23. यीशु रा जन्म

यूसुफ नाँ रै एक धर्मी मांहणु सैंघै मरियमा री मंगणी हुई ती। ज़ैबै तेइयै शुणु कि मरियम सुज़दी सा ता सौ जाणा ती कि सौ तेइरा शोहरू नैंई ऑथि। पर, सौ मरियमा बै बदनाम नैंई ती केरना चाहदां, तैबै तेइयै तेई पैंधै कृपा केरनै री होर तेसा बै चुपचाप तलाक देणै री सोच़ी। एथा न पैहलै कि सौ ऐण्ढा केरदा, एक स्वर्गदूते तेइरै सूपनै न एज़िया तेई सैंघै गैला केरी।

तेई स्वर्गदूते बोलू, “ओ यूसुफ, मरियमा बै आपणी बणाईया औखै आंणनै न मौत डौरदा। ऐसा रै पेटा न ज़ो बच्चा सा सौ पवित्र आत्मा धिरिऐ न सा। तेसा एक शोहरू बै जन्म देणा। तेइरा नाँ यीशु रखेई, किबैकि तेई लोका तिन्हरै पापा न बच़ाणै।”

तैबै यूसुफै मरियमा सैंघै ब्याह केरू होर सौ लाड़ी बणाईया आपणै घौरा बै आंणी, पर तेसा रै सुज़णै तकर सौ तेसा सैंघै नैंई सुता।

ज़ैबै मरियमा रै सुज़णै रा बौगत नेड़ ती, ता तेसै होर यूसुफै बैलतहम जाणै री एक लौम्मी यात्रा शुरु केरी। तिन्हां बै तौखै जाणा ऐ ती किबैकि रोमी अधिकारी इस्राएली न रौहणु आल़ै सैभी लोकै री गिणती केरना चाहा ती। ते चाहा ती कि सैभ लोका तौखै बै जालै ज़ौखै तिन्हरै बुज़ुर्ग रौहा ती। राजा दाऊदा रा जन्म बैतलहमा न हुआ ती होर सौ मरियम होर यूसुफ दुई रा बुज़ुर्ग ती।

मरियम होर यूसुफ बैतलहम नौठै, पर तौखै खुड़ा रै अलावा रौहणै री कोई ज़ैगा नैंई मिली। सौऐ ज़ैगा ती ज़ौखै मरियमे आपणै शोहरू बै जन्म धिना। तेसै सौ खुड़ा न डाहू, किबैकि तौखै तेइरी तैंईंयैं तौखै टौलै नैंई तीऑथि। तिन्हैं तेइरा नाँ यीशु रखु।

तेसा राती, तौखै नेड़ा रै छ़ेता न किछ़ फुआल आपणै भेड़ा रै छ़ुण्डा री हेर-शुण केरदै लागै ती। च़ानक एक स्वर्गदूत तिन्हां पैंधै प्रगट हुआ, होर ते डौरै। तेई स्वर्गदूते बोलू, “मौत डौरदा, किबैकि मुँ हागै तुसरी तैंईंयैं शोभला समाद सा। बैतलहमा न मसीह, प्रभु रा जन्म हुआ सा!”

जाईया तेई शोहरू बै तोपा, होर तुसा सौ टौलै न लपेटूआदा होर खुड़ा न सुतादा पाणा” च़ानक, सर्ग स्वर्गदूता न भौऊरूआ। ते परमेश्वरा री सराऊथि केरदै लागै ती। तिन्हैं बोलू, “सारी महिमा स्वर्गा न बैठैदै परमेश्वरा बै मिली लोड़ी। धौरती पैंधै तिन्हां लोका न शान्ति हुई लोड़ी ज़ुणिरी सौ चिन्ता केरा सा!”

तैबै स्वर्गदूत नौठै। ते फुआल भी आपणी भेड़ा बै छ़ौड़िया शोहरू बै हेरदै नौठै। छ़ेकै ते तेसा ज़ैगा न पुजै ज़ौखै यीशु ती होर तिन्हैं सौ खुड़ा न सुतादा हेरू, ज़ैण्ढै कि स्वर्गदूते बोलू ती। ते बोहू खुश हुऐ ती। तैबै ते फुआल तौखै बै वापस नौठै ज़ौखै तिन्हरी भेड़ा ती। तिन्हैं ज़ो किछ़ भी शुणु होर हेरू तिन्हां सैभी री तैंईंयैं ते परमेश्वरा री स्तुति केरदै लागै ती।

पूर्वा धिरिऐ दूर एक देशा न किछ़ मर्द ती। ते तारै रै बारै न जाणा ती, होर ते बोहू बुद्धिमान ती। तिन्हैं लग किस्मा रा तारा सर्गा न हेरू। तिन्हैं बोलू कि यहूदी रै एक राजा रा जन्म हुआ सा। तैबै तिन्हैं तेई शोहरू बै हेरनै री तैंईंयैं आपणै देशा न यात्रा केरनै र फैसला केरू। एक लौम्मी यात्रा न बाद, ते बैतलहम आऐ होर सौ घौर तोपू ज़ौखै यीशु होर तेइरै आमा बापू रौहंदै लागै ती।

ज़ैबै इन्हैं मर्दे यीशु आपणी आमा सैंघै हेरू ता तिन्हैं प्रणाम करिया तेइरी आराधना केरी। तिन्हैं यीशु बै कीमती भेंट धिनी। फिरी ते घौरा बै वापस नौठै।