28. एक धनी ज़ुआन मांहणु

एक रोज़ एक धनी ज़ुआन मांहणुऐ यीशु हागै एज़िया तेईन पुछू, “ओ सही गुरू, हमेशा री ज़िन्दगी पाणै री तैंईंयैं मुँभै कि केरना पौऊ?” यीशुऐ तेई सैंघै बोलू, “तू मुँभै ‘सही’ किबै बोला सा? सिर्फ एकै सही सा होर सौ परमेश्वर सा। पर अगर तू हमेशा री ज़िन्दगी पाणा चाहा सा ता परमेश्वरा रै बिधाना रा पालन केर।”

तेइयै पुछू, “मुँभै कुणी-कुणी हुक्मा रा पालन केरनै री ज़रूरत सा?” यीशुऐ ज़वाब धिना, “हत्या हेरी केरदा, व्यभिचार हेरी केरदा, चोरी हेरी केरदा, झूठ हेरी बोलदा, आपणै आमा बापू रा आदर केरी, होर आपणै पड़ेशी सैंघै आपु सांही झ़ुरी रखेई।”

पर तेई ज़ुआन मांहणुऐ बोलू, “हांऊँ आपणै बचपना न ऐ इन्हां सैभी हुक्मा बै मनदा आऊ सा। मुँभै हमेशा री तैंईंयैं जिन्दै रौहणै बै ऐबै भी कि केरनै री ज़रूरत सा?” यीशुऐ तेई पैंधै नज़र फेरी होर तेई सैंघै झ़ुरी केरी।

यीशुऐ ज़वाब धिना, “अगर तू सिद्ध होंणा चाहा सा ता जाईया आपणा सैभ किछ़ बेच़ होर सौ धन -दौलत गरीबा न बौंड, होर तौभै स्वर्गा न धन मिलणा। तैबै च़लिया तमुँ पिछ़ै एज़।”

ज़ो यीशुऐ बोलू ता तैबै ज़ैबै तेई ज़ुआन मांहणुऐ शुणु ता सौ बोहू उदास हुआ, किबैकि सौ बोहू धनी ती होर सौ आपणी दौलत देणा नैंई ती चाहदां। सौ यीशु हागै न वापस नौठा।

तैबै यीशुऐ आपणै चेले बै बोलू, “परमेश्वरा रै राज्य न धर्मी रा ऐणा बोहू मुश्किल सा! हाँ, एक धनी मांहणु रा परमेश्वरा रै राज्य न ऐणै री तुलना न कौसी ऊँटा रा सुई रै नाके न होईया निकलना सान सा।”

ज़ो यीशुऐ बोलू ज़ैबै चेले शुणु ता ते हैरान ती। तिन्हैं बोलू, “अगर ऐण्ढा सा ता परमेश्वरा कुण बच़ाणा?”

यीशुऐ चेले धिरिए हेरू होर बोलू, “लोका री तैंईंयैं उद्धार केरना सान नैंई ऑथि। पर परमेश्वरा री तैंईंयैं सैभ किछ़ केरना सान सा।”

पतरसे यीशु बै बोलू, “आसै चेले आपणा सैभ किछ़ छौड़िया तेरे पिछ़ै हुऐ सी। ता आसा रा ईनाम कि होंणा?”

यीशुऐ ज़वाब धिना, “हर एक मांहणु ज़ुणियै मेरी बजहा न, आपणा घौर, भाई, बैहण, आमा-बापू, या धन-दौलत छौड़ा सा, सौ तेई शौऊ गुणा प्राप्त केरना होर हमेशा री ज़िन्दगी भी पाणी। पर ज़ो पैहलै सी तिन्हां पिछै होंणा, होर ज़ो पिछ़ै सी तिन्हां पैहलै होंणा।”