24. यूहन्ना यीशु बै बप्तिस्मा देआ सा

एलिशिवा होर जकर्याह रा बेटा यूहन्ना, बड़ा होईया एक भविष्यवाणी केरनु आल़ा बणु। सौ जंगला न रौहा ती, होर जंगली माँऊ होर टिटल़ै खाए केरा ती, होर ऊँटा रै चौंबड़ै रै झिकड़ै लाए केरा ती।

बोहू सारै लोका यूहन्ना री गैला शुणनै री तैंईंयैं जंगला न आऐ। तेइयै ऐ बोलिया तिन्हां बै प्रचार केरू, “पापा न पछ़तावा केरा, किबैकि स्वर्गा रा राज्य नेड़ सा!”

ज़ैबै लोकै यूहन्ना रा समाद शुणु, ता तिन्हां मौंझ़ै न बोहू लोकै आपणै पापा न पछ़तावा केरू, होर यूहन्नै तिन्हां बै बप्तिस्मा धिना। यूहन्ना बै हेरनै री तैंईंयैं बोहू सारै धार्मिक अगुवै आए, पर तिन्हैं आपणै पाप नैंई मनै।

यूहन्नै धार्मिक अगुवै सैंघै बोलू, “ओ जैहरी लै कीड़ैओ! पापा बै मना होर आपणै बर्तावा बै बदला। परमेश्वरा हर सौ बूटा काटणा ज़ो शोभला फौल़ नैंई आंणदा, होर तेई ते औगी न फुकणै।” ज़ो भविष्यवाणी केरनु आल़ै बोलू ती यूहन्ने सौ पूरा केरू, “हेर, छ़कै मुँ तेरै आगै आपणै दूत भेजणै ज़ो तेरी तैंईंयैं बौत त्यार केरनी।”

किछ़ धार्मिक अगुवै यूहन्ना न पुछू कि सौ, मसीह सा। यूहन्ने ज़वाब धिना, “हांऊँ मसीह नैंई ऑथि, पर सौ मेरे बाद ऐणु आल़ा सा। सौ ऐतरा बड़ा सा कि हांऊँ तेइरै बुटा रै तस्मे खोलणै रै काबिल भी नैंई ऑथि।”

आगलै रोजा, यीशु बप्तिस्मा लेणै री तैंईंयैं यूहन्ना हागै आऊ। ज़ैबै यूहन्नै सौ हेरू, ता तेइयै बोलू, “हेरा! परमेश्वरा रा मेमणा ज़ुणी दुनिया रै पाप च़किया नेणै।”

यूहन्नै यीशु सैंघै बोलू, “हांऊँ तौभै बप्तिस्मा देणै रै काबिल नैंई ऑथि। बल्कि ऐ ज़रूरी सा कि तुसै मुँभै बप्तिस्मा देआ।” पर यीशुऐ बोलू, तू मुँभै बप्तिस्मा दै, किबैकि एतरी गैरै केरनै री तैंईंयैं सही कोम ऐ सा” तैबै यूहन्ने बप्तिस्मा धिना, ज़ैबैकि यीशुऐ कैधी पाप नैंई केरू ती।

बप्तिस्मा देणै न बाद ज़ैबे यीशु पाणी न निकलिया बाहरै आऊ, ता परमेश्वरा री आत्मा कबूतरा रै रूपा न प्रगट हुई होर बुनै एज़िया तेई पैंधै रुकी। तेई बौगत, परमेश्वरै स्वर्गा न गैला केरी। तेइयै बोलू, “तू मेरा प्यारा बेटा सा हांऊँ तौ सैंघै झ़ुरी केरा सा, होर हांऊँ तौ सैंघै बोहू खुश सा।”

परमेश्वरै यूहन्ना बै बोलू, “पवित्र आत्मा बुनै औसिया कौसी पैंधै एज़िया ठहरनी ज़ुणिबै तौ बप्तिस्मा देणा।” सौऐ परमेश्वरा रा बेटा सा परमेश्वर सा। पर ज़ैबै यूहन्नै यीशु बै बप्तिस्मा धिना, ता तेइयै परमेश्वर पिता गैला केरदा शुणु, बेटै परमेश्वर हेरू, ज़ो कि यीशु सा, होर तेइयै पवित्र आत्मा हेरी।