऊई करै बिधाता मिसरी खतम किऐ, तेता भाल़ी किई इस्राएली बिधाते ज़ै-ज़ैकार और तेऊए गूर मुसो बी किअ तिन्नैं विश्वास।

मिसर देशा का निखल़ी तै इस्राएली खास्सै खुश हुऐ दै कि बिधाता आणै तिंयां मिसर देशे गुलामीं का छड़ैऊई। इस्राएली आसा तै ऐबै बिधाते हुकम और पूज़ा, भगती, बल़ीदान और ज़िन्दगी दी हर गल्लै बधान मनणा लै आज़ाद। तेखअ गांठी मुसा और इस्राएली लाल समुंदरा पार डेऊई बिधाता गिह और कई गिहा बोली रहै तिंयां बिधाते ज़ै-ज़ैकार करदै लागी।

बिधाता बिधाता डाहअ मुसा और हारूणा लै इहअ खोज़ी, “ऐहा गल्ला डाहै तम्हैं आद कि मंऐं बिधाता ज़ेऊ देशै तम्हां निंणे करार आसा किई दी, तिधी पुजी करै बी करै तम्हैं एऊ बधाना हर साल एऊ थैरा पोस्ती दर पोस्ती इहै ई मनाऊंईं पूरै। तधा पोर्हि हुई ओवार्णें थैरे शुरूआत। तेखअ किऐ मुसा सोभी इस्राएली टोलीए सैणैं कठा संघा बोलअ तिन्नां लै इहअ, “सोभी इस्राएली टोली दी छ़ांटा सोभै टोल हेल़्ही जैंदरा का एक गाभू कि छ़ेल्हू, संघा काटा तेऊ ओवार्णै लै। इहअ करै मनाऊंआं तम्हैं ओवार्णैओ थैर। तेऊ चैणैंओ मास्स खाऐ आगी जैंदरी भुज़ी करै भोज़न और कल़ुऐ शागे भाज़ी संघै छ़ेक्कै-छ़ेक्कै।