22. यूहन्ना रा जन्म

पैहलै ज़मानै न, परमेश्वर आपणै लोका सैंघै स्वर्गदूत होर भविष्यवाणी केरनु आल़ै रै ज़रियै गैला केरा ती। पर फिरी 400 बौर्षा तकर परमेश्वरै तिन्हां सैंघै गैला नैंई केरी। तैबै परमेश्वरै जकर्याह नाँ रै भविष्यवाणी केरनु आल़ै हागै एक स्वर्गदूत भेजू। जकर्याह होर तेइरी लाड़ी एलीशिबा परमेश्वरा रा आदर केरा ती। ते दुऐ बोहू खापरै हुऐ ती,तिन्हरी कोई औलाद नैंई ती औथि।

तेई स्वर्गदूते जकर्याह सैंघै बोलू, “तेरी लाड़ी रै एक बेटा पैदा होंणा| तू तेइरा नाँ यूहन्ना रखेई। परमेश्वरा सौ पवित्र आत्मा सैंघै भौरना, होर यूहन्ना लोका मसीह बै मनणै री तकर त्यार केरनै।” जकर्याहे ज़वाब धिना, “हांऊँ होर मेरी लाड़ी औलाद पैदा केरनै बै बोहू खापरै हुऐ सी! हांऊँ कैण्ढै जाणनु कि तुसै मूँ सैंघै सच़ बोलदै लागै सी?”

तेई स्वर्गदूते जकर्याह बै ज़वाब धिना, “तौ हागै ऐई शुभ समादा बै देणै री तैंईंयैं हांऊँ परमेश्वरै भेजू सा। किबैकि तैं मुँ पैंध बशाह नैंई केरू, तैबै त्तू बच्च़ै होंणै तकर बोली नैंई सकदा।” छ़ेकै, जकर्याह रा बोलणा बन्द हुआ। तैबै सौ स्वर्गदूत जकर्याह हागै न नौठा। एथा न बाद, जकर्याह घौरा बै वापस आऊ होर तेइरी लाड़ी सुज़दी रौही।

जैबै एलिशिवा बै छौ महीने हुए ती, ता सौऐ स्वर्गदूत च़ानक एलीशिवा रै रिश्तेदार मरियमा आगै नौठा। मरियम एक कुँवारी शोहरी ती ज़ुणिरी मंगणी युसूफ नाँ रै एक मर्दा सैंघै हुई ती। स्वर्गदुते तेसा बै बोलू, “तौ सूजणा, होर तेरै एक शोरूह पैदा होणा। तू तेईरा नाँ यीशु रखेई। तेई सर्वशक्तिमान परमेश्वरा रा बेटा होंणा होर हमेशा री तैंईये राज़ केरना।”

मरियमे स्वर्गदूता बै ज़वाब धिना, “कैण्ढै होई सका सा, किबैकि हांऊँ ता कुँआरी सा?” तेई स्वर्गदुते सौ समझाई, “पवित्र आत्मा तौ पैंधै ऐणा, होर परमेश्वरा री शक्ति तौ पैंधै होणी, तैबै तेई शोहरू पवित्र होंणा, तेई परमेश्वरा रै बेटै होंणा।” तैबै सौ पवित्र जो पैदा होणु आल़ा सा,परमेश्वरा रा बेटा बोलिणा। जे किछ़ तेई स्वर्गदूते मरियमा सैंघै बोलू तेसै तेई पैंधै बशाह केरू।

ऐ होंणै न बाद, मरियम एलिशिवा सैंघै मिलदी नौठी। ज़ैण्ढै मरियमे तेसा बै नमस्कार केरी, एलीशिवा रा शोहरू पेटा न पटीकु। तिन्हरी तैंइंयैं परमेश्वरै ज़ो केरू ती तेथा रै बारै न ते बेटड़ी खुश हुई। एलीशिवा सैंघै त्राई म्हीनै रौहणै न बाद, मरियम घौरा वापस आई।

एथा न बाद, एलीशिवे आपणै शोहरू बै जन्म धिना। जकर्याह होर एलीशिवे तेई शोहरू रा नाँ यूहन्ना रखु, ज़ैण्ढा कि स्वर्गदूते हुक्म धिना ती। तैबै परमेश्वरै जकर्याह रा मुँह खोलू, “परमेश्वरा री सराऊथि हो, किबैकि तेइयै आपणै लोका री मज़त केरनै री तैंईंयैं रखु सा! ओ मेरै बेटेआ, तौ सर्वशक्तिमान परमेश्वरा री भविष्यवाणी केरनु आल़ै होंणा। तौ लोका बै दसणा कि कैण्ढै आपणै पापा री तैंईंयैं माफी पाई सका सी!”