21. परमेशर करा मसीहे बारै सकल़्प

ज़धू बिधाता अह संसार बणांअ, तेऊ का आसा त तधू ई थोघ कि खिरी लागणअ तेऊ एऊ संसारा बच़ाऊंणां लै मसीहा छ़ाडणअ। आदम और ज़नांनी लै त बिधाता बच़न दैनअ द कि तेरी आद-लुआदा चल़ेपणअ दानुंईंओ (मतलब राख्सो) मूंड ज़ुंणीं राख्सै तम्हैं कबाता पाऐ।

बिधाता त आबरामा लै बच़न दैनअ द कि ताह करै भेटणीं सारै संसारे लोगा बर्गत और तेऊ बच़ना पूरै करदअ छ़ाडणअ मुंह संसारा लै मसीहा। तेऊ मसीहा करनअ संसारे सोभी लोगो तिन्नें पापा का उध्दार।

आपणैं गूर मूसा लै बी आसा त बिधाता बच़न दैनअ द कि खिरी छ़ाडणअ मुंह ताह ई ज़िहअ आपणअ गूर और सह हणअ मसीहा।

राज़ै दाबेदा लै बी आसा त बिधाता इहअ ई बच़न दैनअ द कि तेरी खांनदानीं दी हणअ मसीहो ज़ल्म और सह हणअ मुंह बिधाते सारी परज़ा प्रैंदै राज़अ।

एकी बारी हुअ इहअ कि बिधाता बोलअ आपणैं गूर यिर्मयाह लै इहअ, “शुंण, आजू एछणैं इहै धैल़ै, मुंह करनीं तिन्नां धैल़ै आपणीं इस्राएली और यहूदी परज़ा संघै करार। अह करार हणीं तैहा करारा का होरी साबे ज़ुंण मंऐं तिन्नें बाब-दादै संघै किई ती। अह करार आसा एही कि मुंह बसाऊंणअ आपणअ बधान तिन्नें हिक्का दी। तिंयां हणीं मेरै राज़ा दी मेरी परज़ा और हुंह हणअ तिन्नों राज़अ। होछ़ै का उझै प्रोढै तैणीं हणअ मेरै बारै सोभी का थोघ। ज़ुंण मेरै तेऊ बधाना मनें, तिन्नें करनै मुंह सोभ पाप माफ।”

पैहलकै ज़मानै ज़ुंण बिधाते गूर आसा तै, तिन्नैं आसा एही गल्ला प्रगट किई दी कि मसीहा बी हणअ बिधातो गूर ई। एक गूर आसा इहअ ज़ुंण बिधाता का शूंणा और सह खोज़ा होरी लोगा का तेऊए एछणें बारै ज़हा छ़ाडणें बिधाता करार आसा किई दी। तेऊ शुंणनीं बिधाते गल्ला राम्बल़ै करै और लोगा का बी खोज़णीं तिंयां तेही ई।

इस्राएली परोहित करा तै लोगे पाप माफी लै बिधाता सेटा पशूओ बल़ीदान संघा करा तै पाप माफी लै अरज़। पर मसीहा हणअ माहा परोहित ज़हा बिधाता सेटा होरीए पापे बदल़ै आपणअ बल़ीदान करनअ, तेखअ निं संसारै पाप माफी लै होर किछ़ू गल्ले बल़ीदान करने ज़रुरत रहणीं।

राज़ै और मुखिऐ करा राईसीए सोभी लोगा प्रैंदै राज़ पर तिन्नें भलै बी जाआ किज़ै नां किज़ै भूल-च़ूक हई। राज़ै दाबेदो राज़ आसा त सिधअ इस्राएली लोगा प्रैंदै, पर आजू हणअ राज़ै दाबेदै खांनदानी दी मसीहो ज़ल्म, तेऊओ राज़ हणअ सारै संसारा प्रैंदै। सह निं भूल-च़ूक करदअ तेऊ करनअ शुचअ नसाफ।

पराणैं ज़मानैं ओर्ही खोज़ी बिधाते कई गूरै मसीहे बारै कई गल्ला। तिन्नां मांझ़ै त बिधातो एक गूर; तेऊ नांअ त मलाकी। तेऊ ती एही गल्ला प्रगट किई दी कि मसीहा एछणैं का आजी एछणअ एक होर गूर और बिधातो सह गूर होणअ सोभी का खास। बिधाते गूर याशायाह आसा इहअ डाहअ द लिखी कि मसीहो ज़ल्म हणअ कुंआरी शोहरीए ओदरा का। बिधाते गूर मिका आसा इहआ खोज़अ द कि मसीहो ज़ल्म हणअ बेतलेहम नगरी।

याशायाह गूरै खास्सी साला आजी इहअ डाहअ द खोज़ी कि मसीहा रहणअ गलील लाक्कै और तेऊ दैणीं रैनै-गरीब और दुखी लोगा लै शांती। रोगी, लैंगल़ै, डुंडै, डाट्टै-टऊंणैं और नबिज़री बमारी आल़ै करनै तेऊ नरोगै।

तेऊ गूरै त खास्सी साला आजी ई इहअ डाहअ द खोज़ी कि लोगा करनीं मसीहा लै नफरत और तेऊओ बरोध बी, तेऊओ हणअ आपणअ ई साथी तेऊ लै धोखै दैणैं आल़अ, तेऊ कामां लै लणीं तेऊ दुशमणां का तिह च़ंदीए सिक्कै रेशपत। लोगा निंणअ मसीहा ढाकी संघा पाणअ सह मारी और तेऊए घेरीए झिकल़ै बांडणैं तिन्नां परच़ी पाई।

मसीहे मौते बारै बी आसा खास्सी साला आजी बिधाते कई गूरै गल्ला खोज़ी हेरी दी कि तेऊए मौत केऊ साबै हणीं और केभै हणीं। याशायाह गूरै आसा मसीहे बारै इहअ बी डाहअ द लिखी कि तेऊओ निं किछ़ै कशूर हणअ पर तज़ी बी करनै लोगा तेऊए बूरै हाल। तेऊए मुंहैं थुक्की करनअ सह तिन्नां बेईज़त संघा च़िकणअ सह कोल़ै करै, मुंडै बन्हैंऊंणअ तेऊ लै झ़रीलै कांडैओ मुगट और खिरी बिन्हणअ सह कुछी का बरछ़ै करै।

मसीहे बारै त इहअ बी हेरअ द पैहलै ई खोज़ी कि तेऊ निं आपणीं ज़िन्दगी दी किछ़ पाप करनअ पर संसारे मणछे पापा पिछ़ू दैणीं तेऊ आपणीं ज़ान। तेऊए बल़ीदान हणैं करै भेटणीं संसारे सोभी लोगा परमेशरा सेटा डेऊंणे बात। बिधाता आसा सह तैही छ़ाडअ द कि सह एऊ संसारा बच़ाऊंणे कामा पूरअ करे।

मसीहे बारै आसा इहअ बी खोज़अ द कि बिधाता करनअ सह तेऊए मरनै का बाद चिऐ धैल़ै भिई ज़िऊंदअ। इना गल्ला का लागा थोघ कि अह आसा बिधाता मणछा लै नंऊंईं करार डाही दी सोठी।

ईंयां सारी गल्ला आसा ती बिधाता आपणैं गूरा का डाही दी खोज़ी कि आजू किज़ै आसा हणैं आल़अ। तिन्नें ज़मानै बी निं मसीहा धरती दी आअ आथी त। इना गल्ला प्रगट करनै पोर्ही लागणअ त मसीहा च़ऊ शौआ का बी खास्सी साला तैणीं धरती दी एछदअ न्हैल़णअ। ज़ुंण बगत बिधाता छ़ांटी त डाहअ द; तेऊ छ़ाडणअ त सह तेभै ई।