14. इस्राएली रहै उज़ल़ रेगिस्तानै रिंगदै लागी
सीनाई धारा प्रैंदै ज़ांऊं बिधाता मुसा का बधान और हुकम खोज़ी मुक्कअ। तेखअ बोलअ बिधाता इस्राएली लै कि ऐबै लागा सीनाई धारा का आजू हांढदै। मुसा लै बोलअ इहअ, “तंऐं आणै इस्राएली मिसर देशा का इधी तैणीं। ऐबै तैर्हू तूह इना लोगा तैहा ज़ैगा पजैल़णां लै ज़ेते करार मंऐं इने बाब-दादै आबराम, इसहाक और याकूबा का आसा किई दी। बिधाता हांढा त बादल़े थाम्हा दी इस्राएली का आजु-आजु, और तिंयां हांढा तै तेऊ पिछू-पिछू।
बिधाता आसा ती आबराम, इसहाक और याकूबा संघै एही करार किई दी कि तेऊ दैणीं अह ज़ैगा आजू तिन्नें आद-लुआदा लै। पर तेऊ देशे आसा ती खास्सी ज़ातीए लोग बस्सै दै, तिन्नां लै बोला तै कनानी। पर ज़ुंण ज़ाती तेऊ देशै आसा बस्सी दी; तिंयां करा तै होरी देओआ-देबते पूज़ा, होर ता होर तिंयां करा तै आपणै शोहरू-शोहरी बी आपणैं देओआ-देबतै लै बल़ीदान।
बिधाता बोलअ इस्राएली लै, ज़ांऊं तम्हैं तिन्नां का जुध ज़िती करै तैहा ज़ैगा आप्पू लै गिम्मी हेरे, तम्हैं करै तिन्नें पूज़ा-गाज़ा करने ज़ैगा पठी खतम और तिन्नां लै निं ल्हैज़ करी, नां तिन्नां संघै किज़ै करार करदै लागी, नां तिन्नें शोहरीओ बैह आपणैं शोहरू संघै करी और नां आपणीं शोहरीओ बैह तिन्नां संघै दैई हणैं। किल्हैकि ज़ै तम्हैं इहअ नांई करे, तेखअ सका तिंयां थारी आद-लुआदा होरी देओआ-देबते पूज़ा कराऊई कबाता पाई।
ज़ांऊं इस्राएली कादेश-बर्ना पुजै। तेखअ छ़ांटै मुसा हर गोत्रे मुखियै मांझ़ै एक-एक मणछ, कनान देशो भेद लणा लै। कनान देशो भेद लणा लै छ़ाडदी बोलअ मुसा तिन्नां लै इहअ कि इधा का डेओआ दखण देशा बाती, संघा भाल़ै सराज़ी देशा बाती डेऊई तेऊ देशा कि तेथ किहअ लाक्कअ आसा, इहअ बी भाल़ै कि तेऊ देशै केतरै लोग आसा और तिंयां केतरै बलबान आसा, ऐहा गल्ले भेख बी लऐ कि तेऊ देशे लोगो रहणअ बस्सणअ किहअ आसा, तिन्नें नगरी फेर खुल्हअ आसा कि फेर बडी दुआली आसा। इहअ भाल़ै ज़रूरी कि सह ज़िम्मीं रज़दी-पज़दी आसा कि नांईं और तेथ किहै-किहै डाल़ बूट आसा।
मुसा जुंण मणछ कनान देशा लै छ़ाडै तै; च़ाल़्ही धैल़ै बाद पुजै तिंयां तेऊ देशो भेद लई बापस फिरी। तिन्नैं खोज़ी सारी गल्ला इहअ बोली करै, “ज़ेऊ देशा लै तंऐं हाम्हैं छ़ाडै तै; हाम्हैं आऐ तिधा का हांढी, तेऊ देशे ज़िम्मीं आसा सच्च़ी रज़दी-पज़दी, पर तिधे रहणैं आल़ै लोग आसा ज़बर ज़ोरा आल़ै और तिन्नें बडी-बडी नगरी फेर आसा बडी उछ़टी-उछ़टी दुआली दैनी दी। म्हारअ ज़ै तिन्नां मणछा संघै जुध होए हाम्हैं निं तिन्नां का ज़िती सकदै और तिन्नां का निं हाम्हैं ज़िऊंदै बच़ी सकदै।
नूनो शोहरू यहोशू और यपुन्नेंओ शोहरू कालेब बी तै तिन्नां होरी संघै कनान देशे भेख लंदै डेऊए दै, तेखअ लागै तिंयां गल्ला खोज़दै, “तेऊ देशे लोग आसा सच्च़ी बडै-बडै दैंतर और ज़बर ज़ोरा आल़ै, तम्हैं करा सिधअ इहअ कि बिधाता का कबाता डेऊई निं एक्कअ करा, नां तिधी रहणैं आल़ै लोगा का डरदै लागा, किल्हैकि तिंयां हारनै आसा हाम्हां लै सान किल्हैकि हाम्हां संघै आसा बिधाता आप्पै।
पर तिन्नैं निं यहोशू और कालेबे गल्ला शूणीं। सोभै इस्राएली टोलीए लोग लागै मुसा और हारूणा सेटा तेऊ लै बखरदै; और इहअ बोलदै, “एता का भलअ हणअ त इहअ ज़ै हाम्हैं मिसर देशै ई मरदै! कि मरदै हाम्हैं पोर्ही तेऊ उज़ल़ रेगीस्तानै! बिधाता किल्है च़ाहा हाम्हां तेऊ देशा लै निंणअ? तेऊ देशे लोगा पाणैं हाम्हैं सोभै मर्ध जुधा दी मारी और म्हारै बेटल़ी माठै करनै तिन्नां कैद, एता का आसा हाम्हां लै मिसर देशा लै बापस फिरनअ ठीक।” संघा लागै तिंयां आप्पू मांझ़ै बोलदै, “एछा हाम्हां बणांणअ आप्पू मांझ़ै आपणअ एक मुखिय संघा डेऊणअ हाम्हां मिसर देशा लै बापस फिरी।”
तेखअ हुअ इहअ कि हेरा-हेरी शुझुअ लोगा कि बिधाता हुअ मेल़-ज़ोल़े ताम्बू दी बादल़ा जैंदरी प्रगट। तेखअ बोलअ बिधाता मुसा लै इहअ, “इना लोगा केभै तैणीं निं मेरी कदर करनी? तम्हैं मरनै इधी एऊ उज़ल़ रेगीस्तानै, ज़ेतरै बी तम्हैं बिहा साला उझै अमरे आसा, तम्हैं रहै मुंह नकदरै समझ़ी बखर्दै लागी। तम्हां मांझ़ै निं यपुन्नें शोहरू कालेब और नूने शोहरू यहोशू छ़ाडी कोहै तेऊ देशै पुजणअ ज़हा देशे बारै मंऐं इहअ आसा बोलअ द कि तम्हैं बसाऊणैं मुंह तिधी।
ज़ांऊं मुसा ईंयां सारी गल्ला इस्राएली का खोज़ी; तिंयां लागै लेरा-पकारा लांदै और तिन्नैं मनाऊंअ शोग। संघा लागै इहअ बोलदै “हाम्हैं किअ पाप; पर ऐबै आसा हाम्हैं डेऊणा लै राज्ज़ी, हाम्हां डेऊणअ तैहा ज़ैगा लै ज़ेते बारै बिधाता करार आसा किई दी।” पर मुसा बोलअ तिन्नां लै इहअ, “तम्हैं निं आजी बिधाते गल्ला शूणीं और ऐबै ज़िहअ तम्हैं च़ाहा, सह निं सफल हई सकदअ। इहअ करदै निं तम्हैं धख बी लागी आथी हेरे बिधाता निं ऐबै तम्हां बाखा आथी। पर इस्राएली निं मुसे गल्ला शूणीं तिंयां रहै धारा बाखा लै हांढदै लागी।
तैहा धारा रहा तै अमोलकी और कनानी लोग, तिन्नैं दैनअ इस्राएली लै फेरा-फेर गोट, संघा च़िकदी मारदी दरल़ाऊऐ तिंयां होर्मा नांओंए नगरी तैणीं। तेखअ ठुर्है तिंयां तिन्नां सेटा का संघा पुजै कादेश-बर्ना मेल़-ज़ोल़े ताम्बू सेटा फिरी। संघा रहै तिंयां च़ाल़्ही साला तैणीं धारा फेर रिंगदै लागी।
बिधाता किई तेऊ डरैऊंणै रेगीस्ताने च़ाल़्ही साला तैणीं इस्राएलीए मज़त और हेर-सभाल़। खिरी लागै तिंयां मुसा संघै हठ करदै कि तिंयां रुंझ़ूऐ तेऊ खाणा खाई और तिन्नां खाणीं ती शिखा ज़ेही तिंयां मिसर देशै खाआ तै! बिधाता दैनअ इस्राएली लै सरगा का खाणां लै, तेखअ हुअ इहअ कि समुंदरे बाढा का आऐ होछ़ै-होछ़ै च़ेल्लू इस्राएलीए ताम्बूए डेरै फेर सारै दी संघा बेठअ तिन्नों छ़ुंढ तिधी। बिधाता दैनी तिन्नां लै बैल़ी-कलारी ई खाणां लै शिखा ज़ेतरी तिंयां खाई सका तै। इना च़ाल़्ही साला नां ता तिन्नें झिकल़ै धेल़्हुऐ और नां खूरे पोलल़ै।
बिधाता काढअ इस्राएली लै शुक्की टोल्हा का पाणीं बी झुटणा लै। तेखअ बी किअ तिन्नैं मुसा और बिधातो बरोध। तैबी किई बिधाता आपणीं सह करार पूरी ज़ुंण तेऊ आबराम, इसहाक और याकूबा संघा किई ती।
च़ैत्रै पुजी सारी इस्राएली टोली सीन नांओए रेगीस्तानै, संघा पाऐ तिन्नैं तिधी कादेश नगरी नेल़ आपणैं डेरै। तैहा ज़ैगा निस्सअ इस्राएली टोली झुटणा लै बी पाणीं भेटी। तेखअ बोलअ बिधाता मुसा लै इहअ, “मुसा, आपणीं हांढणें शोठी निंऊं, तेखअ बोल बडी टोल्हा सेटा डेऊई करै कि तेता का लोल़ी पाणीं निखल़अ।” ज़िहअ बिधाता बोलअ मुसा निंईं मेल़-ज़ोल़े ताम्बू भितरा का आपणीं शोठी। तेखअ किई मुसा आपणीं शोठी उझै खल़ी संघा बाही तेता करै दूई बारी टोल्हा लै। ज़ेतरी सह बाही निं मुक्कअ, तेतरी गई पारा का पाणींए गाड़ निखल़ी। पर बिधाता बोलअ मुसा और हारूणा लै, “ज़ुंण देश मंऐं इना इस्राएली लै दैनअ तिधी पजैल़णैं आल़ै निं ऐबै तम्हैं दूई रहणैं किल्हैकि तम्हैं निं इना इस्राएली सम्हनै मेरै बला दी इहअ भरोस्सअ किअ कि ईंयां मुंह पबित्र समझ़े।”
ज़ांऊं इस्राएली च़ाल़्ही साला तैणीं धारा फेर रिगीं मुक्कै और जुंणी इस्राएली बिधाता बरोध किअ त; तिंयां गऐ तै सोभ मरी। तेखअ बोलअ मुसा सोभी इस्राएली लै इहअ, “मेरी अमर गई ऐबै एकी शौआ बिहा साले हई, ऐबै निं हुंह इधा आजू तम्हां संघै थारअ सैणअ हणअ। बिधाता बी हेरअ मुल्है इहअ बोली कि हुंह निं ऐबै जरदण नदी पार टपी डेऊई सकदअ। पर बिधाता बोलअ इहअ कि यहोशू हणअ ऐबै मेरी ज़ैगा थारअ सैणअ।” संघा बोलअ मुसा सारी इस्राएली टोली नदरी यहोशू लै इहअ, “यहोशू, तूह डाह हैअ और हिम्मत कर, ताह लागणै ईंयां सोभै तेऊ देशै पजैल़णैं ज़ेता दैणें करार बिधाता इने बाब-दादै संघै आसा किई दी।”
तेखअ बोलअ तैहा ई धैल़ी बिधाता मुसा लै इहअ, “मुसा, तूह डेऊ इधी मोआब अबरीम धारा लै ज़ेता सम्हनै जरदण नदी पार येरिहो नगरी आसा। तेखअ डेऊ उझै नोबा नांओंए च़ुंडी लै, तिधा का जाणीं ताखा कनान देशे सह ज़ैगा दूर तैणीं शुझुई ज़ुंण मंऐं इस्राएली लै आसा लाई दी दैई।” तेखअ बोलअ बिधाता मुसा लै इहअ, “अह आसा सह ई ज़ैगा ज़ेते करार मंऐं आबराम, इसहाक और याकूबा संघै आसा किई दी कि तिन्नें आद-लुआदा लै दैणीं मुंह अह ज़ैगा। ऐबै हेरी मंऐं तम्हां का अह रहैऊई, पर तूह निं आप्पू जरदण नदी पार टपी ऐहा ज़ैगा पुजणअ आथी।” तेखअ हुअ इहअ कि बिधाते दास मुसा गूर गअ मोआब देशै तिधी ज़ांऐं, ज़िहअ बिधाता बोली त हेरअ द। तिधी किअ तिन्नैं मुसा लै तिहा धैल़ै तैणीं लेरा-पकारा पाई शोग ज़िहअ तिन्नों रबाज़ आसा त। मुसा हेरी ती मरनै का आजी आपणीं पदबी नूने शोहरू यहोशू का सभाल़ी। बिधाता दैनी यहोशू लै राम्बल़ी समझ़-बुध। यहोशू बी किअ तिहअ ई ज़िहअ बिधाता बोलअ त।
लुआह धैअ 16-17; गणांई 10-14; 20; 27; बधान 34 का पबित्र शास्त्रे एक काहणीं
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।