16. छ़डैऊंणैं आल़ै

यहोशू मरनै का बाद छ़ाडअ इस्राएली परमेशरे साबै ज़िऊंणअ नां तेऊए हुकम अदरा जोगी समझ़ै। ज़ुंण देश करारे साबै बिधाता तिन्नां लै दैनअ त, तिन्नैं निं सोभै कनानी तेऊ देशा का बागै काढै, तेतो असर हुअ तिन्नां लै इहअ कि तिंयां लागै आप्पू ई बिधाता छ़ाडी कनानी संघै तिन्नें देओआ देबतै पुज़दै। इस्राएली किअ ज़िहअ तिन्नों दिल बोलअ तिहअ आपणीं मन-मरज़ी दी किल्हैकि तिन्नों निं कोहै राज़अ आथी त।

इहअ करै लागै इस्राएली कनानी रिती-रबाज़े साबै ज़िऊंदै और इस्राएली लै बी हुअ इहअ रबाज़ शूरू ज़ुंण बिधाता पैहलै ई त हेरअ त खोज़ी, सह हुअ इहअ करै कि इस्राएली बिस्सरूऐ खिरी बिधाता ई। बिधाता बी दैनीं तिन्नें दुशमणां तिन्नां लै सज़ा दैणैं, तिन्नें दुशमणैं लुट्टै-घशिट्टै तिंयां पठी और बतेर्है पाऐ तिन्नां मांझ़ै मारी। इस्राएलीए दुशमणैं किअ तिन्नां प्रैंदै कई साला तैणीं राज़ और ज़ुल्म तेखअ मांगी तिन्नैं आपणैं परमेशर बिधाता का माफी और खिरी लागै परमेशरा का अरज़ करदै कि हाम्हां बच़ाऊ।

ज़ांऊ इस्राएली बिधाता सेटा आपणैं पापा लै माफी मांगी, बिधाता शूंणीं तिन्नें अरज़। सह काम हुअ मसीहा करै पूरअ। तेऊ करै हणअ सोभी देशा लै मेल़-ज़ोल़। सह हुअ इहअ करै कि मसीहा लल़ण तिन्नें दुशमणा का तिन्नें बदल़ै आप्पै। राज़ बी करनअ सोभी प्रैंदै तेऊ आप्पै। बिधाता छ़ाडै तिन्नां बच़ाऊंदै कई और परमेशरै किई तिन्नां हारना लै तिन्नां ई माझ़ै एक ज़ाती खल़ी ज़ुंण मिद्यानीं आसा तै।

साता साला तैनीं रहै मिद्यानीं लोग इस्राएलीए साल-फसला लुटदै लागी, तिन्नां डरै रहा तै इस्राएली ढुंघरै-डुआरै लुक्की। खिरी किई तिन्नै बिधाता का अरज़ कि हाम्हां बच़ाऊ।

इस्राएली मांझ़ै आसा त गिदोन नांओं एक मर्ध, सह त लागअ द च़ुप्प-च़ुप्पै लुक्की करै गिंहूंए काशी शल़ाकदअ। बिधातो स्वर्ग दूत आअ तेऊ सेटा लै संघा बोलअ तेऊ लै, “ए शूर-बीर मर्धा, ताह संघै आसा बिधाता आप्पै, तूह डेऊ संघा आण इस्राएली लोगा मिद्यानीं ज़ातीए लोगा का बच़ाऊई।

गिदोने बाबै ती एक मैहरै आल़ी बेदी बणांईं दी, बिधाता बोलअ गिदोना लै इहअ कि सोभी का आजी लअ तूह ऐहा मैहरै आल़ी बेदी फाल़ी पाई। गिदोन डरा त लोगा का खास्सअ, तेऊ न्हैल़ी राच पल़दी संघा किई तेऊ सह बेदी चोल़ी फाल़ी खतम। आप्पू बणांईं बिधाता लै एक होर बेदी संघा किअ तेथ तेऊ बिधाता लै बल़ीदान करी हूम।

दुजै धैल़ै दोती ज़ांऊ होरी लोगै सह बेदी चोल़ी-फाल़ी दी भाल़ी, तिंयां हुऐ रोश्शै लाल पिंऊंल़ै। तिंयां पुजै गिदोने घरै कि एऊ करा ज़ानीं का मारी खतम। पर गिदोने बाबै बोलअ तिन्नां लै इहअ, “लै तम्हैं आपणैं देओआ देबतै बच़ाऊंदै और तिन्नें मज़त करदै? इना देबतै एतरअ ज़ोर बी निं आथी कि ईंयां आपणीं मज़त आप्पै करे!” गिदोने बाबे इना गल्ला शूंणीं हटै तिंयां पिछ़ू संघा निं तिन्नैं गिदोन मारअ आथी।

तेखअ आऐ मिद्यानी लोग बी इस्राएली लुटदै, तिंयां तै एतरै खास्सै कि तिन्नां निं कुंण गणीं सकदअ त। गिदोनै बी शादै इस्राएली आप्पू संघै कि तिंयां मिद्यानीं संघै जुध करे। गिदोनै बोलअ बिधाता लै इहअ कि मुंह लणअ जुधा का आजी भाल़ी कि सच्च़ी हणअ तूह जुधा लै मुंह संघै और तंऐं दैनीं मुल्है सच्च़ी ज़ाज़त? तै रहैऊ तूह मुखा दूई नछ़ैण हैनूं।

पैहलै नछ़ैणा लै बोलअ गिदोनै इहअ, “मुंह डाहणीं बागै धरनीं भेडे ऊंन, दूजै धैल़ै दोती लोल़ी मुंह ओशे टिप्पू तैह उना प्रैंदै पल़ै दै शुझुऐ पर होर ज़ैगा लोल़ी थाल्लै और फेर सारै दी शुक्की रही।” ज़िहअ गिदोनै बोलअ दुजै धैल़ै दोती भाल़अ तेऊ तिहअ ई। दुजै नछ़ैणा लै बोलअ गिदोनै बिधाता का भिई, “काल्ला लोल़ी ऐबै ऊन शुक्की हुई और धरनीं लोल़ी फेर ओश हुई पल़ी दी तै ज़ाणूं हुंह कि मुल्है आसा तेरी ज़ाज़त।” सह बी हुअ तिहअ ई, इहअ करै हुअ गिदोना भरोस्सअ कि बिधाता आसा तेऊ संघै।

तेखअ बेदै गिदोनै कई सपाही आपू सेटा दै और तियां सपाही हुऐ ती कोऐ 32,000 मर्ध। पर परमेशरै बोलअ इहअ की ईंयां आसा बेघै खासै, ता तेखअ छ़ाडै गिदोनै तीना मंझ़ै 22,000 सपाही घरा लै बापस ज़हा जुधा करने का डअर लागा ती। परमेशरै बोलअ ईंयां आसा अज़ी बी खास्सै। तेखअ डाहै गिदोनै सीधै 300 सपाही और बाकी भेज़ै सोभ घरा लै।

तैहा राची बोलअ बिधाता गिदोना लै इहअ, “तूह डेऊ राची मिद्यानींए ताम्बू सेटा, संघा शूंणैं राम्बल़ै करै कि तिंयां किज़ै गल्ला करा। ज़ांऊं ताख थोघ जाए लागी तेखअ निं तूह तिन्नां संघै जुधा का डरनअ आथी। ज़ांऊं गिदोन मिद्यानींए ताम्बू नेल़ डेऊअ, तेऊ शूंणअ कि एक मिद्यानीं सपाही आसा आपणैं दुजै सपाही का सुपनै खोज़दअ लागअ द। तेऊओ सुपनैओ फल आसा इहअ कि गिदोने सपाही दैणैं मिद्यानींए सपाही हारी। इना गल्ला शूंणीं लागअ गिदोन दिलै बिधाते ज़ै-ज़ैकार करदअ।

तेखअ गिदोन बी तेभी आपणैं सोभी सपाही सेटा नाठअ और संघा दैनै तीनै हाथै एक-एक नरशींगै और एक-एक माटे भांडै और एक-एक दैनै सोभीऐ हाथै मसल्लै। संघा बाहअ बै तीनै छ़ानी फेरा-फेर घेरअ और तियां मिधानी ती तेऊ बगतै सोब सुतै दै। तेखअ डेऊआ गिदोन तेभी आपणैं सपाही सेटा, तिन्नें हाथै दैनैं तेऊ एक-एक नरशिंगै, एक-एक पारू और सोभिए हाथै एक एक मसाल्लै। संघा दैनअ तिन्नैं हेरा-हेरी मिद्यानींए ताम्बू फेर गोट, मिद्यानीं तै तेभै सुत्तै दै।

जांऊं तिंयां ताम्बूए दला नेल़ पुजै तिन्नैं फाल़ै तिंयां पारू सोभी एक्की बारी, सोभी ज़ाल़ै आपणैं आपणैं मसाल्लै नढैऊऐ बाज़ै सोभी एक्की बारी नर्शिंगै, तेखअ उझ़ुई तिधी बडी भारी काठ मल़ैठी।

मिद्यानीं ठुर्है तिधा का च़ऊ पाओऐ, गिदोनै छ़ाडै तिन्नां पिछ़ू होर इस्राईली बी दर्ल़ाऊंदै, कोई पाऐ तिन्नैं मारी और कोऐ काढै तिन्नैं देशा बागै दर्ल़ाऊई। तैहा धैल़ी मूंऐं एक लाख बिह हज़ार मिद्यानीं। इहअ करै बच़ाऊऐ बिधाता इस्राएली मिद्यानी का।

एऊ जुधा बाद च़ाहा तै इस्राईली गिदोना लै कि सह तिन्नों राज़अ बणें, पर गिदोन निं तेता लै राज्ज़ी हुअ। गिदोनै बोलअ तिन्नां लै इहअ, “ज़ुंण सुन्नैं च़ंदीए गहणैं तम्हैं मिद्यानीं का लुटी आणैं, तिन्नां दैआ सोभै ओर्ही।”

तिन्नैं झाल़अ सारअ सुन्नअ गिदोना सेटा, तेता करै बणांऐं गिदोनै खास झिकल़ै ज़ुंण सिधै परोहित बान्हां तै। पर लोग लागै तेऊ मैहरै ज़िहै पुज़दै। तेखअ दैनीं परमेशरै तिन्नां लै भिई सज़ा, किल्हैकि तिन्नैं किअ हटी-फिरी तिहअ ई काम ज़ेता का बिधाता नफ़रत करा त। खिरी लागै इस्राएली बिधाता का मज़त मांगदै कि हाम्हां बच़ाऊ। तेखअ छ़ाडअ बिधाता तिन्नें मज़ती करदअ एक होर।

ईंयां एही गल्ला रही कबल्ली हंदी लागी, इस्राएली करा पाप करी और बिधाता करा त तिन्नां नैरना लै सज़ा दैई और इस्राएली बी रहा तै बिधाता का पाप माफ करना लै अरज़ करदै लागी। परमेशर करा त तिन्नें पाप माफ करी और कहा नां कहा हेरा त तिन्नां बच़ाऊंदै छ़ाडी।

और खिरी पाई तीनै होरी देशे लोगा ज़िही परमेशरा लै ईही मांग कि हाम्हां लै दै एक ईहअ राज़अ बडअ लामअं-पलामअं और खासै ज़ोरा आल़अ हुअ ताकि सह ज़ुधा दी म्हारअ होली-सोली होऐ। परमेशरा नी तीनै अह गल भाऊई पर तज़ी बी कीई परमेशरै तीनै ई मनै पूरी। खिरी पाई इस्राईली बिधाता सेटा मांग कि हाम्हां लोल़ी आप्पू लै बडअ जोधअ राज़अ ज़िहै होरी देशै राज़ै हआ। सह लोल़ी सोभी गल्ला लै म्हारअ सैणअ और जुधा लै हाम्हां बच़ाऊंणैं आल़अ हुअ। बिधाता निं तिन्नें ऐहा गल्ला लै खुश आथी त, पर तज़ी बी किई बिधाता तिन्नें दिला-मनें पूरी।