22. यहून्नों ज़ल्म

बिधाता करा त मणछा संघै आपणैं गूरा बाती गल्ला और गूर खोज़ा तै बिधाता का गल्ला शूंणीं लोगा का। खिरी निं तेखअ बिधाता च़ऊ शौआ साला तैणीं कोही गूरा बाती मणछा संघै किछ़ै गल्ला किई। एतरी साला निभी करै छ़ाडअ बिधाता जकर्याह नांओंए परोहिता सेटा आपणअ स्वर्ग दूत। जकर्याहे लाल़ी ती इलिशिबा और सह ती बिधाते डरा हेठै रहणैं आल़ी। तिंयां दुहै गऐ तै खास्सै प्रोढै हई और आजू निं तिन्नें आद-लुआद किछ़ै आथी ती हुई दी।

स्वर्गदूतै बोलअ जकर्याह लै इहअ कि तेरअ हणअ आजू एक शोहरू, तूह डाहै तेऊओ नांअ यहून्ना। बिधाता दैणीं तेऊ लै आपणीं पबित्र आत्मां और तेऊ पजैल़णैं खास्सै लोग मसीहा सेटा। पर जकर्याह बोलअ स्वर्ग दूता लै इहअ कि हुंह और मेरी लाल़ी गऐ खास्सै बुढल़ै हई! म्हारी किधी च़ाल्ली ऐबै लुआद हई! हुंह किहअ करै करूं तेरी गल्ला दी भरोस्सअ कि ज़ुंण तूह बोला तिहअ हणअ सच्च़ी?

तेऊ स्वर्ग दूतै बोलअ जकर्याह लै इहअ कि हुंह आसा आप्पै बिधाता आप्पै ताह सेटा लै एऊ खुशीए समादा पजैल़अ छ़ाडअ द, किल्हैकि ताह निं भरोस्सअ आथी।

तेखअ हुअ इहअ कि ज़धू इलिशिबा पैरभारी हई छ़हुअ भिन्नअ त लागअ द, सह ई स्वर्ग दूत आअ इलिशिबे रिश्तेदार मरिअमा सेटा। मरिअम ती कुंआरी शोहरी और तेसे आसा ती युसुफ नांओंए मणछा संघै बरनीं डाही दी लाई। स्वर्ग दूतै बोलअ तैहा लै बी इहअ कि तूह हणीं पैरभारी, तेरअ हणअ भाऊ और तेऊ नांअं डाहै तू ईशू। सह हणअ महान परमेशरो शोहरू और सारै संसारा प्रैंदै हणअ तेऊओ राज़।

मरिअम लागी स्वर्ग दूता लै बोलदी कि इहअ किधी सका हई! हुंह आसा कुंआरी नां अज़ी मेरअ बैह हुअ! स्वर्ग दूतै समझ़ाऊई सह कि तेरै ओदरै एछणअ परमेशरे पबित्र आत्मां करै शोहरू। तैही हणअ सह शोहरू बी पबित्र। स्वर्ग दूते इना गल्ला शूंणीं किअ मरिअमै विश्वास।

इना गल्ला हणैं बाद डेऊई मरिअम इलिशिबे घरा लै, ज़ेती तिंयां दुहै एकी दुजै का राज़ी-खुशी पुछ़दी लागी, तेतरी गअ इलिशिबे पेटै च़ुकदअ लागी। तिंयां दुहै हुई खास्सी खुश और तिंयां दुहै रही चिई भिन्नैं तैणीं कठा और च़ऊथै भिन्नैं आई मरिअम घरा लै।

इलीशिबा सूई और तेसो हुअ भाऊ, तेऊ नांअ डाहअ तिन्नैं यहून्ना। जकर्याह लागअ परमेशरे बड़ैई और ज़ै-ज़ैकार करदअ कि हे बिधता आपणैं लोगे हेर सभाल़ करदअ आसा तूह ई। जकर्याह लागअ शोहरू भाल़ी इहअ बोलदअ, “तूह हणअ तेऊ परमेशर बिधातो गूर ज़हा का सारअ बल आसा। ताह खोज़णअ लोगा का कि तिन्नें पापा लै परमेशरा का किहअ करै भेटणीं माफी।”