18. इस्राएल बांढुअ दूई दूई राईसी दी

राज़अ दाबेद रहअ च़ाह्ल़ी साला तैण्हीं इस्राएलो राज़अ। तेता बाद गअ सह ज़ांऐं और बादा का बणअं तेउअ शोहरु इस्राएलो राज़अ तेऊ नाओं आसा त सुलैमान, बिधाता बोलअ सुलैमाना लै इहअ कि तूह किज़ै च़ाहा कि हूंह ताल्है करूं? सुलैमानै बोलअ इहअ, “प्रभु मुल्है दै तूह इहअ वरदान कि मुखा लोल़ी सोभी का खास्सी अक्ल हुई।” तेऊऐ ऐसा गला शुणीं हुअ बिधाता बडअ खुश। बिधाता दैनीं तेऊ लै सोभी का खास्सी अक्ल। तेऊ शिखल़ै कई ज्ञैन और सह हुअ खास्सअ सेठ।

सुलैमानै ई बंणांअ बिधाता लै मांदर ज़ेते बारै तेऊए बाबै त डाहअ द सोठी कि येरूशलेम नगरी बणांणअ बिधाता लै मशूर मांदर। तेता बाद हुअ मेल़-ज़ोल़े ताम्बू दी बिधाते भगती और बल़ीदान करनेओ रबाज़ खतम। ऐबै डेओआ तै सोभै मांदरा लै, पूज़ा-गाज़ा बी करा तै तिधी और बल़ीदान बी करा तै मांदरै ई ज़ुंण राज़ै सुलैमानै बणांअ। बिधाता बी हआ त तिन्नां लै तेऊ ई मांदरै प्रगट।

पर राज़ै सुलैमानै किऐ कई बैह और तेऊ आणीं ज़ैगा-ज़ैगा का और देशा-देशा का आप्पू लै बेटल़ी, इहअ करै ती तेऊए कोऐ एक हज़ार राणीं। तेऊए इहै कामां लै हुअ बिधाता तेऊ लै नराज़ किल्हैकि तिन्नां राणीं मांझ़ै आणैं कोई आपणैं पेऊकै का आपणैं देअ-देबतै बी संघा और तिंयां करा ती तिन्नें पूज़ा-गाज़ा। बुढल़दा लागअ खिरी सुलैमान बी तिन्नां देबतै पुज़दअ।

तेऊए इना इहै कामां करै फिरी बिधाता बी तेऊ लै रोश्श। बिधाता बोलअ सुलैमाना लै इहअ कि तेरै मरनै बाद हणैं इस्राएले दूई हेस्सै।

राज़ै सुलैमाना मरी करै बणअ इस्राएला दी रहबाम राज़अ। तेखअ हुअ एकी बारी इहअ कि सोभी इस्राएली किअ आपणैं नंऊंऐं राज़ै रहबामा सेटा झाल़अ, संघा लागै राज़ै सुलैमाने खरी खोज़दै कि सह त खास्सअ नर्दैई राज़अ, सह कराऊआ त हाम्हां का खास्सअ काम और और परज़ा का कारअ बी गराहा त खास्सअ। पर ताखा आसा म्हारी एही अरज़ कि तूह निं हाम्हां संघै तिहअ करी और कारै लै बी दै धख छ़ूट।

पर रहबामै दैनअ परज़ा लै इहअ ज़बाब, “मेरै बाबै सुलैमानै तम्हां खास्सअ काम कराऊअ! पर मुंह कराऊंण तम्हां का तेता का बी खास्सअ और कारअ बी लागणअ तेता का खास्सअ ई दैणअ।”

ज़ांऊं परज़ा राज़े ईंयां गल्ला शूंणीं; कई उझ़ुऐ तेऊ संघै च़िखदै खल़ै, परज़ा बांढुई दूई बाखा, बारा गोत्रा मांझ़ै दूई गोत्रे परज़ा हुई रहाब राज़ै बाखा और बाकी दस गोत्रे परज़ा हुई राज़े खलाफ़। तिन्नैं दूई गोत्रे परज़ा बोलअ इहअ कि हाम्हां लोल़ी यहूदा राईसी।

बाकी तिन्नैं दसा गोत्रै बणांअ यरोबान नांओं मर्ध आपणअ राज़अ, तिंयां रहा तै उतर-पुर्बा दिशा बाखा लाक्कै और सह राईसी हुई इस्राएल।

पर यारोबाम राज़ै कि कई बूरै काम और होरी का बी कराऊऐ तिहै ई बूरै काम ज़ेता का बिधाता नफरत करा त। तेऊ बझ़ैल़ै दूई मैहरै बणांणैं कि तिंयां तेते पुज़ा-गाज़ा करे! येरुशलेम परमेशरे मांदरा लै पूज़ा-गाज़ा करदै छ़ाडअ तिन्नैं डेऊंणअ ई।

तेखअ हुऐ यहूदी और इस्राएली आप्पू मांझ़ै काठदै-मारदै दुशमण।

इस्राएले तैहा नंईंईं राईसिए राज़ै आसा तै सोभै कदुष्ट। ज़हा बी राज़ै बणणें शौक बी रहा ती या ज़ुंण भलै राज़ै बणीं सका तै; तिंयां पा तै तिन्नां मारी।

इस्राएले तिन्नैं राज़ै डाही सारी परज़ा तिन्नां मैहरै-मुर्ती पुज़दै लाई और सोभी लागा त तेथ सेटा माथअ टेक्कणअ। होर ता होर तेखअ च़लअ इहअ रबाज़ कि तिन्नां मुर्ति सेटा लाई लोगै शोहरू-माठे बल़ी तोही करी।

यहूदा राईसीए सारै राज़ै आसा तै राज़ै दाबेदे खांनदानीं का। इना मांझ़ै कोऐ ता आसा तै भलै ज़ुंणीं धर्मीं और शुचै रही राज़ किअ, पर ज़ादै आसा तै कदुष्ट ई, तिन्नैं आणीं आपणीं परज़ा हंती-हंती मारी और तिंयां बी लागै बिधाता छ़ाडी मैहरै-मुर्ति पूज़दै और शोहरू-माठे बल़ी करदै। मतलब यहूदा राईसीए परज़ा बी पेठी इस्राएल राईसी ज़ेही ई होरी देओआ देबदै पुज़दी बिधाता छ़ाडी कबाता।