20. गुलामी न रोहणा होर बापसी

इस्राएला रै राज्य होर यहूदा रै राज्य दुई ए परमेश्वरा रै खिलाफ़ पाप केरू। तिन्हैं सौ वायदा चोड़ू ज़ो परमेश्वरै तिन्हां सैंघै सीनै ढौगा न केरू ती। परमेश्वरै तिन्हां बै पछ़तावा केरनै होर दबारा आराधना केरनै री तैंईंयैं चिताऊणी देणै बै आपणै भविष्यवाणी केरनु आल़ै भेज़ै, पर तिन्हैं तिन्हरी गैल मनणै न नाँह केरू।

तैबै परमेश्वरै तिन्हरै बेरी बै तिन्हां बै नाश केरनै रै ज़रियै दुई राज्य बै सज़ा धिनी। अश्शूर एक होर देश ती ज़ो बोहू शक्तिशाली हुआ ती ते होरी देशा री तैंईंयैं निर्दय भी ती तिन्हैं एज़िया इस्राएला रै राज्य नाश केरै। अश्शूरा रै लोकै इस्राएला रै राज्य न बोहू लोका मकाऐ।, ज़ो चाहू सौ लूटू, होर देशा रै कई हिस्सै फूकै।

अश्शूरी लोकै सैभ अगुवे, सेठ लोका, होर ऐण्ढै लोका ज़ो कीमती चीज़ा बणाई सका ती सैंघै कठै केरै होर तिन्हैं ते अश्शूर देशा न नेऐ। इस्राएला न सिर्फ़ किछ़ गरीब इस्राएली ऐ बच़ै।

फिरी अश्शूरी लोका तेई देशा न रौहणै री तैंईंयैं विदेशी बै लेइया आऐ ज़ो इस्राएली तौखै बचैदै ती तिन्हैं तौखै ब्याह केरू इन्हां लोका रै खानदान सामरी कहलाऐ।

यहूदा रै राज्य रै लोकै हेरू कि कैण्ढै परमेश्वरै तेई पैंधै बशाह नैंई केरनै होर तेइरी गैला नैंई मनणै री बजहा न इस्राएला रै लोका बै सज़ा धिनी ती पर तैबै भी तिन्हैं कनानी रै देऊआ री मूर्ति री पूजा केरी परमेश्वरै तिन्हां बै चिताऊणी देणै री तैंईंयैं भविष्यवाणी केरनु आल़ै भेजै, पर तिन्हैं शुणनै न नाँह केरू।

लगभग 100 बौर्षा बाद अश्शूरी लोकै इस्राएली राज्य नाश केरू। परमेश्वरै बेबीलोना रै राजा नबुकदनेस्सर यहूदा रै राज्य पैंधै हमला केरनै री तकर भेजू। बेबीलोन एक शक्तिशाली देश ती। यहूदा रा राजा, नबूकदनेस्सर रा नोकर बणिया तिन्हां बै हर बौर्ष बोहू सारा धन देणै बै त्यार हुआ।

पर किछ़ बौर्षा बाद, यहूदा रै राजै बेबीलोना रै बरोधा न विद्रोह केरु। तैबै बेबीलोने बापस एजिया यहूदा रै राज्य पैंधै हमला केरू। तिन्हैं यरूशलेम जीतू, मंदिरा रा नाश केरू, नगर होर मंदिरा री सैभ कीमती चीज़ा तिन्हां न लेई।

विद्रोह केरनै री बजहा न यहूदा रै राजै बै सज़ा धिनी होर नबूकदनेस्सर रै सैनिके तेइरा बेटा तेइरै सामनै मकाऊ होर तेथा न बाद सौ काणा केरू। एथा न बाद, तिन्हैं राजा आपू सैंघै नेऊ ताकि सौ बेबिलोना रै कैद खानै न मुँआ लोड़ी।

नबूकदनेस्सर होर तेइरी सैना यहूदा रै राज्य रै लगभग सारै लोका बेबिलोना बै आंणै। तौखे सिर्फ गरीब मांहणु छौड़ै ताकि ते तौखे छेता न कौम केरी सकलै। ऐ सौ बौगत ती ज़ैबै परमेश्वरा रै लोका बै वायदा केरूईदी ज़ैगा छौड़नै री तैंईंयैं मजबूर केरै, ऐई बौगता बै बंधुआई बोलिया ती|

परमेश्वरै आपणै लोका बै तिन्हरे पापा री तैंईंयैं सज़ा धिनी। तैबै भी तेइयै ते होर आपणा वायदा नैंई बिसरू ती। परमेश्वरै आपणै लोका री निगरानी रखणी शुरू केरी होर आपणै भविष्यवाणी केरनै रै ज़रियै तिन्हां सैंघै गैला केरदा रौहू। तेइयै तिन्हां सैंघै वायदा केरू कि 70 बौर्षा बाद, तिन्हां दबारा वायदै रै देशा न वापस।

लगभग 70 बौर्षा बाद, फारसा रै राजै कुस्रूऐ बेबिलोन हराऊ, तैबै बेबिलोना रै सम्राज्य रै बजाय फारसा रै सम्राज्य कई देशा पैंधै राज़ केरू। इस्राईली बै ऐबै यहूदी बोलिया ती तिन्हां मौंझे बौहु लोकै आपणी पूरी जिन्दगी बेबिलोना न बिताई सिर्फ किछ़ पराणै बुज़ुर्ग यहूदी बै यहूदा नगर याद ती।

फारसी लोका बड़ै शक्तिशाली ती, पर तिन्हैं आपणै जीतेदै लोका पैंधै दया केरी ती। ज़ैबै फारसी रा राजा कुस्तर बणु,तेइयै ऐ हुक्म धिना कि अगर कोई यहूदी ज़ो यहूदा बै वापस जाणा चाहा सा ता, सौ फारसा बै छौड़िया जाई सका सा। औखै तकर कि तेइयै मन्दिर बनाणै री तैंईंयैं ढैबुऐ भी धिनै। गुलामी रै 70 बौर्षा बाद, यहूदी रा एक होछ़ा छ़ुण्ड यहूदा न यरूशलेम नगरा बै वापस आऐ।

ज़ैबै ते लोका बापस यरूशलेम पूजै ता तिन्हैं मन्दिर होर नगरा रै चौऊ धिरिऐ री दीवारा भी दबारा बणाई पर हाज़ी भी तौखै फारसी लोका राज़ केरा ती, पर एक बार फिरी ते वायदा केरूऐदै देशा न रौहंदै लागै ती होर मन्दिरा न आराधना केरदै लागै ती।