25. राख्सा लागअ ईशू परखदअ

डुबकी लणैं का बाद निंयं पबित्र आत्मां ईशू उज़ल़ रेगीस्ताना बाखा लै, तिधी रहअ च़ाल़्ही धैल़ी च़ाल़्ही राची तैणीं भुखअ नचिशअ। राख्स लागअ कई च़िज़ा रहैऊई ईशू परखदअ।

सोभी का आजी बोलअ राख्सै ईशू लै इहअ, “ज़ै तूह सच्च़ी परमेशरो शोहरू आसा तै लोल़ी तैरै बोल़णैं करै ताल्है ईंयां पात्थर रोटी बणीं ताकि तूह तेता खाई आपणीं पेटे भुख बशैल़ी सके।”

तेता लै दैनअ ईशू राख्सा लै इहअ ज़बाब, “परमेशरे बधाना दी आसा इहै बैण खोज़ै दै कि मणछ निं सिधअ रोटी करै ज़िऊंदअ, सह सका परमेशरे खाखा का निखल़ै दै हरेकी बैणां करै बी ज़िऊंदअ रही।”

तेखअ निंअं राख्सै उछ़टी ज़ैगा लै, संघा बोलअ ईशू लै इहअ, “ज़ै तूह परमेशरो शोहरू आसा; तै दै इधा का उंधै छ़ाहल़ और ताह च़कदै एछणैं परमेशरे स्वर्गदूत, तिन्नां च़कणअ तूह हाथो-हाथ और ताह निं तिन्नां पेहुश बी दैणीं लागणैं।”

पर ईशू निं राख्से एक गल्ल बी मनी, तेऊ दैनअ राख्सा लै इहअ ज़बाब, “परमेशरै आसा इहअ डाहअ द खोज़ी कि तम्हैं निं आपणैं परमेशर बिधाता परखदै लागी।”

तेखअ रहैऊअ राख्सै ईशू का संसार कि भाल़ राज़ी मौज़ी रहणां लै किज़ै-किज़ै निं आथी, ईंयां गल्ला हणीं सोभै तेरी ज़ै तूह मुह सेटा माथअ टेकी मेरी बड़ैई करे।

ईशू बोलअ राख्सा लै, “मेरी आछी आजू का डेऊ पोर्ही, परमेशरै आसा इहअ बोलअ द कि आपणैं प्रभू परमेशरा छ़ाडी निं कोही सेटा माथअ टेक्की।”

ईशू नी शताना का हार ही खाई बलकि शताना पल़अ भागणअं। और तेखअ आऐ ईशू सेटा स्वर्गदूत संघा लागै ईशूऐ सेअवा-टैहली करदै। ईशू निं राख्‍सा का हार खाई और राख्सा ई पल़अ तेऊ सेटा का दूर ठुर्हनअ। तेखअ आऐ ईशू सेटा लै स्वर्ग दूत संघा लागै ईशूए सेऊआ करदै।