23. ईशूओ ज़ल्म

एक धर्मीं मणछ थिअ, तेऊ नांअ त युसुफ और तेऊए ती मरिअम नांओंए एकी शोहरी संघै बरनीं डाही दी लाई। ज़ांऊं तेऊ का थोघ लाग कि मरिअम हुई बैहा का आजी पैरभारी; तेऊ किअ मरिअमा छ़ाडणैंओ बच़ार कि तैहा संघै निं तेऊ ऐबै बैह करनअ, और तैहा शोहरीए बदनामीं बी निं सह च़ाहंदअ त। सह त इहअ सोठदअ ई लागअ द कि एक स्वर्ग दूत आअ तेऊए धैनै सुपनै संघा किई तेऊ संघै गल्ला कि

युसुफ, तूह निं मरिअमा संघै बैह करनै का डरी आथी, तेसे ओदरै ज़ुंण शोहरू आसा; सह आसा पबित्र आत्मां करै आअ द। ज़ेभै तेऊ शोहरूओ ज़ल्म होए, तूह डाहै तेऊओ नांअं ईशू ( मतलब बच़ाऊंणैं आल़अ) किल्हैकि एऊ करै भेटणीं संसारा आपणैं पापे माफी।

तेखअ किअ युसुफै मरिअमा संघै बैह संघा आणीं तेऊ सह आपणै घरा लै। पर ज़ेभै तैणीं तेऊ शोहरूओ ज़ल्म निं हुअ, तेभै तैणीं निं सह तैहा संघै सुत्तअ-बेठअ आथी।

तेऊ ज़मानै आसा त सारै देशै रोमी राज़, तिन्नां धैल़ै त रोमीं माहाराज़ै अगस्तूसै इहअ हुकम किअ द कि सोभी लागणैं आपणैं नांअ दर्ज़ करनै और मरिअमें आसा तै सूंणें धैल़ै सिक्कै दै। सोभै डेऊए आपणीं आपणीं नगरी लै और युसुफा बी पल़अ डेऊंणअ। युसुफ और मरीअम आसा तै दुहै राज़े दाबेदे खांनदानीं का और तैही डेऊऐ युसुफ और मरिअम दुहै ज़ण्हैं गलील लाक्कै बेतलेहम नगरी लै नांअं दर्ज़ करदै।

ज़ांऊं युसुफ और मरिअम बेतलेहम नगरी पुजै; तिन्नां निं तिधी रहणां लै ज़ैगा भेटी, तेखअ रहै तिंयां गौशाल़ा दी डागै-चैणें घाह-पाणीं दैणें च़राठी नेल़ बेशी। मरिअमा लागी सुणें दाह और तेसो हुअ भाऊ और तेऊ नांअं डाहअ तिन्नैं ईशू।

तैहा ई राची हुअ इहअ कि ओर्ही-पोर्ही आसा तै दहल़ै फुआल आपणीं भेडा-बाकरीए पहरी बेठै दै। तिन्नां लै हुअ च़मच़मांदै झ़ामणां जैंदरी स्वर्गदूत प्रगट। तिंयां फुआल डरै तेऊ स्वर्गदूता भाल़ी। पर तेऊ स्वर्गदूतै बोलअ तिन्नां लै इहअ, “तम्हैं निं लागा डरदै, हुंह आसा तम्हां का खुशीए समादा खोज़दअ आअ द; बेतलेहम नगरी गअ राज़ै दाबेदे खांनदानीं दी मसीहो ज़ल्म हई।

तम्हैं डेओआ भाल़ै, सह भेटणअ तम्हां गोशाल़ा दी तेऊए ईजा संघै। इना गल्ला करदी भर्हुअ सारअ सरग स्वर्गदूता करै और तिंयां लागै खुशी-खुशी परमेशरे ज़ै-ज़ैकार करदै।

तेऊ स्वर्गदूते गल्ला शुंणी फिरअ तिन्नां फुआला तेऊ शोहरू भाल़णैंओ खास्सअ च़ाअ, तेखअ डेऊऐ तिंयां फुआल तेभी आपणीं भेडा-बाकरी छ़ाडी तेऊ शोहरू भाल़ै। तिधी पुजी भाल़अ तिन्नैं कि सह शोहरू आसा सच्च़ी आपणीं माए कऊटी दी सुत्तअ द। तेखअ फिरै तिंयां आपणीं भेडा बाकरीए हेल़्ही सेटा लै बापस संघा लागै परमेशरे ज़ै-ज़ैकार करदै।

पुर्बा देशा बाखा आसा तै जोतषी तिन्नां त खास्सअ ज्ञन, तिंयां लाआ तै सरगे तारै भाल़ी जोतष कि संसारै किज़ै हुअ। तिन्नां का गअ थोघ लागी कि संसारै हुअ मसीहो ज़ल्म। तिन्नां का गअ थोघ लागी कि सह च़मच़मांदअ तारअ टेक्कअ राज़ै दाबेदे डेरै प्रैंदै। तिन्नां का गअ थोघ लागी कि यहूदा देशै बेतलेहम नगरी हुअ मसीहो ज़ल्म। तिन्नैं जोतशी बोलअ आप्पू मांझ़ै इहअ कि हाम्हां डेऊंणअ मसीहे दर्शण करदै बेतलेहम नगरी लै, संघा पुजै तिंयां पुछ़दी ज़ाच़दी तिधी ज़िधी ईशू और तेऊए ईज-बाब आसा तै।

तेऊ शोहरू भाल़ी लागै तिंयां सात जोतषी तेऊए पैरा बंददै और तेऊ सेटा माथै टेकदै। तिन्नैं किई तेऊ शोहरू लै कई किम्मती च़िज़ा भेंट और तेखअ फिरै तिंयां आपणैं देशा लै बापस।