24. यहून्ना दैनीं ईशू लै डुबकी

इलिशिबा और जकर्याहो शोहरू निखल़अ बडअ हई करै परमेशरो गूर। सह रहा त रेगीस्तानै और तेथ खाआ त सह सिधअ मखीर और रैट्टै बुटी। घेरी हआ तै तेऊ ऊंटे ऊने झिकल़ै बान्हैं दै।

यहून्ना सेटा लै लागै नगरी-गराऊंआं का खास्सै लोग तेऊए गल्ला शूंणै नांहंदै। सह खोज़ा त सोभी लोगा का इहअ कि पाप करनअ छ़ाडी, आझ़ा का पैहलै ज़ुंण पाप किऐ तेता लै मांगा परमेशरा का माफी किल्हैकि ऐबै गअ स्वर्गो राज़ नेल़ एछी।

यहून्नें समादा शुंणीं लागै खास्सै लोग परमेशरा का माफी मांगदै संघा लई यहून्नें हाथै जरदण नदी दी डुबकी। यहूदी धर्में परोहित और मुखिऐ बी एछा तै तेऊ भाल़ै कि अह किज़ै करा और किज़ै बोला। पर तिन्नैं निं तेऊए गल्ला मनीं नां आपणैं पापा लै परमेशरा का माफी मांगी।

यहून्नां बोलअ तिन्नां परोहित और मुखिऐ लै, “तम्हैं आसा शपैल़ा ज़िहै झ़रीलै, पाप करनअ छ़ाडा संघा मांगा परमेशरा सेटा माफी। किल्हैकि ज़ुंण बूट फल़ निं दैंदअ, तेता पाआ सह गोधी का काटी करै आगी जैंदरी दहई।” अह हुई खास्सी साला आजी बिधाते गूरै बोली पबित्र शास्त्रे सह गल्ल पूरी, “मसीहा छ़ाडणैं का आजी छ़ाडणअ मुंह तेऊ आजू एक होर गूर ज़हा तेऊए सुआगत करना लै शुंहीं-शोधी बात आज़री डाहणीं करी।”

यहूदी धर्में कोऐ मुखिऐ लागा यहून्ना का पुछ़दै कि तूह मसीहा आसा? यहून्ना बोलअ इहअ कि हूंह निं मसीहा आथी, मसीहा आसा एतरअ महान कि हुंह निं तेऊए पोलल़े तस्समै कोल़्हणैं जोगी बी आथी। सह आसा एछणैं आल़अ।

इना गल्ला हणें दुजै धैल़ै त यहून्ना जरदण नददी दी लोगा लै पाप माफीए डुबकी दैंदअ लागअ द। ईशू बी आअ तेऊ सेटा लै। तेऊ भाल़ी हेरअ यहून्ना दूरा ई का बोली कि भाल़ा, अह आसा परमेशरो शोहरू; मसीहा गअ एछी।

यहून्नां बोलअ ईशू लै हूंह निं ताल्है डुबकी जोगी आथी, मुंह लागा हधू तेरै हाथै पै डुबकी लणीं। ईशू बोलअ यहून्ना लै, “एभै हणअ इहअ ई ठीक कि मुंह लणीं तेरै हाथै डुबकी।” ईशू दी निं किछ़ै पाप दोश आथी त, पर तज़ी बी लई तेऊ डुबकी।

ज़ांऊं ईशू पाणीं दी डुबकी दैई उझै उझै उझ़ुअ, स्वर्गा का आई पबित्र आत्मां पालल़ी ज़ेही संघा बेठी ईशू प्रैंदै। तेखअ शुंण्हुंअ सरगा का बिधातो इहअ बैण, “अह आसा मेरअ शोहरू, एऊ लै झ़ुरा हुंह खास्सअ और हुंह आसा एऊ लै खुश।”

ईंयां गल्ला ती परमेशरै यहून्ना का खोज़ी हेरी दी डाही कि डुबकी दैंदा बारी ज़हा दी पबित्र आत्मां एछे; सह ई हणअ परमेशरो शोहरू मसीहा। सह आसा एक्कै।