2. पाप दुनिया न ऐज़ा सा

आदम होर तेइरी लाड़ी परमेश्वरै बणाऐदै शोभलै बगीच़ै न बोहू खुश ती। ते नाँगै ती पर दुनियां न कोई पाप नी ती ऑथी एसा बजहा न तिन्हां बै कोई शर्म महसूस नैंई हुई। ते बगीच़ै न च़ला-फिरा ती होर परमेश्वरा सैंघै गैला केरा ती।

पर बगीच़ै न एक च़लाक कीड़ा ती। तेइयै तेसा बेटड़ी न पुछ़ू, “कि सच़िऐ परमेश्वरै तुसा बै ऐई बगीच़ै रै कौसी भी बूटै रै फौल़ खाँणै बै नाँह केरू सा?”

तेसै बेटड़िऐ जवाब धिना, “परमेश्वरै आसा बै बोलू सा कि भलै बुरै रै ज्ञानै रै बुटै रै फ़ौला बै छ़ौड़िया आसै सैभी बुटै रै फ़ौला बै खाई सका सी। परमेश्वरै बोलू सा, अगर तुसै एई फ़ौला बै खालै होर छ़ुँगलै भी ता तुसा मौरना।”

तेई कीड़ै तेसा बेटड़ी बै जवाब धिना, “ऐ सच़ नैंई ऑथी। परमेश्वर ऐ ज़ाणा सा कि ज़ैबै तुसै तेई फ़ौला बै खालै ता तुसा तेई सांही होणा होर तेई सांही भलै होर बुरै रा ज्ञान समझणा।”

तेसै बेटड़िऐ हेरू कि ऐ फ़ौल़ बड़ा शोभला सा होर मीठा सा होर सौ बुद्धिमान भी बणना चाहा ती ता तेसै सौ फ़ौल़ चोड़िया खाऊ होर आपणै लाड़ै बै भी धिना होर तेइयै भी सौ खाऊ।

तैबै चानक तिन्हरी औछी खुली होर तिन्हां बै पता च़लू कि ते नाँगै सी होर तिन्है आपणी देह खौटणै री तैंईंयैं पौचा चोड़िया झिकड़ै बनाणै री कोशिश केरी।

तैबै आदम होर तेइरी लाड़ियै बगीच़ै न परमेश्वरै रै च़लणै री छ़ेड़ शुणी। ते दुऐ गोजुऐ। तैबै परमेश्वरै आदमा बै हाक पाई, “तू कौखै सा?” आदमै जवाब धिना, “मैं तेरै च़लणै री छ़ेड़ बगीच़ै न शुणी ता हाँऊ डौरू किबैकि हाँऊ नाँगा ती तैबै हाँऊ गोजुआ।”

तैबै परमेश्वरै पुछ़ू, “कुणियै दसू कि तू नाँगा सा? मैं ज़ुण फ़ौल़ खाणै बै नाँह केरू ती कि तैं सौ फ़ौल़ खाऊ? आदमै जवाब धिना, “तैं मुँभै ऐ बेटड़ी धिनी होर तेसै मुँभै सौ फ़ौल़ धिना।” तैबै परमेश्वरै तेसा बेटड़ी न पुछ़ू, “कि तैं ऐण्ढा केरू?” बेटड़िऐ बोलू, “कीड़ै मुँभै धोखा धिना सा।”

परमेश्वरै कीड़ै बै बोलू, “तू श्रापित सा।” तौ पेटै रै बालै औंढणा होर ज़िन्दगी भर माटा खाणा। तौ होर बेटड़ी एकी दुजै सैंघै नफरत केरनी। तेरी होर तेसरी औलादा भी एकी दुजै सैंघै नफरत केरनी। बेटड़ी रै खानदाना तेरी मुण्डी जेखड़नी होर तौ तेइरी घुंडी डसणी।

तैबै परमेश्वरै बेटड़ी बै बोलू, “मूँ तेरी सुज़णै री पीड़ा बोहू बढ़ाणी। तेरी इच्छा तेरै लाड़ै धिरिऐ होणी होर तेई तौ पैंधै राज केरना।”

परमेश्वरै आदमा बै बोलू, “तैं आपणी लाड़ी री गैल शुणी। ऐबै ऐ ज़मीन श्रापित सा होर तौभै एथै री फ़सल खाणै री तैंईंयैं बोहू मेहनत केरनी पौड़नी। तैबै तुसा मौरना होर तुसरी देह वापस माटै न मिलणी। आदमै आपणी लाड़ी रा नाँ हव्वा रखू। एथा रा मतलब होआ सा दुनिया री आमा किबैकि सौ सारै मांहणु जाति री आमा होणी होर परमेश्वरै आदम होर हव्वा बै पशु रै खौलड़ै लाइया बणैदै झिकड़ै लाऐ।

तैबै परमेश्वरै बोलू, “मांहणु भलै होर बुरै बै ज़ाणिया आसा सांही हुऐ सी। ऐबै तिन्हां बै कैधी भी ज़िन्दगी रै बुटै रै फ़ौल़ खाणै री इज़ाज़त नैंई मिलणी होर परमेश्वरै तेई शोभलै बगीच़ै न आदम होर हव्वा बाहरै भेज़ै। परमेश्वरै ज़िन्दगी रै बुटै रै फ़ौल़ खाणै न रोकणै री तैंईंयैं तेई बगीच़ै न शक्तिशाली स्वर्गदूत डाहै।