29. निर्दयी दासै री कहाणी

एक रोज़, पतरसे यीशु न पुछू, “ओ मालक, मुँभै आपणै भाई बै केतरी बारी माफ केरना चेहिऐ ज़ैबै सौ मेरे खिलाफ पाप केरा सा? कि सौत बारी तकर?” यीशुऐ बोलू, “सौत बारी नैंई, पर सौता रै सतर बारी!” यीशु रा मतलब सा कि आसा बै हमेशा माफ केरना चेहिऐ। तैबै यीशुऐ कहाणी दसी’।

यीशुऐ बोलू, “परमेश्वरा रा राज्य एक राजै सांही सा ज़ो आपणै दासा न लेखा लेणा चाहा ती। तेइरा एक दास दस हज़ार बौर्षा री मजदूरी रै एक बड़ै कर्जा रा कर्जदार ती।”

पर सौ दास आपणै कर्जा बै चुकाई नैंई पाऊ, तैबै राज़ै बोलू, “एईरा कर्ज चुकाणै री तैंईंयैं ऐई मांहणु बै होर ऐई रै टबरा बै दासा रै रूपा न बेच़।”

“ तेई दासै राजै रै सामनै आपणै घुटनै रै बालै टुँबड़ै पौड़िया बोलू, ‘जिबाण मुँ सैंघै धीरज रख, होर मुँ आपणै ऋणा रा पूरा भुगतान केरना।’ राजै दासा पैंधै दया केरी, तैबै तेइयै तेइरै सारै ऋण माफ़ केरै होर सौ जाणै धिना।”

“पर ज़ैबै सौ दास राजै हागै न बाहरै नौठा, ता तेइयै तेइरा एक सैंघी ढौकू होर बोलू, ‘ज़ो तौ पैंधै मेरा ऋण सा मुँभै तेइरा भूगतान केर!”

“तेई सैंघी दासै घुटने टेकिया बोलू ‘जिबाण केरिया मुँ सैंघै धीरज रख, होर मुँ आपणै ऋणा रा पूरा भुगतान केरना।”

“ज़ो किछ़ हुआ ती सौ सैभ किछ़ होरी दासे हेरु होर ते परेशान हुऐ। ते राजै हागै नौठै होर तेइबै सैभ दसु।”

“राजै तेई दासा बै शाधिया बोलू, ‘ओ दुष्ट दास! मैं तेरा ऋण तैबै माफ केरू ती किबैकि तैं मुँ सैंघै अर्ज़ केरी ती। तैं भी तैण्ढाऐ केरू लोड़ी।’ राजा ऐतरा झिकुआ कि तेइये सौ दास कैदखानै न पाऊ ज़ैबै तक कि सौ आपणै सारै ऋणा रा भुगतान नैंई केरला

तैबै यीशुए बोलू, “मेरा स्वर्गा न विराजमान बापू तुसा मौंझ़ै न सैभी सैंघै ऐण्ढा केरला अगर तूसै आपणै भाई बै आपणै दिला न माफ नैंई केरदै”