15. सह देश ज़ेते बिधाता इस्राएली लै दैणें करार आसा ती किई दी
खिरी पुजअ इस्राएली लै कनान देशै पुजणेंओ बगत एछी ज़ेते बिधाता तिन्नां लै करार आसा ती किई दी। तेऊ देशै आसा ती यरिहो नांओंए नगरी, तेता फेर-फिरदी आसा ती बड़ी भारी उछ़टी दुआल ज़ेता करै तैहा नगरीए रखबाल्ली हआ ती। यहोशू छ़ाडै तैहा नगरीए भेद लणां लै दूई दूत। तैहा नगरी रहा ती राहाब नांओंए एक कंज़री बी। ज़ांऊं तिन्नां दूते बारै थोघ लागअ; तैहा डाहै तिंयां आपणैं घरै च़ोरी, तिहअ करै बच़ी तिन्नें ज़ान। तैहा किअ इहअ किल्हैकि सह डाहा ती आप्पू बी बिधाता दी भरोस्सअ। तिन्नैं दूतै बोलअ नांहदा बारी इहअ कि ऐहा नगरीओ हणअ बनाश पर ताह निं हाम्हां तेभै होरी मारनै दैणअ, अह रही म्हारी ज़बान।
ज़ेऊ देशा दैणें करार बिधाता आसा ती किई दी, तिंयां पुजै तेता आर बाखा मांझ़ै ती जरदण नदी, पार डेऊणां लै शाची तिन्नां जरदण नदी टपणीं। बिधाता बोलअ यहोशू लै इहअ, “इना परोहिता दै सोभी का आजी दरैअ टपणैं।” ज़ेतरी तिन्नैं परोहितै जरदण नदीए दरैऊए पाणीं दी आपणीं गंईं लाई, दरैअ शुक्कअ हेरा-हेरी और पिछ़ू टप्पै सोभै इस्राएली राज़ी-राम्बल़ै जरदण नदी पार कनान देशा लै।
जरदण नदी पार टप्पी बोलअ बिधाता यहोशू लै, “तम्हैं रहै नगरी गोट दैणां लै तैर, आपणैं परोहिता लै बोला इहअ कि छ़हा धैल़ी तैणीं दैऐ नगरी फेर फेरी। परोहितै और सपाही बी किअ तिहअ ई ज़िहअ बिधाता बोलअ त।
सातुई धैल़ी दैनीं सोभी इस्राएली तैहा नगरी फेर फेरी संघा बाज़ै ज़ोरै-ज़ोरै नर्शिंगै।
ज़िहअ परमेशरै बोलअ तिन्नैं किअ तिहअ ई और यरीहो नगरी फेर-फिरदी उछ़टी दुआल ढूल़ी पठी। तिन्नैं किई सह नगरी पठी बरैबाद। तेथ बच़ै सिधै राहब कंज़री और तेसे टबर, तिन्नां निं इस्राएली पेहुश दैनअ लागणैं, बाकी किऐ सोभै खतम। ज़ांऊं कनान देशे होरी लोगै शूंणअ कि तिन्नैं किई यरिहो नगरी पठी बरैबाद, तिन्नां बी लागी तेखअ डअर कि ऐबै इहअ निं हआ कि इस्राएली हाम्हां संघै बी इहअ ई करे।
परमेशरै आसा त इस्राएली लै इहअ डाहअ द बोली कि तम्हैं निं कनान देशै रहणैं आल़ै कोही संघै किछ़ै मेल़-ज़ोल़ और बभार डाही। एकी गिबोनी नांओंए कनानी मणछै बोलअ यहोशू का झ़ुठअ कि तिंयां निं तिधी च़ाल्लै रही और तिंयां च़ाल्लै होर्ता लै, तिन्नैं किई यहोशू का अरज़ कि तिन्नां करनअ आप्पू मांझ़ै सुल्हअ। एता लै नां यहोशू और नां इस्राएली मांझ़ै बिधाते कुंणीं गूरै बिधाता का पुछ़अ और तिन्नैं टाल्लअ तिन्नां संघै मेल़-ज़ोल़ करी।
चिई धैल़ी बाद ज़ांऊं इस्राएली का थोघ लागअ कि तिंयां गिबोनी आसा कनान देशै ई रहंदै लागै दै, इस्राएली आई एते खास्सी रोश्शै कि तिन्नैं किअ हाम्हां संघै धोखअ। कनान देशै रहणैं आल़ै अमोरी राज़ै का बी गअ थोघ लागी कि इस्राएली और गिबोनीओ हुअ आप्पू मांझ़ै मेल़ ज़ोल़। तिन्नैं किई होर बी खास्सी फौज़ तैर संघा छ़ेल़अ गिबोनी संघै जुध। गिबोनी दैनअ यहोशू लै समाद कि इस्राएली तिन्नें मज़त करे।
यहोशू डेऊअ आपणीं सारी फौज़ पाई राची भितरी गिबोनी सेटा तिन्नां बाखा जुधा लै, अमोरी सैना हुई भैणीं दोती हक्की बकक्की और यहोशू छ़ेल़अ अमोरी संघै जुध।
तैहा धैल़ी त इस्राएली बाखा आप्पै जुधा करदअ लागअ द, सरगा का अल़ै अमोरी लै टोल्हा ज़िहै शरू और अमोरी बच़ै आधै-शुधै।
बिधाता डाहअ तैहा धैल़ी स़ूरज़ बी टकैल़ी ताकि अमोरी सैना हारना लै इस्राएली का खास्सा बगत भेटे और इस्राएली भेटी तैहा धैल़ी खास्सी बडी ज़ीत।
तेखअ झाल़्हुऐ होर कनानी लोग बी इस्राएली और यहोशू संघै जुधा करदै, पर यहोशू और इस्राएली लाई तिन्नां मारने ल्हल़ी-थहल़ी और कई डाहै आंघै-जैंघै करी।
इना जुधा बाद दैनअ बिधाता इस्राएले सोभी लोगा लै तेऊ करारे देशा दी हेस्सअ और सोभी लै सुख-शान्ति।
ज़ाऊं यहोशू खास्सअ प्रोढअ हुअ; तेऊ शादै इस्राएले सोभ लोग आपू सेटा लै। संघा लागा तिन्नां का तेसा करारा आद फरेऊंदअ ज़ेता मनणें तिन्नैं सीनाई धारा नेल़ बिधाता लै ज़बान दैनीं ती कि हाम्हां निं कधि बिधाता लै धोखअ दैणअ और नां तेऊए बधाने साबै ज़िन्दगी ज़िऊंणीं छ़ाडणीं।
यहोशू धैअ 1-24 का पबित्र शास्त्रे एक काहणीं
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।