27. झैणैल़ी सामरी ज़ातीए मणछे कथ्या

एकी धैल़ै हुअ इहअ कि यहूदी बधानो ज़ाणका मुखिअ आअ ईशू सेटा लै। सह च़ाहा त सोभी लोगा का इहअ रहैऊंणअ कि ईशू आसा गलत और अह निं असली बधान और ज्ञैन खोज़दअ। सह लागअ ईशू का इहअ पुछ़दअ, “हे गूरु, मुंह मोक्ष पाणां लै किज़ै लागणअ करनअ।” ईशू पुछ़अ तेऊ का इहअ, “परमेशरे बधाना दी किज़ै आसा लिखअ द?”

तेऊ दैनअ ज़बाब कि बधान बोला इहअ कि आपणअ सारअ मन, आपणअ प्राण, आपणअ सारअ और आपणीं सारी अक्ल लाई झ़ूरनअ बिधाता लै और आपणैं संघी साथी संघै बी डाहणीं तेही ई झ़ूरी। ईशू बोलअ तेऊ लै, “तंऐं बोलअ ठीक, मोक्ष पाणां लै लागणअ ताह इहअ ई करनअ।”

सह यहूदी मुखिअ च़ाहा त लोगा का ऐबै इहअ रहैऊंणअ कि ईशूए निं आपणीं ज़िन्दगी ई ठीक आथी, तैही त सह ईशू का सुआला पुछ़दअ लागअ द। तेखअ पुछ़अ तेऊ इहअ, “तै मेरअ संघी-साथी कुंण आसा?”

एऊ सुआलो ज़बाब दैणां लै खोज़ी ईशू तेऊ बधाने ज़ाणकारा का कथ्या, कि एक आसा त यहूदी (धणीं) मणछ, सह डेऊआ यरूशलेम नगरी का येरिहो नगरी लै।

बाता भेटै तेऊ मणछा च़ोर-डाकू और तिन्नैं लुट्टअ सह पठी संघा डाहअ सह च़िकी फणांटी बाता मुंअं नां ज़िंऊंदअ शोटी और आप्पू ठुहरै।

तिन्नां पिछ़ू आअ एक यहूदी (धणीं) तैहा ई बाता, तेऊ भाल़अ सह मणछ धरनीं पल़अ द, पर तेऊ भाल़अ तेऊ बाखा सिधअ टेरअ संघा निखल़अ दुजी बाता बाती आजू!

थोल़ी घल़ी बाद आअ एक लेवी परोहित तैहा ई बाता, तेऊ बी भाल़अ सह आध मूंअं द मणछ पर तेऊ बी निं सह उझै च़कअ, तेऊ बी बदल़ी तेऊ भाल़ी बात संघा निखल़अ होरी बाता आजू।

तेखअ आअ एक सामरी मणछ (होछ़ी ज़ातीओ, यहूदी करा तै तिन्नां संघै छ़ुंह)। ज़ांऊ तैऊ सामरी मणछै सह आध मूंअं मणछ भाल़अ कि सह आसा यहूदी (धणीं), तेऊ फिरी तेऊए बडी भारी झींण; संघा च़कअ सह तेऊ उझै और ज़िधी-ज़िधी तैऊ ज़खम तै, तेऊए ज़खमा दी लाई दाखो रस लाई करै शाटी।

संघा नियं तेऊ सह आपणैं गाधै प्रैंदै बशैल़ी। तेखअ डाहअ तेऊ सह एकी सरांईं दी संघा रहअ तिधी तेऊए हेर-सभाल़ करदअ लागी।

दुजै धैल़ै त तेऊ आप्पू तिधा का आजू ज़रूरी डेऊंणां लै और तेऊ डाहै सराईंए मालका लै तेऊ मणछे लाज़ा-पुआई लै ढब्बै दैई। संघा डाहअ इहअ बोली कि ज़ै एऊ मणछे लाज़ा लै ज़ै होर बी खर्च़अ एछे तेता दैऊं हुंह फिरदा, तेभै तैणीं लाऐ तूह आपणीं गांठी का।

तेखअ बोलअ ईशू तेऊ बधाने ज़ाणकार मणछा लै, “ऐबै तूह कै सोठा कि तेऊ आध मूंऐं मणछो असली संघ-साथी कुंण आसा?” तेऊ दैनअ ईशू लै ज़बाब कि ज़ुणीं सह तेऊए ज़खमा डी मल्हम शाटी लाई मरनै का बच़ाऊअ सह आसा तेऊऔ असली संघी-साथी। ईशू बोलअ तेऊ लै, “तूह बी कर इहअ ई।”