21. परमेश्वर मसीह रा वायदा केरा सा

ज़ैबै परमेश्वरै दुनिया बणाई, सौ जाणा ती कि तेइबै बाहदा न कौसी रोज़ मसीह भेज़णा पौड़ना तेइयै आदम होर हव्वा न वायदा केरू ती कि सौ ऐण्ढा केरला। हव्वा सैंघै एक खानदान पैदा होंणा ज़ुणी कीड़ै री मुण्डी जेखड़नी। ज़ुणी कीड़ै हव्वा बै धोखा धिना सौ शैतान ती। परमेश्वरा रा मतलब ती कि मसीह पूरी रीतियै शैतान हराणा।

परमेश्वरै अब्राहमा सैंघै वायदा केरू ती कि तेइरै ज़रियै दुनिया रै सारै देशा आशीष पाणी। परमेश्वरा ऐणु आल़ै बौगता न मसीह भेजणै रै ज़रियै ऐ वायदा पूरा केरना। तेई मसीहा दुनिया रै हर देशा रै लोका तिन्हंरै पापा न छुड़ाणै।

परमेश्वरै मूसा सैंघै वायदा केरू ती कि ऐणु आल़ै बौगता न तेई मूसा सांही एक होर भविष्यवाणी केरनु आल़ा भेजणा। ऐई भविष्यवाणी केरनु आल़ै मसीह होंणा। ऐण्ढी तैरहा परमेश्वरै दबारा वायदा केरू कि तेई मसीह भेजणा।

परमेश्वरै राजा दाऊदा सैंघै वायदा केरू ती कि तेइरा एक खानदान मसीह होंणा। तेई राजै होंणा या परमेश्वरा रै लोका पैंधै राज़ केरना।

परमेश्वरै यिर्मयाह भविष्यवाणी केरनु आल़ै सैंघै गैला केरी होर बोलू कि एक रोज़ तेई एक वायदा केरना। तेई नोंऊँएं वायदै इस्राएला सैंघै सीनै ढौगा न केरूएदै पराणै वायदै सांही नैंई होंणा। ज़ैबै लोका सैंघै तेई आपणा नोंऊँआ वायदा केरना, ता तेई तिन्हां पैंधै आपु ए व्यक्तिगत रूपा न प्रगट होणा। हर लोका तेई सैंघै झ़ुरी रखणी होर तेइरै बिधाना रा पालन केरनै री इच्छा रखणी। परमेश्वरै बोलू कि तिन्हरै दिला न लिखणै सांही होंणा। ते तेइरै लोका होंणै, होर परमेश्वरा तिन्हरै पाप माफ़ केरनै। तेई मसीह होंणा होर तेई तिन्हां सैंघै सौ नोंऊँआं वायदा केरना।

परमेश्वरा रै भविष्यवाणी केरनु आल़ै ऐ भी बोलू कि मसीह एक भविष्यवाणी केरनु आल़ा होंणा। एक भविष्यवाणी केरनु आल़ा सौ मांहणु सा ज़ो परमेश्वरा रै वचना बै शुणा सा होर फिरी लोका पैंधै परमेश्वरा रै वचना री घोषणा केरा सा। ज़ुणिबै भेजणा रा परमेश्वरै वायदा केरू ती। तेई मसीह सिद्ध भविष्यवाणी केरनु आल़ा होंणा। तेई मसीह परमेश्वरा रा संदेश शोभली तैरहा शुणना, होर तेई लोका बै ते संदेश शोभली तेरहा सिखाणै।

इस्राएली पुरोहिते लोकै री तैंईंयैं परमेश्वरा आगै बौलि च़ढ़ाणी शुरू केरी। ऐ बौलि लोकै रै पापा री तैंईंयैं परमेश्वरा रै ज़रियै सज़ा देणै री ज़ैगा न च़ढ़ाई ती। पुरोहिते लोका री तैंईंयैं प्रार्थना भी केरी। पर तेई मसीह सिद्ध महापुरोहित होंणा ज़ो परमेश्वरा बै देणै री तैंईंयैं एक सिद्ध बौली रै रूपा न आपु बै च़ढ़ाला। तेई कैधी पाप नैंई केरना, होर ज़ैबै सौ आपु बै बौलि होंणै री तैंईंयैं देला, ता दुनिया री कोई भी बौलि ज़रूरी नैंई होंणी।

लोका रै छ़ुण्डा पैंधै राजे होर प्रधान राज़ केरा सी, कैधी-कैधी ते गलती भी केरा सी। राजा दाऊदै सिर्फ इस्राएली लोका पैंधै राज़ केरू, पर राजा दाऊदै रा खानदान न मसीह पूरी दुनिया पैंधै राज़ केरना, होर तेई हमेशा री तैंईंयैं राज़ केरना। ऊँई रै अलावा, तेई हमेशा न्याय सैंघै राज़ केरना, होर सही फैसला केरना।

परमेश्वरा री भविष्यवाणी केरनु आल़ै मसीह रै बारै न बोहू सारी गैला बोली, मलाकी ऐ बोलू कि मसीह रै ऐणै न पैहलै एक दुजी भविष्यवाणी केरनु आल़ै ऐणा। तेई भविष्यवाणी केरनु आल़ै बोहू खास होंणा। ऊँई रै आलावा, यशायाह भविष्यवाणी केरनू आल़ै लिखू सा कि मसीहा एक कुँआरी न जन्म लेणा

यशायाह भविष्यवाणी केरनु आल़ै बै बोलू कि मसीह गलीला न रौहणा। ज़ो लोका बोहू दुखी सी मसीहा तिन्हां बै शान्ति देणी। तेई कैईदी भी आज़ाद केरनै। मसीह बीमारी बै होर ज़ो शुणी नैंई सकदै, हेरी नैंई सकदै, बोली नैंइ सकदै, या च़ली नी सकदै ती ते भी ठीक केरनै।

यशायाह भविष्यवाणी केरनु आल़ै ऐ भी बोलू सा लोका मसीह न नफरत केरनी होर तेइबै मनणै न नाँह केरना। होरी भविष्यवाणी केरनु आल़ै बोलू की मसीह रै एक सैंघी तेइरै खिलाफ उठणा। जकर्याह भविष्यवाणी केरनु आल़ै ऐ बोलू सा कि तेइरै सैंघिऐ ऐण्ढा केरनै री तैंईंयैं होरी लोका न चाँदी रै 30 सिक्के लेणै। ऊँइरै अलावा, किछ़ भविष्यवाणी केरनु आल़ै बोलू सा, कि लोका मसीह मारना, होर ऐ कि तिन्हां तेइरै टौलै सैघैं जुआ खेलणा।

भविष्यवाणी केरनु आल़ै ऐ भी दसु कि मसीहा कैण्ढै मौरना। यशायाहे भविष्यवाणी केरी कि लोका मसीह पैंधै थूकणा, तेइरा मजाक उड़ाणा, होर सौ कूटणा। लोका सौ भिनणा होर तेई बोहू दाह होर दुखा न मौरना, ज़ैबैकि तेइयै किछ़ भी नैंई केरूदा होला।

भविष्यवाणी केरनु आल़ै ऐ भी बोलू कि मसीहा पाप नैंई केरना तेई सिद्ध होंणा। पर तेई तैबै मौरना परमेश्वरा तेईबै होरी लोके रै पापै री बजहा न सज़ा पाणी। तेइरै मौरनै सैंघै लोका परमेश्वरा सैंघै मेल-मिलाप केरनै लाइक होंणा। तैबै परमेश्वर चाहा सा कि मसीह मुँआ लोड़ी।

भविष्यवाणी केरनु आल़ै ऐ भी दसु सा कि परमेश्वरा मसीह मुँऐंदै न जिन्दा केरना। ऐ रिहा सा कि ऐ सैभ नोंऊँऐ वायदै बै केरनै री परमेश्वरा री तरकीब ती, ताकि सौ तिन्हां लोका बै बचाई सकै ज़ुणियै तेइरै खिलाफ पाप केरू।

परमेश्वरै भविष्यवाणी केरनु आल़ै पैंधै मसीह रै बारै न बोहू गैला प्रगट केरी, पर मसीह भविष्यवाणी केरनु आल़ै मौंझै न कौसी रै भी ज़िन्दगी न नैंई आऊ ती। इन्हां भविष्यवाणी रै देणै रै 400 न ज़ादा बौर्षा न बाद, सही बौगता पैंधै, परमेश्वरा मसीह ऐसा दुनिया न भेजणा।