13. इस्राएली संघै किई बिधाता करार

इना सोभी गल्ला हणैं बाद लागै इस्राएली लाल समुंदरा का आजू हांढदै। मुसा निंयैं इस्राएली सीनाई धारा नेल़ ज़ुंण उज़ल़ ज़ैगे पछ़मा बाखा आसा ती। अह आसा ती सह ई धार ज़िधी मुसा संघै बिधाता ज़ल़दै झ़ाकल़े आगी बाती गल्ला किई ती। तिधी पुजी पाऐ तिन्नैं तिधी धारा गोधै आपणैं डेरै।

बिधाता बोलअ मुसा और सोभी इस्राएली लै इहअ, “जै तम्हैं बिधातो बधान ज़िहअ खोज़अ तिहअ ई मनें, तै हणैं तम्हैं सफल और बलबान देश।

परमेशर शादअ बिधाता उझै धारा प्रैंदा लै और बाकी सारी परज़ा रही थारा गोधै। ज़ांऊं लोगा का गुल़ूबिज़ल़ूए ढिम्हां, बिज़ल़ीए च़पराल़ी, धूँ और धारा प्रैंदै करनाल़ी बाज़णें छ़ेल़ शुण्हुंई ता तिन्नां छ़ुटी डरै काम्मणीं और तिंयां ठुर्है धारे गोधा का दूर ज़िहै। ज़िधा का परमेशर गल्ला करदअ आसा त लागअ द, मुसा डेऊअ तेऊ घणैं बादल़ा नेल़ पर लोग रहै दूर ई खल़्हुई।

बिधाता बोलअ इस्राएली लोगा लै इहअ, “हुंह आसा थारअ परमेशर सह बिधाता ज़ुंणी तम्हैं मिसर देशे गुलामीं का आणै छ़ड़ैऊई। मुंह छ़ाडी निं कहा होरी आपणअ परमेशर मनी।”

“सरगै, पृथूई या धरतीए पाणीं दी निं तम्हैं कोहिए शक्ला ज़ेही मुर्ति या मैहरै बणांईं। नां तिन्नां मुर्ति और मैहरे पूज़ा करी और नां तिन्नां सेटा माथअ टेकी। थारअ परमेशर आसा हुंह बिधाता और हुंह च़ाहा इहअ कि तम्हैं लोल़ी सिधै मेरै हुऐ। मेरै नांओंआं निं तूह कज़ेही लई, ऐहा गल्ला डाहै तम्हैं आद कि बशैघे धैल़ी आसा मुंह बिधाता लै पबित्र। तम्हां लै आसा होरी कामां करना लै हर हबते छ़ह धैल़ै, पर हर हबते सातूई धैल़ी आसा मुंह थारै परमेशर बिधाता लै बशैघ। तैही दैनी मंऐं बशैघे धैल़ी लै बर्गत और अह धैल़ी आसा मंऐं आप्पू लै पबित्र डाही दी।

“आपणैं ईजा-बाबो करै अदर, तेता करै हणीं तेरी तैहा ज़ैगा खास्सी अमर ज़ुंण ज़ैगा मुंह बिधाता तम्हां लै दैणीं। हत्या निं करी। आपणीं बेटल़ी छ़ाडी होरी संघै सुत्ती कंज़रैई निं करी। च़ोरी निं करी होरीए बारै निं झ़ुठी शाजत दैई। होरीए च़िज़ो मांण निं करी कि सह लोल़ी ताह भेटी। नां कसरै घरो, नां कसरी बेटल़ी-मर्धो, नां कसरै गुलाम, नां कसरै बल्द, गाधै और नां कसरी किज़ू होरी च़िज़ो मांण करी।”

बिधाता दैनी मुसा लै दूई पात्थरे शिला ज़ेथ तिंयां दस हुकम आसा तै लिखै दै। बिधाता खोज़अ मुसा का पुज़ा,भगती, बल़ीदान और ज़िन्दगी दी हर गल्ला लै बधान।बिधाता बोलअ इस्राएली लोगा लै इहअ, ज़ुंण मुल्है झ़ूरा और मेरअ बधान मना, तेऊ लै रहा मेरी झींण और झ़ूरी हज़ारो पोस्ती तैणीं। थारअ परमेशर आसा हुंह बिधाता और हुंह च़ाहा इहअ कि तम्हैं लोल़ी सिधै मेरै हुऐ। ज़ुंण मुल्है नफरत करा, तिन्नां लै दैआ हुंह सज़ा। तिन्नें लागा शोहरू, पोचै, पल़पोचै और च़ौथी पोस्ती तैणीं आपणैं पित्तरे सज़ा भुगतणीं।

बिधाता दैनअ इस्राएली लै इहअ हुकम कि मुल्है बणांऐ पबित्र ताब्बू और तेऊ पबित्र ताम्बू दी मेरी पूज़ा लै सोभै च़िज़ा। ज़िहअ कि बेदी, धूप बेदी और परोहिते झिकल़ै किहै लोल़ी हुऐ और पबित्र और खास पबित्र ज़ैगा मांझा लै पल्दअ तेतो रूप बी खोज़अ। ईंयां गल्ला किई तिन्नैं तेही ई ज़िहअ बिधाता मुसा लै हुकम किअ त। मेल़-ज़ोल़े ताम्बूए खास पबित्र ज़ैगा सका त सिधअ माहा परोहित ई डेऊई।

तेखअ डाही तिन्नैं बिधाते मेल़-ज़ोल़े ताम्बू आजू हूम बल़ी करने बेदी, तेखअ बोलअ बिधाता मुसा लै इहअ, “ज़ै कुंण मणछ भूला-बिसरा बिधाता संघै धोखअ करे, सह आणै दोश बल़ी लै भेडा-बाकरीए हेल़्ही मांझ़ा का एक गाभू ज़ेथ किछ़ै खोट निं होए, तेखअ करै परोहित तेऊ गाभू बल़ी करी पापो प्राशत और इहअ करै हणैं तेऊ मणछे पाप माफ। लेबी लोग आसा तै बिधाता पबित्र ज़ैगा दी सेऊआ करनै आल़ै खास लोग और बिधातो परोहित निखल़ा पोस्ती दर पोस्ती लेबी गोत्रा का।

बिधाता ज़ुंण बधान और बिधी तिन्ना लै दैनी, तिंयां डाही तिन्नै आपणैं दिलै आद। इस्राएली किअ तिहअ ई ज़िहअ बिधाता हुकम आसा किअ द।

मुसा रहअ धारा प्रैंदै च़ाल़्ही धैल़ी और च़ाल़्ही राची बिधाता संघै। इस्राएली लागै भाल़ै कि मुसा पाई धारा प्रैंदै खास्सी बल़ैग, तेखअ झाल़्हुऐ तिंयां हारूणा सेटा, संघा लागै इहअ बोलदै, “ज़ुंणी मुसा हाम्हैं मिसर देशा का इधी तैणीं आणै, कुंण ज़ाणें कि उझै धारा प्रैंदै तेऊ लै किज़ै हुअ होए! तूह बणाऊ हाम्हां लै एक देअ, ज़ुंण हाम्हां सोभी आजू नढैओए और म्हारी रखबाली करे।” इहअ करै किअ तिन्नैं घोर पाप।

तिन्नैं सोभी लोगै खोल्है आपणैं काने बाल़ू पोर्ही संघा किऐ हारूणा सेटा कठा। हारूणैं गाल़अ सह सारअ सुंन्नअ संघा बणांअ एक सुन्नेंओ बाछ़ू। दुजै धैल़ै गऐ सोभै लोग दोथी उझ़ुई और तिन्नैं किऐ हूम बल़ी और आप्पू मांझ़ै खाणां लै बी काटी मेल़ बल़ी। तेखअ बोलअ बिधाता मुसा लै इहअ, “मुसा, मंऐं हेरअ भाल़ी कि ईंयां लोग आसा हठू, ऐबै फिरी मुंह इने एतरी रोश कि ईंयां करनै मुंह खतम, ऐबै निं मुंह रोकदअ लागी। तेखअ लागअ मुसा इहअ बोली करै बिधाता मनैंऊंदअ, “हे म्हारै बिधाता, आपणीं महान शगती करै पजैल़ै तंऐं ईंयां लोग मिसर देशा का इधी, ऐबै निं रोशै इना खतम करी आथी। बिधाता हटअ तेखअ पिछ़ू और तेऊ निं इस्राएली खतम किऐ, ज़िहअ तेऊ बोली हेरअ त।

ज़ांऊं मुसा उंधै लोगा नेल़ ज़िहअ पुजअ, तेखअ शुझुअ तेऊ का सह सुन्नेंओ बाछ़ू और लोग आसा तेऊ फेर नाच़दै लागै दै। एता भाल़ी आई मुसा बडी भारी रोशै और तेऊ शोटी तिंयां बिधाते बधान लिखी दी शिला उंधै धारे गोधा लै और तेते हुऐ ठोर-ठोर।

ज़ुंण इस्राएली सह सुन्नेंओ बाछ़ू देअ बणांअ त, सह पाअ मुसा आगी जैंदरी, और सह किअ पिशी करै छ़ारा ज़िहअ भींन। तेखअ राल़अ सह छ़ार तिन्नें झुटणें पाणीं जैंदरी संघा पणैंऊंअ सह दराणीं तिन्नां सोभी का। तेखअ हुअ इहअ कि बिधाता पाई तिन्नां लै घोर आफ़त तिन्ना मांझै पाऐ खास्सै लोग मारी।

एकी धैल़ै बोलअ बिधाता मुसा लै भिई इहअ, “ज़ेही मंऐं ताल्है पात्थरे शिला बणांईं दैनी ती, तेही काट दूई होर शिला, हुंह लिखूं तेथ तेऊ बधाना तेथ ज़िहअ मंऐं तिन्नां शिला दी लिखअ त, ज़ुंण तंऐं फाल़ी पाई। तेखअ बणांईं मुसा बडै शाफल़ा काटी करै तेही ई दूई शिला ज़ेही तिंयां पैहली शिला आसा ती। तेखअ डेऊअ दोती दोथी तिन्नां शिला संघा पाई उझै सीनाई धारा प्रैंदा लै, ज़िहअ तेऊ लै बिधाता हुकम किअ त। मुसा टेक्कअ उटी बाखा पल़ी बिधाता सेटा माथअ। संघा किई एही अरज़, “हे बिधाता, मेरै प्रभू, अह गल्ल ता आसा कि ईंयां लोग आसा हठू और पापी, पर म्हारै पाप कर माफ। बिधाता शुणी मुसै अरज़ संघा दैनी तिन्ना लै माफी। मुसा च़की तिंयां बिधाते बधान लिखी दी दूई पात्थरे शिला आप्पू संघै, संघा होथअ सीनाई धारा का उंधै। तेखअ रहअ बिधाता इस्राएली लोगा संघै सीनाई धारा का कनान देशा तैणीं।