31. यीशु पाणी पैंधै च़ला सा

पौंज़ हजार लोका बै खाणा खियाणै न बाद, यीशुऐ आपणै चेले बै किश्ती न जाणै बै बोलू। तेइयै समुन्द्रा रै दूजी धिरिऐ जाणै री तैंईंयैं बोलू ज़ैबैकि सौ थोड़ी देरी तकर तौखै रूकू। तैबै चेले नौठै होर यीशुऐ भीड़ा रै लोका विदा केरै कि ते आपणै घौरा बै जालै। ऊँई न बाद, यीशु प्रार्थना केरनै री तैंईंयैं एक ढौगा पैंधै बै नौठा। तौखै सौ केल्हा ती, होर तेइयै देर राती तकर प्रार्थना केरी।

तेई बौगत, च़ेले आपणी किश्ती च़लांदैआ जान्दै लागै ती। बोहू रात होंणै पैंधै ते हाज़ी समुन्द्रा रै बिच़ा न पूज़ै ती।

तेई बौक्त यीशुऐ प्रार्थना केरनी खत्म केरी होर आपणै चेले हागै वापस जाणा शुरू केरू। सौ किश्ती धिरिऐ जाणै री तैंईंयैं पाणी पैंधै च़लदा लागा।

तैबै सेभी चेले सौ हेरू। ते बोहू डौरै किबैकि तिन्हैं सोचू ती कि कोई भूत सा। यीशु जाणा ती कि ते डौरै ती, तैबै तेइयै तिन्हां बै हाक पाइया बोलू, “डौरदै मौता, ऐ हांऊँ सा!”

तैबै पतरसै यीशु सैंघै बोलू, “ओ प्रभु, अगर ऐ तू सा ता मुँभै पाणी पैंधै च़लिया तौ हागै ऐणै रा हुक्म दै।” यीशुऐ पतरसा बै बोलू, एज़!”

तैबै पतरस किश्ती न औसु होर यीशु हागै जाणै री तैंईंयैं पाणी पैंधै चलना शुरू केरू। पर थोड़ी दूर जाइया, तेइयै आपणी औछी यीशु हागै न हटाई होर छलाकी बै हेरदा लागा होर तेज़ बागरी रा ऐणा महसूस केरू।

तैबै पतरस डौरू होर पाणी न डूबदा लागा। सौ चिखु, “ओ प्रभु, मुँभै बच़ात्|” यीशुऐ फट हौथ आगे केरिया सौ खींचू होर पतरसा बै बोलू, “तेरा बशाह बोहू कम सा! तैं मुँ पैंधै किबै शक केरू?”

ज़ैबै यीशु होर पतरस किश्ती पैंधै च़ढ़ै, ता तैबै बागर रुकी होर पाणी शान्त हुआ। चेले हैरान हुऐ होर तिन्हैं परमेश्वरै री आराधना केरी होर तेई सैंघै बोलू, “सच़ियै तू परमेश्वरा रा बेटा सा”