25. शैतान यीशु री परीक्षा केरा सा

यीशु रै बप्तिस्मा होंणै न तुरन्त बाद ऐ, पवित्र आत्मै सौ सुनसान ज़ैगा न नेऊ। यीशु तौखै चाल़ी ध्याड़ होर चाल़ी राती ती। तेई बौगत तेइयै ब्रत केरू, होर शैतानै यीशु हागै एज़िया पाप कराणै री तैंईंयैं तेइरी परीक्षा लेई।

पैहलै, शैतानै यीशु सैंघै बोलू, “अगर तू परमेश्वरा रा बेटा सा ता इन्हां पात्थरा बै रोटी बणा ताकि तू खाई सकला!”

पर यीशुऐ शैताना बै बोलू, “परमेश्वरा रै वचना न ऐ लिखू सा, ‘जिन्दै रौहणै री तैंईंयैं मांहणु बै रोटी री ज़रूरत नैंई ऑथि, पर तिन्हां बै हर तेसा गैला री ज़रूरत सा ज़ो परमेश्वर तिन्हां सैंघै बोला सा!”

तैबै शैतानै यीशु मन्दिरा री सैभी न उथड़ी ज़ैगा पैंधै नेऊ। शैतानै यीशु बै बोलू, “अगर तू परमेश्वरा रा बेटा सा ता औखै न बुनै छलाँग दै, किबैकि लिखू सा, ‘परमेश्वरा तौभै च़कणै री तैंईंयैं आपणै स्वर्गदूता बै हुक्म देणा कि तेरी जौंघा बै ठोकर नैंई लागी लोड़ी!’”

पर यीशुऐ सौ नैंई केरू ज़ो शैतानै तेईबै केरनै बै बोलू ती। ऊँई रै बजाय, तेइयै बोलू, “परमेश्वर सैभी बै बोला सा, ‘तू प्रभु आपणै परमेश्वरा री परीक्षा हेरी केरदा।”

फिरी शैतानै तेइबै दुनिया रै सारै राज़-पाठ रिहाऐ। तेइयै तेइबै रिहाऊ कि सौ केतरा शक्तिशाली सा, तेइयै यीशु बै बोलू, “मुँ तौभै ऐ सैभ किछ़ देणा अगर तू प्रणाम केरिया मेरी आराधना केरला।”

यीशुऐ ज़वाब धिना, “ओ शैतान, मुँ हागै न फेटै जा! परमेश्वरा रै वचना न सौ लोका बै हुक्म देआ सा, ‘सिर्फ आपणै प्रभु परमेश्वरा री आरधना केरा। परमेश्वरा रै रूपा न सिर्फ तेइरा आदर केरा।”

यीशुऐ शैतानै री परीक्षा न हार नैंई मनी, तैबै शैतान तेई हागै न भगू। तेबै स्वर्गदूत एज़िया यीशु री सेवा केरदै लागै।