20. गुलामीं दी डेऊंणअ और बापस फिरनअ

इस्राएल और यहूदा राईसी किअ दुही बिधाते खलाफ घोर पाप। तिन्नैं चोल़ी बिधाता संघै सह करार ज़ुंण तिन्नैं सीनाई धारा बिधाता संघै किई ती। बिधाता छ़ाडै तिन्नां सेटा लै आपणैं कई गूर बी समादा लई कि तिंयां आपणैं पापा लै माफी मांगे और बृथा मैहरै-मुर्ति छ़ाडी बिधाता बाखा फिरे। पर तिन्नैं निं तिन्नां गूरे एक गल्ल बी मनी।

तेखअ डाही बिधाता बी तिन्नां बाखा लै पिठ फरेऊई और तेऊ दैनअ तिन्नां तिन्नें दुशमणें बशै पल़णैं। तिन्नों दुशमण अश्शूर राज़अ त खास्सअ बलबान गअ द हई। सह त खास्सअ नर्दैई और तेऊ किई इस्राएले राईसी बरैबाद औ बडै भारी खास्सै इस्राएली पाऐ तेऊ मारी। तिंयां लुट्टै तेऊ ज़िहै नां किहै, सारअ देश किअ तेऊ दहई पलुशी खतम।

तेऊ निंऐं इस्राएली मांझ़ा का इहै-इहै लोग झाल़ी ज़ुंण खास्सै सेठ आसा तै और ज़ुंण किम्मती च़ीज़ा ज़ाणां तै बणांईं और तेऊ निंऐं इस्राएलीए सोभै मुखिऐ अप्पू संघै गुलाम बणांईं। इस्राएल बच़ै पिछ़ू थोल़ै ई लोग।

अश्‍शूरी निंऐं इस्राएली तिधा का बाघलै देशा लै और ज़ुंण अशूरी तिधी रहै तिन्नैं बसाऊई तिधी एक नगरी संघा लागै इस्राएली संघै बैहूंदै-ठैहुंदै और इहअ करै पल़अ तैहा नगरी नांअं सामरी।

यहूदा राईसीए लोगै भाल़ी ईंयां गल्ला कि एस्राएली संघै किज़ै-किज़ै हुअ और अह सज़ा भेटी तिन्नां एता लै कि तिन्नैं निं बिधातो हुकम मनअ। पर तज़ी बी रहै तिंयां यहूदी कनानी देओआ देबते मैहरै पूज़दै लागी। बिधाता छ़ाडै तिन्नां सेटा लै समादा पजैल़ै आपणैं बतेर्है गूर कि इना मुर्ति पूज़णें पा छ़ाड़ पर तिन्नैं निं एक्कीए बी शूणीं।

शौआ साला बाद किई अश्शूरी लोगै इस्राएल राईसी पठी बरैबाद। बाबेल देशो आसा त एक खास्सअ बलबान राज़अ; तेऊ नांअं त नबूकदनेसर। बिधाता लाई तेऊ लै एही बुध कि सह डेऊअ यहूदा राईसी गोट दैई गिम्मदअ। यहूदा राईसीओ राज़अ बणांअ नबूकदनेसरै आपणअ गुलाम। तेऊ संघै हुअ इहअ सुल्हअ कि हर साल लागणअ यहूदा राईसीए राज़ै नबूकदनेसरा लै कारअ दैणअ।

पर थोल़ी साला बित्तणैं बाद हुअ यहूदा राईसीओ राज़अ बाबेल देशे राज़े खलाफ। बाबेल देशै छ़ेल़अ यहूदा संघै जुध और येरूशलेम नगरी बिधातो मांदर बी किअ तिन्नैं ढोल़ी खतम और सारी नगरी गिम्मीं आप्पू लै।

बाबेल देशो बरोध करनै पिछ़ू पाअ यहूदे राज़ैओ शोहरू मारी और राज़अ किअ आछीओ कांणअ, संघा निंअ बान्हीं करै बाबेल देशा लै। तिधी डाहअ सह तिन्नैं कैदखानैं दी मर्दअ लाई।

बाबेले राज़ै नबूकदनेसरै निंऐं यहूदा राईसी बस्सै दै लगभग सारै ई लोग बाबेल देशा लै गुलाम बणांईं। पिछ़ू डाहै सिधै गरीब मणछ ई; ताकि तिंयां ज़िम्मींदारअ करी सके। अह त बिधाते परज़ा इस्राएली लै गुलामींओ बगत। ज़ेथ बिधाता तिंयां आपणैं करारे देशा का दूर निखल़णां लै मज़बूर किऐ।

तिन्नां लै दैनीं बिधाता तिन्नें पापा पिछ़ू सज़ा और तैही पाऐ तिंयां गुलामीं दी। पर बिधाता निं तज़ी बी तिन्नां संघै किई दी आपणीं करार बिसरी। सह रहअ तिन्नें हेर-सभाल़ करदअ लागी और आपणैं गूरा बाती रहअ तिन्नां संघै खोज़दअ-बोलदअ लागी। तिन्नां लै डाहअ बिधाता इहअ बोली कि सत्तरा साला बाद आणणैं मुंह तम्हैं एऊ देशा लै बापस फरेऊई।

कोऐ सत्तरा साला बाद हुअ फारसी राज़ै कुसरू और बाबेल देशे राज़ै आप्पू मांझ़ै जुध। तेथ हारअ बाबेल राज़अ फारसी राज़ै का। तेखअ हुअ बाबेल देशै फारसी राज़ैओ राज़। बाबेल देशै रहणैं आल़ै इस्राएली लै बोला तै यहूदी। तिन्नां मांझ़ै काटी कई आपणीं सारी ज़िन्दगी बाबेल देशै ई। सोभ तै बिसरी मुक्कै दै पर ज़ुंण धख प्रोढै मणछ आसा तै बच़ै दै; सिधी तिन्नां ती आपणैं देश यहूदे आद।

तिंयां फारसी लोग तै खास्सै बलबान, पर ज़हा देशा तिंयां ज़ित्ता तै, तिन्नां संघै निं तिंयां बूरअ बभार करदै तै। ज़ांऊं बाबेल देशै बी फारसी राज़अ कुसरू राज़अ बेठअ, तेऊ दैणअ थोल़ै धैल़ै बाद इहअ हुकम कि ज़ुंण बी यहूदी आपणैं देशा लै बापस डेऊंणअ च़ाहा; तिंयां लागा डेऊंदै। तिन्नां लै दैनैं तेऊ बिधाते मांदरा बणांणां लै ढब्बै बी। तेखअ फिरै थोल़ै ज़िहै यहूदी सत्तर साले गुलामीं का आज़ाद हई येरूशलेम नगरी लै बापस।

और ज़ाऊं तियां लोग यरुशलेम पुज़ै ता तेखअ च़ीणअं तीनै सह मांदर भी और नगरै च़हु फेर्है दुआली बी च़ीणीं भी। पर तीना प्रैंधै राज़ त तज़ी बी फरीसी लोगअ ई। येरुशलेम पुजी च़िणअ तिन्नैं बिधातो सह मांदर भिई और नगरी फेर-फिरदी दुआल बी च़िणीं। पर तिन्नां प्रैंदै राज़ आसा त तज़ी बी फारसी राज़ैओ।