1. दुनिया री शुरुआत

ऐण्ढी तैरहा शुरूआती न परमेश्वरै सैभ चीजा री सृष्टि केरी। परमेश्वरै छ़ौह रोज़ा न ऐ दुनिया होर ज़ो किछ़ एता न सा,सौ बणाऊ। होर धौरती बनाणै न पैहलै धौरती निहारै सैंघै भौरुईदी ती होर सुनसान ती होर परमेश्वरै री आत्मा पाणी पैंधै मण्डरा ती।

तैबै परमेश्वरै बोलू,“प्याशा हो” तैबै प्याशा हुआ। परमेश्वरै प्याशा हेरू कि शोभला सा होर परमेश्वरै तेई प्याशै बै ध्याड़ बोलू। परमेश्वरै प्याशा निहारै न आंगी केरू होर तेई निहारै बै परमेश्वरै रात बोलू। परमेश्वरै पैहिलै रोज़ै प्याशा बणाऊ।

दुनिया बनाणै न दुज़ै रोज़ै परमेश्वरै बोलू, "पाणी रै ऊझै अंतर हुआ लोड़ी" होर एक अंतर हुआ परमेश्वरै तेई अंतरा बै "सर्ग" बोलू।

त्रिजै रोज़ै परमेश्वरै धौरती न पाणी आँगी केरू होर शुकी धौरती बै ज़मीन होर कठा हुऐदै पाणी बै समुन्द्र बोलू।

तैबै परमेश्वरै धौरती न हर किस्मै रै बौण-बुटै लागणै बै बोलू, होर तैण्ढाऐ हुआ। तैबै परमेश्वरै हेरू कि जो सैभ किछ़ तेइयै बणाऊ ती सौ शोभला ती।

सृष्टि रै च़ोउथै रोज़ै परमेश्वरै सूरज़, ज़ोथ होर तारै बणाऐ। परमेश्वरै ध्याड़ी री तैंईंयैं सूरज़ होर राती बै प्याशा केरनै री तैंईंयैं ज़ोथ होर तारै बणाऐ होर मौसम, होर बौर्षा री पछ़ियाणै री तैंईंयैं ऐ बणाऐ।

पोंज़ुऐ रोज़ै परमेश्वरै पाणी न तैरनू आल़ै सैभी किस्मै रै जन्तु होर सर्गा न उड़नू आल़ै सैभी किस्मै रै च़ीड़ू बणाऐ। परमेश्वरै हेरू कि सैभ किछ़ शोभला सा होर तिन्हां बै आषीश धिनी।

सृष्टि रै छौऊऐ रोज़ै परमेश्वरै बोलू, “धौरती पैंध रेंगणु आल़ै सैभ किस्मा रै पशु हुऐ लोड़ी।"होर परमेश्वरै रै बोलणै रै मुताबक ऐण्ढाए हुआ। तिन्हांन किछ़ पशु पालतू ती, किछ़ धौरती पैंधै रेंगणु आल़ै, होर किछ़ जंगली पशु ती होर परमेश्वरै हेरू कि ऐ शोभला सा।

तैबै परमेश्वरै बोलू, “आसा मांहणु आपणै रूपा न आपू सांही बनाणै। होर तिन्हां हागै धौरती होर धौरती रै सैभी पशु रा अधिकार देणा।”

तैबै परमेश्वरै धौरती रा माटा लेऊ होर तेथै लाइया एक मांहणु बणाऊ होर तेईन ज़िंन्दगी रा शाह फुकरू। एई मांहणु रा नाँ आदम डाहू। परमेश्वरै आदमा बै रौहणै री तैंईंयैं एक बगीच़ा बणाऊ होर तेई बगीच़ै री हेर-शुण केरनै री तैंइयै सौ तौखै रखू।

तेई बगीच़ै मौंझै परमेश्वरै दुई खास बूटै लाऐ, एक ज़िन्दगी रा बूटा होर दुजा भलै होर बुरै रै ज्ञाना रा बुटा लाऊ। परमेश्वरै आदमा बै बोलू, “तू एई बगीच़ै रै सैभी फौल़ा बै खाई सका सा, पर इन्हां दूई बुटै रै फौल़ा बै नी खाई सकदा। अगर तू इन्हां दूई बुटै रै फौल़ा बै खाला ता, तौ मौरना।”

तैबै परमेश्वरै बोलू, “आदमा रा केल्हा रौहणा सही नी ऑथी।” पर पशु मौंझ़ै न कोई भी आदमा रा सैंघी नी थी बणी सकदा।

तैबै परमेश्वरै आदम गहरी नींजा न पाऊ होर परमेश्वरै आदमै रै परोशै सैंघै एक बेटड़ी बणाई होर सौ आदमा हागै आणी।

ज़ैबै आदमै सौ हेरी ता बोलू, “ऐ मूँ सांही सा।” तैबै आदमै तेसरा नाँ हवा डाऊ। ऐसा बजहा न एक आदमी आपणै आमा होर बापू बै छ़ौड़िया आपणी लाड़ी सैंघै एक होआ सा।

परमेश्वरै आपणै रूपा न मर्द होर बेटड़ी बणाऐ होर परमेश्वरै हेरू कि शोभला सा ता परमेश्वरै तिन्हां बै आशीष धिनी होर बोलू, “फुला-फ़ौला होर सारी धौरती न फैला।” इन्हरा बणना छ़ौउऐ रोज़ै हुआ ती।

ज़ैबै सौतुआ रोज़ आऊ ता परमेश्वरै आपणा कोम पूरा केरू ती। परमेश्वरै सौतुऐ रोज़ै बशाँ केरू। तेइयै सौतुऐ रोज़ा बै आशीष धिनी होर सौ पवित्र बणाऊ, किबैकि एई रोज़ै परमेश्वरै बशाँ केरू। ऐण्ढी तरहै परमेश्वरै सारा ब्रह्माण्ड होर ऐ सैभ किछ़ बणाऊ।