26. ईशूए लोगा मांझ़ै सेऊआ

राख्सा संघै इना गल्ला हणैं का बाद आअ ईशू उज़ल़ रेगीस्ताना का बापस गलील लाक्कै लै फिरी ज़िधी सह रहा त। तिधा का हांढअ सह ज़ैगै-ज़ैगै संघा लागअ लोगा का असली ज्ञैना खोज़दअ और सोभ लोग करा तै तेऊए बड़ैई।

तेखअ डेऊअ ईशू नासरत नगरी लै ज़िधी सह होछ़ी बेरी रहा त। तिधी डेऊअ सह बशैघे धैल़ी आराधना सभा दी, संघा उझ़ुअ पबित्र शास्त्रा पहल़दअ खल़अ। तेऊ का दैनीं याशायाह गूरे कताब पहल़णा लै।

ईशू पहल़अ तेता का सह परमेशरो सह बैण ज़िधी इहअ आसा त लिखअ द, “परमेशरो आत्मा आसा मुंह प्रैंदै तैही आसा हुंह तेऊ संसारा लै छ़ाडअ द कि रैनै-गरीबा लै खुशीओ समाद खोज़ूं और खरी-आफ़ता दी पल़ै दै लोगा बच़ाऊं।”

तेता बाद बेठअ ईशु धरनी ता सोभ लोग लागै तेऊ बडै गौरा संघै भाल़दै। ईहअ ता हेरअ तीनै लोगै ज़ाणी कि ऐभै तैण्हीं ज़ुण ऐऊ हाम्हां का पल़्हाऊअ सह आसा मसीहै ही बारै दी। ता ईशू बोलअ ज़ुण मंऐं ऐभै तैण्हीं तम्हां लै पल़्हाऊअ सहै ही लागअ दआ आझ़ हंदअ। सोभ लोग ती बडै रहैन हुऐ दै संघा लागै ईहअ बोलदै कि अह सह यूसुफो शोहरु नी आथी? तेता बाद बेठअ ईशू धरनीं और सोभ लागै तेऊ राम्बल़ै करै भाल़ै कि अह एऊ किज़ै बोलअ। इहअ ता हेरअ तिन्नैं समझ़ी कि ज़ुंण एऊ पहल़अ, सह आसा मसीहे बारै लिखअ द। पर ईशू बोलअ ज़ुंण मंऐं एभै तम्हां का पहल़ी कै खोज़अ, सह आसा आझ़ हंदअ लागअ द। सोभै हुऐ रहैन और कई लागै इहअ बोलदै कि अह कै हाम्हैं बछ़ैणदै निं आथी? अह युसुफ मिस्त्रीओ शोहरू निं आथी?

तै बोलअ तेखअ ईशू तिन्नां लै इहअ कि ईंयां गल्ला आसा शुची कि लोग निं आपणैं गराऊंए गूरे गल्ला मंदै आथी। एलीआ गूरे ज़मानैं बी ती इस्राएली मांझ़ै खास्सी बिधबा पर ज़ेभै साढै चिई साला तैणीं सरग निं बरशअ त, तेभै बी निं परमेशरै एलीआ तिन्नां सेटा मज़त करदअ छ़ाडा। सह छ़ाडअ तेऊ तिधा का होर्ती सारपत गरांऊंए बिधबा सेटा कि तेसा लै बर्गत दैए।

ईशू रहअ तिन्नां का खोज़दअ लागी कि एलीशा गूरे ज़मानैं बी आसा तै इस्राएला दी खास्सै कोहल़े रोगी; पर तेऊ किअ इस्राएलो दुशमण सैनापति कोहल़े रोगा का नरोगअ। ईशूए गल्ला शूंणैं आसा तै तिधी यहूदी और तिंयां हुऐ तेऊ लै रोश्शै लाल-पिंऊंल़ै।

तिन्नैं ढाकअ ईशू संघअ काढअ घिशी-तल़िंगी करै बागा लै, संघा नियं मारना लै कि एऊ लै दैणअ उछ़टै का हाम्हां ढेका बाती उंधै धाक्कअ। पर ईशू निखल़अ तिन्नां जैंदरा का दूर संघा डेऊअ नासरत नगरी लै।

तेखअ डेऊअ ईशू गलील लाक्कै लै, तिधी आऐ तेऊ सेटा बड़ै भारी खास्सै लोग। लोगै आणैं तेऊ सेटा लै कांणै, टाट्टै, टऊंणैं, लाट्टै और रंगा-रंगे रोगी और ईशू किऐ तिंयां सोभ नरोगै।

तिन्नां मांझ़ै कई ईहै ज़हा हारनै मारनै आल़ै भूत हआ तै शाचै दै, कई दरंगे मरीज़ और ईशू किऐ तिंयां सोभ नरोगै। कई भूत बी बोला तै ईशू लै तिन्नां मणछे ज़रीऐ कि तूह आसा परमेशरो शोहरू और लोग हआ तै रहैन-टैन संघा लागा तै परमेशरे बड़ैई करदै।

तेखअ छ़ांटै ईशू बारा मणछ और तिंयां बणांऐं च़ेल्लै और तिंयां च़ेल्लै बी रहा तै ईशू संघै और तिन्नैं शिखल़ी परमेशरे राज़े बारै खास्सी गल्ला और ज्ञैन।