30. यीशु पौंज़ हज़ार लोका बै खाँणा खिया सा

यीशुऐ आपणै प्रेरित प्रचार केरनै होर लोका बै शिक्षा देणै री तैंइयैं बोहू सारै लग-लग ग्राँ न भेजै। ज़ैबै ते तौखै वापस आऐ ज़ौखै यीशु ती ता तिन्हैं तेइबै दसु कि तिन्हैं कि केरू ती। तैबै यीशुऐ ते समुन्द्रा रै दुजी धिरिऐ तेई सैंघै एक शान्त ज़ैगा न जाईया थोड़ी देरी री तैंईंयैं बशाँ केरनै री तकर शाधै। तैबै ते किश्ती न च़ढ़ै होर समुन्द्रा रै दुजी धिरिऐ नौठै।

पर तौखै बोहू सारै ऐण्ढै लोका ती ज़ुणियै यीशु होर चेले किश्ती न जांदैआ हेरै ती। ऐ लोका तिन्हां न आगै समुन्द्रा रै दुजी धिरिऐ जाणै री तैंईंयैं समुन्द्रा रै बौढ़ा-बौढ़ा भगै।

तेसा भीड़ा न बच्च़ै होर बेटड़ी री गिणती रै अलावा 5,000 न ज़ादा मर्द ती। यीशुऐ तिन्हां लोका पैंधै बड़ा तरस खाऊ। यीशु रै बिना ते लोका बिना फुआलै री भेड़ा सांही ती। तैबै तेइयै तिन्हां बै शिक्षा धिनी होर तिन्हरै बिच़ा न ज़ो बीमार ती ते ठीक केरै।

सौंझ़की घेरै, चेले यीशु बै बोलू, “ऐबै देर हुई सा होर औरै-पौरै कोई नगर नैंई ऑथि। इन्हां लोका बै विदा केर ताकि ते जाईया खाणै री तैंइयैं किछ़ आंणलै।

पर यीशुऐ चेले सैंघै बोलू, “तुसै तिन्हां बै खाँणै री तैंईंयै किछ़ देआ!” तिन्हैं ज़वाब धिना, “आसै ऐण्ढा कैण्ढै केरी सका सी? आसा हागै सिर्फ पौंज़ रोटी होर दुई होछ़ी मैछ़ी सी”

यीशुऐ आपणै च़ेले बै बोलू कि भीड़ा रै लोका बै गाह पैंधै पजाह-पजाह रै छ़ुण्डा न बेशणै री तैंईंयैं बोला।

तैबै यीशुऐ पौंज़ रोटी होर दुई मैछ़ी लेई होर स्वर्गा धिरिऐ हेरू, होर तेई खाँणै री तैंईंयैं परमेश्वरा रा धन्यवाद केरू।

फिर यीशुऐ रोटी होर मैछ़ी रै टुकड़ै केरै। तेइयै लोका बै बौंडणै री तैंईंयैं ते टुकड़ै धिनै। चेले तेई खाँणै बे बौंडदै रौहै, होर सौ कैधी खत्म नैंई हुआ! ते सैभ लोका खाईया रौज़ै।

तुंई न बाद, च़ेले सौ खाँणा कठा केरू होर तुंई सैंघै बारा टोकरी भौरुई! सौ सारा खाँणा तिन्हां पौंज़ रोटी होर दुई मैछ़ी न बच़ु ती