26. यीशु आपणी सेवा शुरू केरा सा

शैतानै री परीक्षा रै नाँ केरनै न बाद, यीशु वापस गलील नाँ री ज़ैगा न आऊ। ऐ सौऐ ज़ैगा सा ज़ौखै सौ रौहा ती। पवित्र आत्मा तेई बै बोहू शक्ति देंदा लागा ती, होर यीशु एकी ज़ैगा न होरी ज़ैगा बै नौठा होर लोका बै शिक्षा धिनी। सैभिऐ तेइरै बारै न शोभली गैला केरी।

यीशु नासरत नगरा बै नौठा। ऐ सौ नगर सा ज़ौखै सौ आपणै बचपना न रौहा ती, बशाँ रै ध्याड़ै सौ आराधना केरनै री ज़ैगा बै नौठा। अगुवै तेइबै यशायाह भविष्यवाणी केरनु आल़ै रै समादा री एक कताब धिनी। सौ चाहा ती कि सौ तुँइबै पौढ़ै तैबै यीशुऐ सौ कताब खोलिया तेइरा एक भाग लोका री तैंईंयैं पौढ़ू।

यीशुऐ पौढ़ू, “परमेश्वरै मुँभै आपणी आत्मा धिनी सा ताकि हांऊँ गरीबा बै खुशी रा समाद दसी सकनु। तेइयै हांऊँ तैबै भेजू कि कैइदी बै अज़ाद केरनु, कांणै बै औछ़ी देनु, होर तिन्हां बै छुटकारा देनु ज़ुणिबै दुजै लोका दबांदै लागै सी। ऐ सौ बौगत सा ज़ैबै परमेश्वरा आसा पैंधै कृपा केरनी होर आसरी मज़त केरनी”

फिरी यीशु बेठा। सैभ लोका तेइबै बड़ै ध्याना सैंघै हेरदै लागै ती। ते ज़ाणा ती कि पवित्रशास्त्रा रा भाग ज़ो तेइयै ऐबै पौढ़ू ती सौ मसीह रै बारै न ती। यीशुऐ, बोलू, “ज़ो गैला मैं ऐबै पौढ़ी सी, सौ ऐबै होंदी लागी सा।” सैभ लोका हैरान हुऐ। तिन्हैं बोलू, “कि ऐ यूसुफा रा बेटा नैंई ऑथि?”

तैबै यीशुऐ बोलू, “ऐ सच़ सा कि लोका ऐण्ढै भविष्यवाणी केरनु आल़ै बै नैंई मनदै ज़ो तेई नगरा न होछ़ै न बड़ै तकर रौहू सा। एलिय्याह भविष्यवाणी केरनु आल़ै रै बौगता, इस्राएला न बोहू सारी बिधवा ती। पर ज़ैबै साढ़ै त्राई बौर्षा तकर गाश नैंई आऊ ता परमेश्वरै एलिय्याह इस्राएला न कौसी बिधवा री मज़त केरनै री तैंईंयैं भेजू। ऊँई रै अलावा, तेइयै एलिय्याह कौसी होरी देशा री बिधवा हागै भेजू”

यीशुऐ बोलणा जारी रखु, “होर एलीशा भविष्यवाणी केरनु आल़ै रै बौक्ता न, इस्राएला न बोहू सारै लोका चौंबड़ी री बीमारी न परेशान ती। पर एलीशे तिन्हां मौंझ़ै न कोई भी ठीक नैंई केरै। तेइयै सिर्फ इस्राएला रा बैरी रा सेनापति नामान ठीक केरू।” पर ज़ो लोका यीशु री शुणदै लागै ती ते यहूदी ती। तैबै ज़ैबै तिन्हैं ऐ बोलदा शुणु ता ते तेई न झिकुऐ।

नासरत नगरा रै लोकै यीशु ढौकु होर सौ आराधना री ज़ैगा न घशीटिया बाहरै नेऊ। तिन्हैं सौ मकाणै री तैंईंयैं बुनै शेटणै बै पत्थरा री एकी चोटी पैंधै नेऊ। पर यीशु भीड़ा मौंझ़ै न निकता होर नासरत नगरा बै छौड़िया नौठा।

फिरी यीशु सारी गलीला री जैगा बै नौठा, होर बड़ी भीड़ तेई हागै आई। ते ऐण्ढै बोहू लोका बै लेइया आऐ ज़ो। बीमार होर लंगड़ै ती। तिन्हां मौंझ़ै न किछ़ हेरी, च़ली शुणी, होर बोली नैंई सकदै ती, होर यीशुऐ ते ठीक केरै।

ऊँईरै अलावा, बोहू सारै ऐण्ढै लोका यीशु हागै नौठै ज़ुणिन दुष्टात्माऐं ती। यीशुऐ दुष्टात्मा बै निकल़नै रा हुक्म धिना। ते दुष्टात्मा चिटा पांदी लागी, “तू परमेश्वरा रा बेटा सा!” भीड़ा रै लोका हैरान ती, होर तिन्हैं परमेश्वरा री सराऊथि केरी।

फिरी यीशुऐ 12 मर्द चुनै ज़ुणिबै तेइयै प्रेरित बोलू। तिन्हां प्रेरिते तेई सैंघै यात्रा केरी होर तेईन शिक्षा प्राप्त केरी।