27. दयालू सामरी बेटड़ी री कहाणी

एक रोज़़,यहूदी गुरु जो धर्मा रै बारै न सैभ किछ़ जाणा ती यीशु हागै आऊ। सौ सैभी बै रिहाणा चाहा ती कि यीशु गलत रीतियै शिक्षा देंदा लागा ती। तैबै तेइयै बोलू, “ओ गुरु हमेशा री जिन्दगी पाणै री तकर हाँऊं कि केरनु?” यीशुऐ ज़वाब धिन्ना, “परमेश्वरा रै बिधाना न कि लिखुदा सा?”

तेई धर्म गुरूऐ बोलू, “सौ बोला सा कि आपणै परमेश्वरा सैंघै आपणै सारै मन, प्राण, शक्ति होर बुद्धि सैंघै झ़ुरी रख। होर आपणै पड़ेशी सैंघै आपु सांही झ़ुरी रख।” यीशुऐ ज़वाब धिना, “तैं एकदम सही बोलू! ता तौभै हमेशा री ज़िन्दगी प्राप्त होंणी।”

पर सौ धर्म गुरू लोका बै रिहाणा चाहा ती कि तेइरै जीणै रा तरीका सही नैंई ऑथि। तैबै तेइयै पूछू, “ठीक सा, ता मेरा पड़ेशी कुण सा?”

यीशुऐ तेई गुरू बै एक कहाणी दसणै रै ज़रियै जबाब धिना। “एक यहूदी मांहणु ती ज़ो एक सड़का न होईया यरूशलेमा न यरीहो नगरा धिरिऐ जांदा लागा ती।”

“पर कि़छ़ डाकुऐ सौ हेरू होर तेई पैंधै हमला केरू। तिन्हैं सैभ किछ़ लूटू होर सौ औधमूँआ केरू। तैबै ते नौठै।”

“तेथा न बाद तैभै, एक यहूदी पुरोहित तिया सड़का न होईया नौठा। तेई पुरोहिते सौ मांहणु सड़का पैंधै पौड़ुदा हेरू। ज़ैबै तेइयै सौ हेरू ता सौ सड़का री दुजी धिरिऐ नौठा। तेइयै सौ मांहणु हेरिया भी नैंई हेरू।”

“ऊँईन बाद किछ़ देरी बाद, एक लेवी तेसा सड़का पैंधै आऊ। (लेवी यहूदी रा एक गोत्र ती ज़ुणियै मन्दिरा न पुरोहिता री मज़त केरी ती) सौ लेवी भी सड़का री दुजी धिरिऐ न नौठा। तेइयै भी सौ मांहणु हेरिया भी नैंई हेरू।”

“आगला मांहणु ज़ो तेसा सड़का न आऊ सौ सामरी मांहणु ती। (सामरी होर यहूदी एकी होरी न नफरत केरा ती) तेई सामरी मांहणुऐ सड़का पैंधै सौ मांहणु हेरू। तेइयै हेरू कि सौ एक यहूदी ती, पर फिरी भी तेइयै तेई पैंधै तरस खाऊ। तैबै सौ तेई हागै नौठा होर तेइरै ज़ख्मा न पट्टी बौनी।”

फिरी तेई सामरी मांहणुऐ सौ मांहणु आपणै गधे पैंधै पाऊ होर सौ तेसा सड़का सैंघली एक सरांया न नेऊ। ज़ौखै तेइयै तेइरी हेर-शुण केरनी शुरू केरी।”

आगलै रोज़ तेई सामरी मांहणु बै कौंईचै जाणा ज़रूरी ती। तेइयै संराय रै मालका बै किछ़ ढैबुऐ धिनै। तेइयै तेइबै बोलू, “ऐई मांहणु री हेर-शुण केरेई। अगर ऊँईरै अलावा तेरै किछ़ होर ढैबुऐ लागलै ता मुँ वापस एज़िया तौभै देणै।”

फिरी यीशुऐ तेई बिधाना रै गुरु न पुछू, “तुसै कि सोचा सी? इन्हां त्राई लोका मौंझ़ै न कुण तेई मांहणु रा पड़ेशी सा ज़ुण लुटू होर पिटू ती?” तेइयै ज़वाब धिना, “सौऐ ज़ुणियै तेई पैंधै दया केरी ती।”यीशुऐ तेइबै बोलू, “तू जा होर ऐण्ढाऐ केर।”