19. गूर

बिधाता रहा त इस्राएली लै कबल्लअ इस्राएली सेटा आपणैं कहा ना कहा गूरा छ़ाडदअ लागी। तिंयां गूर शूणां तै परमेशरै खोज़ी दी गल्ला पठी; तेखअ खोज़ा तै तिंयां परज़ा का।

ज़धू इस्राएल राईसीओ राज़अ अहाब आसा त, तधनी आसा त एलीआ नांओं बिधातो एक गूर बी। अहाब राज़अ आसा त खास्सअ कदुष्ट, तेऊ आसा ती सारी परज़ा बाल देओआ पूज़दी लाई। एलीआ बोलअ अहाब राज़ै लै कि हेरे बिधातो कोप आसा ताल्है पल़णैं आल़अ। बिधाता बोलअ इहअ कि ज़ेभै तैणीं हुंह निं बोले तेभै तैणीं नां सरग हणअ और नां तेभै तैणीं ओश पल़णीं। ऐहा गल्ला पिछ़ू हुअ अहाब राज़अ एलीआ लै रोश्शै लाल पिंऊंल़अ और तेऊ सोठअ इहअ कि एलीआ पाणअ तेऊ मारी।

बिधाता बोलअ एलीआ लै इहअ कि तूह रह बणैं दूर नाल़ै पाणींए सुहै सेटा लुक्की संघा रहै तूह तिधी। एलीआ किअ तिहअ ई ज़िहअ बिधाता बोलअ; संघा रहा नाल़ै लुक्की। बिधाता छ़ाडा त दोती-उडै धैल़ तेऊ सेटा लै काअ; सह आणा त धैल़ एलीआ लै च़ुंज़ी दी रोटी और शिखा। तेता खाई रहा त एलीआ नकैंसअ पल़ी और अहाब राज़ै छ़ाडै एलीआ लोल़ै सारै दी सपाही पर तिन्नां निं सह किधी भेटअ आथी।

सरगा का निं पाणीं हुअ और सारै देशै पल़अ शुक्कअ, ज़ेऊ नाल़ै एलीआ रहा त, तिधी बी शुक्कअ पाणीं पठी। तिधा का डेऊअ एलीआ दूर देशा लै, तिधी आसा ती एक गरीब बिधबा बेटल़ी। तेसो आसा त एक शोहरू और तेऊ देशै बी आसा त खास्सअ नकाल़ पल़अ द। तेसे घरै बी निं खाणां लै किछ़ै आथी त; पर तज़ी किई तैहा एलियाहो खास्सअ अदर और ज़ुंण धख आसा त, सह दैनअ एलीआ लै खाणां लै। तेखअ निं तेसे घरै किछ़ू गल्ले काम्मीं रही और नां तेसे शोहरु लै किज़ै काम्मीं हुई। तेसे पिठे द्रोठी और तेल्ले रही तधा बाद भरी ए भरी। ज़ेतरै धैल़ै नकाल़ रहअ, तेतरै धैल़ै रहअ तिन्नां का नाज़ बी खाणां लै। एलीआ बी रहअ थोल़ी साला तिधी तिन्नां ई संघै।

साढै चिई साला बाद बोलअ बिधाता एलीआ लै इहअ कि मंऐं लाअ ऐबै सरग बरशाऊई; तूह डेऊ ऐबै अहाब राज़ै सेटा संघा खोज़ कि हुंह बोला इहअ। ज़िहअ बिधाता बोलअ एलीआ किअ तिहअ ई। सह डेऊअ इस्राएल देशा लै फिरी। अहाब राज़ै ज़ांऊं एलीआ भाल़अ, तेऊ बोलअ एछी गअ भाल़ी आफ़ता पाणैं आल़अ। एलीआ दैनअ अहाबा लै ज़बाब कि आफ़ता पाणैं आल़अ निं हुअ आथी पर एतो मूल़ आसा तूह। आफ़ता पल़ी ताह करै ज़ुंणी आप्पू संघी शुचै बिधाता छ़ाडी सारी परज़ा बाल देओआ पूज़दै डाहै लाई। बिधाता बोला ताल्है इहअ कि इस्राएली राईसीए परज़ा निंऊं आप्पू संघै सोभी कर्मेल धारा लै।

अहाब राज़ै पज़ैल़ी सारी परज़ा कर्मेल धारा प्रैंदै। तिन्नां संघै तै बाल देओए गूर-पीर बी। तिंयां सोभै तै कोऐ च़ार शौ पज़ाह ज़ण्हैं। एलीआ लागअ लै बोलदअ, “तम्हां कधू तैणीं निं बिधाता बाखा लै आपणअ मन फरेऊंणअ? ज़ै बिधाता आसा, तै करा तेऊए ई पूज़ा-गाज़ा और ज़ै-ज़ैकार, ज़ै आसा बाल देअ, तै रहा सदा तेऊए पूज़ा करदै लागी।

एलीआ बोलअ बाल देओए सोभी गूरा लै, “बल्दो बल़ीदान करी डाहा तेतो मास्स बेदी प्रैंदै पर आग निं तेथ चैल़ी आथी, हुंह बी बणांऊं एक बेदी और तेथ डाहूं हूंह बल़ीदान करी पशूओ मास्स। ज़सरअ परमेशर बेदी दी उझै का आग छ़ाडे सह आसा शुचअ परमेशर। तिन्नैं किअ तिहअ ई।

पैहलै लागै तेऊ बाल देओए गूर आपणैं बाल देवतै का अरज़ करदै, कि हे बाल देओआ म्हारी अरज़ शुण। सारी धैल़ी रहै तियां तेऊ बाल देओआ का ज़ोरै-ज़ोरै अरज़ करदै लागी आपणी घेरी बी पाऐ तीनै छ़ूरी करै च़ीरै पर तेथ निं किछ़ हुअ नां बाल देओऐ बेदी दी आग लाई।

खिरी थकै तियां अरज़ करी-करी संघा छ़ुट्टी तिन्नां का छ़ाड़। ज़ाऊं तेऊ एलीए बारी आई; तेऊ बोलअ लोगा लै इहअ, “मेरी बेदी दी तरैल़ा पाणीऐ बडै-बडै हांडै। एथ पाआ एतरअ पाणीं कि ज़ेभै तैणीं बेदी ओरी-पोरीए ज़िम्मीं पठी निं भिज़ी जाए और फेर कोती दी खाल़्ही भरी निं होए तेभै तैणीं रहै पाणीं तरैल़दै लागी।

तेखअ लागअ एली बिधाता का अरज़ करदअ कि हे बिधाता हुंह करा ताखा अरज़ ज़हा आबराम, इसहाक और याकूब बी परमेशर मना तै। आझ़ रहैऊ तूह कि तूह ई आसा इस्राएलो परमेशर और हुंह आसा तेरअ दास। आझ़ शुंण तूह मेरी अरज़ ताकी इना सोभी का थोघ लागे कि तूह ई आसा शुचअ परमेशर।

एलीआ मुक्कअ एही अरज़ करी और नढैऊऐ बरशी बेदी प्रैंदा लै आग। बेदी प्रैंदै मास्स, झ़ुक्का और इधी तैणीं बेदीए पात्थर और माटअ बी दझ़अ पठी। बेदी फेर पाणीं शुक्कअ ज़ात पठी। एता भाल़ी हुऐ सोभै रहैन और तिन्नें टेक्कअ उटी बाखा धरनीं माथअ। सोभी बोलअ इहअ, “बिधाता ई आसा परमेशर, बिधाता ई आसा परमेशर।”

तेखअ बोलअ एलीआ तिन्नां लोगा लै, “एऊ बाल देओए ज़ेतरै बी गूर आसा; इना सोभी ढाका, एक्की बी निं छ़ाडी, इना पाआ सोभी मारी।

तेखअ बोलअ एलीआ अहाब राज़ै लै, “घरा लै ठुर्ह छ़ेक्कै, सरगै घोर्हुऐ घणैं काल़ै बादल़, एबै च़ाल्लै पाणींए हर्हल-खर्हल रिंगी। ज़ेतरी एलीआ गल्ला करी निं मुक्कअ तेतरी गअ पाणीं छ़ुटी और तै लागअ सोभी का थोघ कि बिधाता ई आसा परमेशर।

ज़ाऊं एलीआ ईना कामा करी मुकअ ता तेखअ छ़ांटअ तेऊ एलीशा नाओं एक मर्ध आप्पू बाद बिधातो गूर निखल़णा। ता बिधाता किऐ तेऊ एलीशा गूरे हाथै बी कई च़मत्कार। एक च़मत्कार हुअ एकी नामान नाओंए मणछा संघै। सह आसा ती एकी सैना दी बडअ सपाही, पर तेऊ ती कोहल़ निखल़ी दी। नामान कोह्ल़ी त तेऊ एलीशा गूरे बारै शुणअं द कि सह करा हर दाहा का नरोगै। नामान आअ एलीशा गूरा सेटा संघा लागअ तेऊ का अरज़ करदअ कि मूंह कर एसा बमारी का नरोगै। एलीशा गूरै बोलअ तेऊ लै कि जरदण नदीए पाणीं दी दैऐ साता बारी डुबकी।

नामान कोहल़ी आई तेते बड़ी बडी भारी रोश्शै कि एलीशा गूरै भाल़ केही ऐडी गल्ल किई और तेऊ देनअ एलीशा लै ज़बाब कि मंऐं निं लाई डुबकी दैई। पर बादा का लागअ सह आपणैं मनैं सोठदअ कि च़ल्ल ज़िहअ अह बोला तिहअ करूं हैनूं कि किज़ै हणअ। संघा लागअ सह जरदण नदी दी डुबकी दैंदअ। ज़ांऊं सह सातूई बारी पाणीं दी डुबकी दैई पाणीं का बागै निखल़अ, सह तैहा कोहल़े बमारी का ज़ात राम्बल़अ।

बिधाता छ़ाडै होर बी आपणैं कई गूर इस्राएली सेटा। तिन्नैं सोभी त इस्राएली लै खोज़ी बोली करै नांई किअ द कि देअ-देबते मैहरै मुर्ति बणांई पूज़ा करनीं छ़ाडा। आप्पू डाहै एक्की दुजै संघू भलअ बभार और एकी-दुजै लै करै झींण। बूरै काम करनै छ़ाडै पोर्ही। तम्हैं करै तिहअ ज़िहअ बिधाता च़ाहा कि तम्हैं करे। ज़ै तम्हैं इहअ नांईं करे; तै पल़णीं तम्हां सज़ा भुगतणीं।

इस्राएली गअ त खास्सअ बगत हई; तिंयां निं बधाते साबै ज़िन्दगी ज़िऊई निस्सै तै। परमेशर छ़ाडा त तिन्नां सेटा लै आपणैं गूर पर तिंयां करा तै तिन्नां संघै बी खास्सअ बूरअ बर्ताअ। कोऐ गूर पाऐ तै तिन्नैं मारी बी। तिन्नां मांझ़ै त बिधातो एक यिर्मयाह नांओं गूर। सह पाअ तिन्नैं लूणैं पाणींए एकी शुक्कै डुघै कुहै दी कि सह लोल़ी तेथ मूंअं। तेऊ कुहे थाल्लै आसा ती खास्सी च़िकरै और यिर्मयाह लागअ तेथ उंधै डुबदअ; पर राज़ै फिरी तेऊ लै झींण और तेऊ दैनअ सपाही लै हुकम कि एऊ काढा उझै अह निं लोल़ी मूंअं।

बिधाते गूर रहा तै लोगा का खोज़दै लागी कि बिधाता तिन्नां लै किज़ै बोला। तिन्नां संघै लोगै ज़ेतरअ बी बूरअ बर्ताअ किअ, तज़ी बी रहै तिंयां लोगा लै चतैनगी दैंदै लागी कि ज़ै तम्हैं बिधाता सेटा आपणैं पापा लै माफी नांईं मांगे, तै करनअ परमेशा थारअ बनाश। तिन्नैं तिन्नां का इहअ बी डाहअ खोज़ी कि बिधाता आसा तम्हां लै करार किई दी कि तेऊ छ़ाड़णअ तम्हां बच़ाऊंणां लै एक मसीहा।