32. यीशु दुष्टात्मा न भौऊरूऐदै मांहणु होर एक बीमार बेटड़ी बै ठीक केरा सा

यीशु होर तेइरै चेले आपणी किश्ती न तेसा ज़ैगा बै नौठै ज़ौखै गिरासेनी लोका रौहा ती। ते तेसा ज़ैगा न पुजिया किश्ती न उतरै।

तौखै एक मांहणु ती ज़ो दुष्टात्मा न भौरूआदा ती।

ऐ मांहणु ऐतरा ताकतवर ती कि कोई भी ऐईबै काबू नैंई केरी सकदा ती। कई बार लोकै तेइरै हौथ होर जौंघा शाँगल़ी लाइया बौनै, पर सौ तिन्हां बै चोड़ा ती।

सौ मांहणु तेसा ज़ैगा न कब्रा न रौहै केरा ती होर पूरी ध्याड़ चिटा पांदा रोहा ती। सौ झिकड़ै नैंई ती लांदा होर आपु बै पात्थरा सैंघै घायल केरा ती।

सौ मांहणु भगिया यीशु हागै आऊ होर तेईरै सामनै टुँबड़ा पौऊ। तैबै यीशुऐ तेई मांहणु आँध्रली दुष्टात्मा सैंघै गैला केरी होर बोलू, “ऐई मांहणु न बाहरै निकलिया एज़!”

सौ दुष्टात्मा जौरै सैंघै चिटा पांदी लागी, “ओ यीशु, “ओ सैभी न बड़े परमेश्वरा रै बेटैआ, तेरा मुँ सैंघै कि कोम? जिबाण केरिया मुँभै मौत सतांदा।” तैबै यीशुऐ तेसा दुष्टात्मा सैंघै पुछू, “तेरा कि नाँ सा?” तेसै ज़वाब धिना, “मेरा नाँ सैना सा, किबैकि आसै बोहू सी।” (रोमी सैना न कई हज़ार सैनिका रा एक छ़ुण्ड एक “सैना होआ ती)

तिन्हां दुष्टात्मे यीशु सैंघै अर्ज़ केरी, “जीबाण केरिया आसा बै ऐसा ज़ैगा न बाहरै मौत भेजदा!” तौखै नेड़ ढौगा न एक सुंगरा रा एक छ़ुण्ड च़ौरदा लागा ती। तैबै तिन्हैं दुष्टात्मे यीशु सैंघै अर्ज़ा केरी, “जिबाण केरिया आसा बै तिन्हां सुंगरै रै छ़ुण्डा न भेज़!” यीशुऐ बोलू, “ठीक सा, तिन्हां न जात्!”

तैबै ते दुष्टात्माऐं तेई मांहणु न निकलिया तिन्हां सुंगरा न तुरी। ते सुंगर दौउड़िया ढौगा न झपटिया झीला न डूबै होर मूँऐं। तेई छ़ुण्डा न लगभग 2,000 सुंगरा ती।

तौखै सुंगरा री हेर-शुण केरनु आल़ै लोका ती। ज़ो किछ़ हुआ ती ज़ैबै तिन्हैं हेरू ता ते नगरा बै भगै। यीशुऐ ज़ो केरू ती तौखै तिन्हैं सैभी बै दसु। तेई नगरा रै लोका तौखै आऐ होर सौ मांहणु हेरू ज़ुणिन दुष्टात्मा ती। सौ शान्ति सैंघै झिकड़ै लाइया, होर एक आम मांहणु सांही बर्ताव केरदैआ बेठा ती।

ते लोका बोहू डौरै ती होर तिन्हैं यीशु बै जाणै री तैंईंयैं बोलू। यीशु किश्ती पैंधै च़ढ़ू। सौ मांहणु ज़ुणिन दुष्टात्मा ती तेइयै यीशु सैंघै एणै री अर्ज़ केरी।

पर यीशुऐ तेई सैंघै बोलू, “नैंई। हांऊँ चाहा सा कि तू घौरा जाईया सैभी बै दसै कि परमश्वरै तेरी तैंईंयैं कि केरू सा। तिन्हां बै दस कि कैण्ढै परमेश्वरै तौ पैंधै दया केरी सा।”

तैबै सौ मांहणु नौठा होर सैभी बै एथा रै बारै न दसु ज़ो यीशुऐ तेइरी तैंईंयैं केरू ती। तेइरी कहाणी बै शुणनु आल़ा हर मांहणु हैरान हुआ ती।

यीशु समुन्द्रा रै दुजी धिरिऐ वापस आऊ। तेइरै तौखै पूजणै न बाद, एक बड़ी भीड़ तेइरै चौऊ पासै कठा हुई होर तेइबै दबांदी लागी। तेसा भीड़ा न एक बेटड़ी ती ज़ो बारा बौर्षा न लोहू च़लणै री बीमारी न दुखी ती। तेसै आपणै सारै ढैबुऐ डॉक्टरा बै धिनै ती ताकि ते तेसा बै ठीक केरी सकलै, पर तेसा री बीमारी होर भी बिगड़ी ती।

तेसै शुणु कि यीशुऐ कई बीमारी आल़ै लोका ठीक केरै ती होर तेसै सोचु, “हांऊँ बेफिक्र सा कि अगर हांऊँ यीशु रै जिकड़ै छूँगली भी ता मुँ ठीक होंणा!” तैबै सौ यीशु रै पिछ़ै आई होर तेइरै झकड़ै छूँगै। ज़ैण्ढै तेसै यीशु रै झिकड़ै छूँगै, लोहू रा च़लणा बन्द हुआ।

तैभै यीशुऐ जाणु कि तेइन शक्ति निकती सा। तैबै तेइयै पिछै मुड़िया पूछु, “हांऊँ कुणिऐ छुँगु?” चेले ज़वाब धिना, “औखै एतरै सारै लोकै तेरे चौऊ पासै भीड़ लाइदी सा, होर तौभै धाका देंदे लागै सी। ता तैं किबै पुछू कि हांऊँ कुणिऐ छूँगु?”

सौ बेटड़ी यीशु सामनै कौमदैआ होर बोहू डौरदैआ आपणै घुटनै रै बलै बेठी। तैबै तेसै तेइबै दसु कि तेसै कि केरू सा, होर ऐ भी कि सौ ठीक हुई सा। यीशुऐ तेसा सैंघै बोलू, “तेरै बशाह री बशाह सैंघै तू ठीक हुई सा। तेरै बशाहै तू ठीक केरी। शान्ति सैंघै जा।”