17. दाबेदा संघै परमेशरे करार।

इस्राएली मांझ़ै आसा त शाऊल नांओं एक शोभलअ बित्तअ और लाम्मअ-पल़ाम्मअ मणछ। सह बणांअ बिधाता इस्राएली लै पैहलअ राज़अ। थोल़ी साला रहअ सह बेघै राम्बल़अ पर बादा का हुअ सह खास्सअ कदुष्ट सह निं तेखअ बिधाते साबै किछ़ै करदअ त। तैही छ़ांटअ बिधाता तेऊए ज़ैगा एक होर मणछ ज़ुंण तेऊए ज़ैगा इस्राएलीओ राज़अ बणें।

ता तेखअ छ़ांटअ परमेशरै एक दाऊद नांओं एक जु़आन मर्ध शाऊले ज़ैगा राज़अ बणाणैं लै। और सह दाऊद आसा त बैतलहम नगरीओ एक भेडा च़राऊंणैं आल़अ फुआल। और तेऊ ती ज़धनी परमेशरै छ़ांटअ दाबेद नांओं एक ज़ुआन मर्ध कि सह शाऊले ज़ैगा राज़अ बणें। दाबेद आसा त बेतलेहम गरांओं और सह हआ त तेऊए बाबै भेडा फुआल डाहअ द। सह त खास्सअ नडरअ, फुआला बणैं मारै तै तेऊ कल्ही ज़ण्हैं कई सिह और भाल्लू बराघ बी ज़ुंण तेऊए डागै चैंणैं खांदै एछा तै। सह त खास्सअ धर्मीं और मानदार मणछ। सह मना त बिधाते हर गल्ला और भरोस्सअ बी डाहा त सह बिधाता ई दी।

खारकी अमरा किअ त दाबेदै गोलियत नांओंए दैंतर जोधै संघै जुध। गोलियत त चअन मिटर लाम्मअ जिंढ मर्ध। पर बिधाता किई दाबेदे मज़त और गोलियत पाअ दाबेदै मारी और इस्राएली ज़ितै। दाबेदै ज़ताऊऐ इस्राएली कई बारी तिन्नें दुशमणा का और इहअ करै हुअ सह सोभी का जोधअ सपाही और क्ई जुधा लै आसा त सह इस्राएली सैनो सैनापती। सह हुअ इहअ मशूर कि सोभ लोग करा तै तेऊए ई सराहतणीं।

एता पिछ़ू ज़िधूअ राज़अ शाऊल दाबेदा लै कि लोग लागै एऊ खास्सै सराहंदै, सह च़ाहा त दाबेदा किहअ करै मारी पाणअ। ज़ांऊं दाबेदा का थोघ लागअ, सह ठुर्हअ शाऊल और तेऊए सैना का दूर बणां लै संघा रहअ तेथ किधी डुआरै जुहल़ी लुक्की। राज़अ शाऊल और तेऊए सपाही नाठै तेऊ लोल़ै संघा पुजै तैहा जुहल़ी ज़िधी दाबेद आसा त, पर शाऊलै निं सह भाल़अ आथी। दाबेद डेऊअ पिछ़ू बाखा तेऊ नेल़ संघा काटी तेऊए झिकल़ै का धख ज़ेही शाट्टी। ज़ांऊं राज़अ शाऊल तैहा जुहल़ी सेटा का दूर ज़िहअ डेऊअ; दाबेदै लाई तेऊ लै पिछ़ू का हाक्का, संघा रहैऊ तेऊ का सह शाट्टी ज़ुंण तेऊए झिकल़ै का काटी ती। शाऊलै समझ़ी अह गल्ल कि ज़ै अह मुंह मारने ताका हंदअ; तै सका तह ऐहा शाट्टी काटणें बदल़ै मेरअ कैल़अ बी काटी! पर एऊ निं इहअ किअ! एतो मतलब आसा इहअ कि अह निं मुह मारनअ च़ाहंदअ।

थोल़ी साला बाद मूंअं शाऊल राज़अ एकी जुधा दी और तेखअ बणअ दाबेद इस्राएलीओ राज़अ और परज़ा बी झ़ूरा ती दाबेदा लै खास्सी। बिधाता दैनीं दाबेदा लै खास्सी बर्गत। दाबेद रहअ जुधा प्रैंदै जुध ज़ितदअ लागी, तेऊ निं इस्राएलीए एक दुशमण बी छ़ाडै किल्हैकि बिधाता आसा त तेऊ संघै। बादा का ज़िती तेऊ येरूशलेम नगरी संघा बणांईं सह आपणीं राज़धानीं। तिधी बी रहअ सह च़ाल़्ही साला तैणीं राज़अ और दाबेदे ज़मानैं हुअ इस्राएल बलबान देश ज़हा कोहै निं हारी सकदअ त।

दाबेद च़ाहा त बिधाता लै इहअ मांदर बणांणअ ज़िधी एछी सोभै इस्राएली बिधाते पूज़ा-गाज़ा और बल़ीदान करी सके। तिधी आसा त मेल़-ज़ोल़ो ताम्बू ज़ुंण च़ऊ शौआ साला आजी मूसा गूरै आसा त बणांअ द। सोभै इस्राएली एछा तै तिधा लै और बल़ीदान बी करा तै तिधी।

तिधी आसा त नातान नांओं बिधातो एक गूर; सह छ़ाडअ बिधाता राज़ै दाबेदा सेटा लै कि तूह बोल राज़ै दाबेदा लै इहअ कि तंऐं ज़ितै बडैभारी जुध पर मुल्है मांदर निं तंऐं अज़ी बणांअ आथी! पर मूंह दैणीं ताल्है बर्गत और तेरअ शोहरू हणअ आजू मेरी परज़ो राज़अ और तेऊ ई करनअ तिन्नां प्रैंदै सदा राज़।

नाताने इना गल्ला शूंणीं लागअ दाबेद बिधाते बड़ैई और ज़ै-ज़ैकार करदअ। इहअ थोघ निं दाबेदा का बी आथी त कि ईंयां गल्ला कधू हणीं। पर आझ़ आसा हाम्हां का थोघ कि इस्राएली न्हैल़अ सह एकी हज़ारा साला तैणीं एछदअ।

राज़ै दाबेदै किअ कई साला तैणीं आपणीं परज़ा प्रैंदै धर्मीं और शुचै रही राज़। बिधाते हुकम मनणा लै बी थिअ सह मानदार। बिधाता बी दैनीं तेऊ लै खास्सी बर्गत, पर खिरी हुई ढल़दी अमरा दाबेदे भलै घोर पाप।

एकी धैल़ै हुअ इहअ कि राज़अ दाबेद त आपणैं बेल़्है का ताकी बाती बागा लै भाल़अ लागअ द, तेऊ का शुझुई एक बेटल़ी न्हैंऊंदी लागी दी सह ती हेरनीं बेघै बित्ती। तेऊ किअ तेसे बारै थोघ कि तेसा नांअं आसा बेतशेबा।

राज़ै दाबेदे आछ रही तैहा दी लागी और तेऊ छ़ाडै आपणैं सपाही और सह पजैल़ी तेऊ आपणैं बेल़्है! बैल़ी सुत्तअ सह तैहा संघै और दोती छ़ाड़ी सह तेसे घरा लै बापस। थोल़ै धैल़ै बाद ज़ांऊं तैहा बेटल़ी का इहअ थोघ लागअ कि सह आसा पैराभारी; तैहा दैनअ राज़ै दाबेदा लै इहअ समाद कि मेरै पेटै शाचअ तेरअ शोहरू!

तैहा बेटल़ीओ मर्ध आसा त इस्राएली सैना दी खास सपाही पै, तेऊ नांअं त उरियाह और सह त तधू काला जुधा लै नाठअ द। राज़ै दाबेदै दैनअ तेऊ लै समाद कि तूह एछ घरा लै फिरी संघा रह घरै आपणीं बेटल़ी संघै। ज़ांऊं सह राज़ै सेटा पुजअ तेऊ किअ इहअ बोली नांईं कि मेरै होर साथी भाई बी आसा मुंह ई ज़िहै जुधा लै हुंह निं घरै च़ाल्लअ रही। राज़ै दैनअ तेऊ जुधा लै डेऊणैं पर सैनापति लै दैनअ तेऊ इहअ समाद कि उरियाह छ़ाडै तेऊ बाढै ज़िधी घोर जुध होए लागअ द और ज़ेथ बाखा दुशमण बलबान होए, ताकि अह जुधा दी मरे और हुअ बी तिहअ ई।

बेतशेबे लाल़ै उरियाह मरनै का बाद किअ राज़ै दाबेदै तैहा संघै बैह। आजू हुअ तिन्नों शोहरू पर बिधाता आई दाबेदे एऊ बूरै कामा लै रोश्शै। तैही छ़ाडअ त बिधाता आपणअ गूर नातान दाबेदा सेटा लै कि तेऊ का थोघ लागे कि तेऊ किहअ बूरअ काम किअ। तेखअ लागअ राज़अ दाबेद ठुंईंऐं बेशी बिधाता का माफी मांगदअ, खिरी छ़ाडी बिधाता तेऊ लै माफी और तधा बाद रहअ दाबेद आपणीं सारी ज़िन्दगी बिधाते डरा हेठै, तेखअ निं तेऊ होर किछ़ै पाप किअ।

बिधाता दैनीं दाबेदा लै तेऊए पापे एही सज़ा कि तेऊओ मूंअं सह शोहरू ई, एता का लाऊआ हुऐ दाबेदा मरनै तैणीं तेऊए कोई-कोई टबर बी तेऊए खलाफ जुधा लै और खिरी निं राज़ै दाबेदा ज़ोर-ज़ाहण रहै आथी। पर भरोस्सै करनै जोगी आसा त बिधाता ई; तेऊ किई तज़ी बी सह करा पूरी ज़ुंण तेऊ राज़ै दाबेदा संघै किई ती। बादा का हुअ दाबेद और बेतशेबो एक होर शोहरू और तेऊ नांअं डाहअ तिन्नैं सुलैमान।